|
|
|
Beynəlxalq təhsil xəbərləri |
|
|
|
|
Moskva Dövlət Universiteti filiallarını
gücləndirir |
|
 M.V.Lomonosov
adına Moskva Dövlət Universiteti postsovet
məkanında mövqelərini gücləndirir. Bu barədə
Moskva Dövlət Universitetinin rektoru, akademik
Viktor Sadovniçi mətbuata verdiyi açıqlamasında
bildirib. Onun sözlərinə görə, MDU-nun MDB
ölkələrində filiallarının böyük şəbəkəsi
mövcuddur. "Hazırda MDU-nun 5 filialı var.
Sevastopol, Astana, Daşkənd, Bakı və Düşənbədəki
filiallarda 3 min tələbə təhsil alır. İldən-ilə
MDU-nun filiallarında təhsil proqramlarının sayı
artır. Bizim Bakı filialının genişləndirilməsi
barədə planlarımız var. Sevastopol, Astana,
Daşkənd filiallarının da yeniləşməsi aparılacaq",-deyə
rektor bildirib. Cari ildə filiallara 662 nəfər
tələbənin qəbul olunduğunu deyən Sadovniçi
hazırda MDB ölkələrindən MDU-da 600 tələbənin
təhsil aldığını vurğulayıb. Onlardan ən
istedadlıları olan 100 nəfər pulsuz təhsil alır.
Bir çox tələbələr MDB ölkələrinin dövlət
proqramları xətti ilə oxumağa gəlib. MDU
postsovet məkanında əməkdaşlığın
möhkəmləndirilməsini özünün prioritet
vəzifələrindən biri hesab edir. |
| |
|
Qazaxıstan 12 illik təhsil modelinə keçir |
|
Qazaxıstanda 12 illik təhsil modelinə keçidlə
bağlı hazırlıq işləri aparılır. Bu barədə
Qazaxıstanın Təhsil və Elm Nazirliyinin
məlumatında bildirilir. Açıqlamada qeyd olunur
ki, hazırda respublikanın 104 məktəbində, o
cümlədən 45 kənd və 59 şəhər məktəbində 12 illik
təhsil modelinə keçidlə bağlı eksperimentlər
həyata keçirilir. 2011-ci ildə ibtidai təhsil
və 12 illik təhsilin dövlət standartlarının əsas
müddəaları işlənib hazırlanıb. 12 illik təhsil
çərçivəsində tədris fənlərinin tərkibi müəyyən
olunub, dərslik və tədris-metodik komplektləri
işlənib hazırlanıb.
Bundan əlavə, müəllimlərin yenidənhazırlanması
və ixtisasının artırılması üzrə sistemli iş
aparılır. Artıq eksperimentdə iştirak edən
məktəblərdə müəllimlərin 71 faizi
yenidənhazırlanma və ixtisasartırma kurslarında
iştirak edib.
İşlənib hazırlanmış plana müvafiq olaraq 12
illik təhsilə keçid 2015-2016-cı dərs ilinə
nəzərdə tutulub. 2015-2016-cı dərs ilində
birinci sinfə gedəcək şagirdlərin sayı 6-7
yaşdan yuxarı 624 min təşkil edəcək. 2014-cü
illə müqayisədə 2015-ci il sentyabrın 1-nə qədər
şagird kontingentinin sayı 2 dəfə artacaq.
Qeyd edək ki, 12 illik orta təhsil dünyanın 136
ölkəsində, eləcə də Avstraliya, Kanada, ABŞ,
Fransa, Yaponiya və dünyanın rəqabətə davamlı
digər 50 ölkəsində mövcuddur.
Məlumatda qeyd olunur ki, Qazaxıstanda 12 illik
təhsilə keçid müasir tələblərə cavab verən yeni
ideyaları irəli sürməyə, ölkənin təhsil
sisteminin dünya təhsil məkanına inteqrasiya
olunmasına imkan verəcək. |
| |
|
YUNİSEF yeni təşəbbüslə çıxış edib |
|
 BMT-nin
Uşaq fondu (YUNİSEF) Asiya və Sakit okeanı
ölkələrində təhsilin hamı üçün əlçatan olması və
təhsilin keyfiyyətinin yaxşılaşdırılması üçün
yeni təşəbbüslə çıxış edib.
