|
Naxçıvan Özəl Universitetində 20 Yanvar faciəsinə həsr
olunmuş "Qəhrəmanlıq və məğrurluq günü" mövzusunda
elmi-praktik konfrans keçirilmişdir. Konfransı ali
təhsil ocağının rektoru, professor İsmayıl Əliyev açaraq
bildirmişdir ki, o qanlı hadisələri törədənləri bu gün
tarix də, xalqımız da nifrətlə xatırlayır. Həmin gün
müasir silahlarla silahlanmış ordu əliyalın, günahı
olmayan insanların üzərinə amansız hücuma keçdi. Sözsüz
ki, Sovet imperiyasının bu qanlı aksiyanı törətməkdə
məqsədi xalqımızın mübarizə əzmini qırıb, onun
müstəqillik arzusunu içində boğmaqla 70 ildən bəri
əsarət altında çırpınan başqa xalqlara ibrət dərsi
vermək idi. Amma imperiya bu qanlı aksiyanı törətməklə
öz çirkin məqsədinə çata bilmədi. Həmin gün
Azərbaycanın azadlıq arzusu gülləyə tutuldu, lakin
müstəqillik eşqi ilə alışıb-yanan xalqın mətin
iradəsini sarsıda bilmədi. Xalqın qəzəbindən qorxuya
düşən o vaxtkı ölkə rəhbərləri Moskvaya qaçıb bu qanlı
aksiyanı törədənlərin qoltuğunda özünə sığınacaq tapdı.
Bu isə namərdliyin, xalqa xəyanətin ən yüksək dərəcəsi
idi. Vurğulandı ki, Azərbaycanın səsinin heç yerdən
eşidilmədiyi o dövrdə öz xalqının səsinə səs verən yenə
də xalqımızın ümummilli lideri Heydər Əliyev oldu.
Qanlı Yanvar faciəsindən ötən müddət ərzində şəhidlər
heç bir zaman unudulmayıb, onların azadlıq, müstəqillik
uğrunda tökülən qanları hədər getməyib. Ölkə rəhbərinin
daim diqqət və qayğısı ilə torpaqlarımız
uğrunda,vətənin müstəqilliyi, azadlığı yolunda şəhid
olanların xatirəsi hər zaman əziz tutulur. 20 Yanvar
faciəsi nə qədər acı və dəhşətli olsa da, eyni zamanda
yurdumuzun şərəfli qəhrəmanlıq səhifəsidir.
Konfransda qeyd edildi ki, bu gün müstəqil Azərbaycan
inkişaf edir, yüksəlir. Prezident İlham Əliyevin
apardığı uğurlu daxili və xarici siyasəti nəticəsində
ölkəmiz dünya dövlətləri arasında xüsusi nüfuz qazanaraq
daha böyük nailiyyətlər əldə edir.
Sonda filologiya elmləri üzrə fəlsəfə doktoru Rafiq
Babayev, tarix elmləri üzrə fəlsəfə doktoru Elçin
Zamanov, tərbiyə işləri üzrə prorektor Əli Yusifov və
başqaları mövzu ilə bağlı çıxış etmişlər.
Nuray ƏSGƏROVA,
Naxçıvan Özəl Universitetinin əməkdaşı |
