Yanvarın 19-da Bakı Pedaqoji Kadrların İxtisasartırma və Yenidənhazırlanma İnstitutunda "20 Yanvar - tariximizin şanlı və qanlı səhifəsi" mövzusunda elmi-praktik konfrans keçirildi.  20 Yanvar faciəsinin iyirmi ikinci ildönümünə həsr olunmuş mərasimdə öncə respublikamızın müstəqilliyi, ərazi bütövlüyü uğrunda canlarından keçən şəhidlərimizin əziz xatirəsi bir dəqiqəlik sükutla yad edildi. 

Konfransı institutun rektoru, professor Asəf Zamanov açdı və faciəyə gedən yol mövzusunda geniş məruzə ilə çıxış etdi. Rektor bildirdi ki, xalqımızın ümummilli lideri Heydər Əliyev Sov.İKP Siyasi Bürosunun üzvlüyündən və SSRİ Nazirlər Soveti sədrinin birinci müavini vəzifəsindən istefa verdikdən qısa müddət sonra Dağlıq Qarabağın Azərbaycandan ayrılıb Ermənistana birləşdirilməsi barədə məsələ gündəmə gəldi. O vaxtkı SSRİ-nin rəhbəri M.Qorbaçovla bu məsələnin həll edilməsi  barədə razılaşdığını Fransada erməni elitası qarşısında çıxışında Aqanbekyan  bildirdi. Hələ 1989-cu ilin 12 yanvar tarixində SSRİ Ali Sovetinin Rəyasət Heyətinin iclasında "Azərbaycan SSR-nin Dağlıq Qarabağ Muxtar Vilayətinə xüsusi idarəçilik statusu verilməsi barədə" qərar qəbul edildi və Azərbaycanın o vaxtkı səriştəsiz rəhbərliyinin bu məsələlərə biganəliyini görən xalq öz ərazi bütövlüyü uğrunda mübarizəsini daha da genişləndirdi.

Sovet imperiyası və kommunist rejimini nəyin bahasına olursa-olsun qoruyub saxlamaq, digər müttəfiq respublikalarda belə halların qarşısını almaq və Azərbaycanda milli azadlıq hərəkatının qarşısını almaq və Azərbaycanda milli azadlıq hərəkatını boğmaq məqsədilə 1990-cı ilin yanvarın 19-dan 20-nə keçən gecə SSRİ DİN, DTK və Müdafiə Nazirliyinin təpədən dırnağa qədər silahlanmış on bir min canlı qüvvəsi Bakıya yeridildi. Azərbaycanı informasiya blokadasına salmaq üçün  Dövlət televiziyasının enerji bloku partladıldı. Azərbaycan əhalisi heç bir informasiya ala bilmədi. Həmin hadisədən, qırğından  təxminən 5-6 saat sonra fövqəladə vəziyyət elan edildi. Düşmən dinc əhaliyə qarşı amansızlıqla vəhşiliklərə əl atırdı. 20 Yanvar faciəsinə ilk münasibət bildirən məhz ümummilli lider Heydər Əliyev oldu. Yanvarın 21-də Heydər Əliyev özünü və ailəsini təhlükə altına qoyaraq Moskvadakı Azərbaycanın daimi nümayəndəliyinə getdi və 20 Yanvar hadisələrinin əsl günahkarlarını bütün dünyaya bəyan etdi. Azərbaycan xalqına başsağlığı verdi. Bu, bütün xalq üçün bir təskinlik, bir ürək-dirək idi. Vurğulandı ki, ulu öndər 1993-cü ildə Azərbaycan xalqının təkidi ilə  ikinci dəfə hakimiyyətə qayıtdıqdan sonra 1994-cü ilin mart ayının 29-da Milli Məclisin qərarı ilə 20 Yanvar hadisələrinə siyasi-hüquqi qiymət verildi.  Natiq qeyd etdi ki, 20 Yanvar tariximizin qanlı faciəsi olmaqla qəhrəmanlıq tarixidir.

Konfransda akademik Asəf Nadirov, AMEA-nın Fəlsəfə, Sosiologiya və Hüquq İnstitutunun baş elmi işçisi, 20 Yanvar şəhidi Ülvi  Bünyadzadənin bacısı, fəlsəfə elmləri doktoru Könül Bünyadzadə, Binəqədi Rayon Gənclər və İdman İdarəsinin rəisi Qüdsi Bayramov, Bakı Pedaqoji Kadrların İxtisasartırma və Yenidənhazırlanma İnstitutunun kafedra müdiri Aydın Paşayev 20 Yanvar faciəsinin iyirmi ikinci ildönümü ilə əlaqədar məruzə ilə çıxış etdilər.

Sonra 20 Yanvar faciəsinin 22-ci ildönümü münasibəti ilə keçirilən "Qanlı Yanvar" mövzusunda inşa yazı müsabiqəsinin qalibləri mükafatlandırıldı. Konfransın sonunda institutun tələbələrinin iştirakı ilə ədəbi-bədii kompozisiya göstərildi.  

Rəşad ZİYADOV