Bu layihə məktəb həyatından kənarda qalan 26
milyon uşağa yardım göstərəcək. Layihə etnik
azlıqlardan olan qız uşaqları da daxil olmaqla
daha çox diqqətdən kənarda qalmış və çox zəif
uşaqlar üçün təhsil sahəsində xidmətlərin
genişləndirilməsini nəzərdə tutur. Yeni təşəbbüs
Banqladeş, Butan, Çin, Hindistan, Laos,
Monqolustan, Nepal, Papua-Yeni Qvineya, Filippin,
Timor-Leşti və Vyetnamı əhatə edəcək. YUNİSEF "Asiya
üçün məktəb" layihəsinin maliyyələşdirilməsi
üçün 70 milyon dollar vəsait toplamağa ümid
edir. "Asiya üçün məktəb" layihəsi təkcə məktəb
binalarının tikintisi deyil. Proqramın
mərkəzində bütün uşaqlar üçün keyfiyyətli
təhsilin təşkil olunması durur", - deyə qurumun
təmsilçisi Leotes Xelin bildirib. Proqram
çərçivəsində müəllimlər üçün xüsusi seminarlar
təşkil olunacaq, tədris materiallarının
keyfiyyəti yaxşılaşdırılacaq, eləcə də
valideynlərin və yerli icma nümayəndələrinin
məktəb həyatına cəlb olunması təmin olunacaq.
|
| |
|
Rusiyada gimnaziya və liseylər ləğv olunacaq |
|
 Rusiyanın
"Təhsil haqqında" Qanununa edilmiş
dəyişikliklərə müvafiq olaraq yaxın gələcəkdə
ölkədə gimnaziya və liseylər ləğv olunacaq. Yeni
qanun layihəsi 2013-cü ildən qüvvəyə minəcək.
Qərara alınıb ki, indi təhsil müəssisələrinin
müxtəlif növlərinin ləğv olunması vacibdir.
Rusiya təhsilinin maliyyələşdirilməsinin yeni
sisteminin tətbiq olunması ilə əlaqədar maddi
vəsaitləri müəssisələrin formal adına görə yox,
konkret təhsil proqramına görə ayırmaq lazımdır.
Yeni qanunun qüvvəyə minməsindən sonra ölkənin
ümumtəhsil müəssisələrinin maliyyələşdirilməsi
təkcə bu və ya digər məktəbdə nə qədər uşağın
təhsil alması ilə deyil, həm də hər hansı təhsil
proqramının həyata keçirilməsinə nə qədər
vəsaitin tələb olunması ilə yerinə yetiriləcək.
Bu isə əlavə xərclərdən qaçmağa imkan verəcək.
Bundan əlavə, təhsil proqramlarının özünün də
həyata keçirilməsinə olan tələblər artacaq. |
| |
|
Norveçdə Boloniya sisteminin tələbləri pozulur |
|
Avropa ölkələrinin vahid təhsil məkanında təmsil
olunmasını özündə ehtiva edən Boloniya
prosesinin tələbləri Norveçdə pozulur.
Prinsiplərdən ən vacibi bundan ibarətdir ki,
ümumavropa məkanında tələbələrin işləmək
hüquqları tanınır.
Lakin Norveçdə bu sahədə ayrı-seçkilik müşahidə
olunur. Xarici ölkə vətəndaşlarının Norveçdə işə
düzəlmə imkanları məhduddur. Norveçin Adaptasiya
və Uşaqların İşləri üzrə Nazirliyinin apardığı
araşdırmalara görə, bir sıra sahələrin
mütəxəssisləri olan xarici ölkə məzunlarına
Norveçdə iş yoxdur. Xüsusilə də nəqliyyat və
məntiq üzrə mütəxəssislərə bu ölkədə yer yoxdur.
Daha çox təhsil və səhiyyə sahəsini bitirmiş
kadrların işə düzəlmə şansı yüksəkdir.
Araşdırmalar nəticəsində məlum olub ki, xarici
ölkə vətəndaşı ən yaxşı halda xalq təsərrüfatı
sektorunda, işçi qüvvəsi daha çox ehtiyac
duyulan sahədə iş tapa bilər. Ayrı-seçkilik daha
çox yüksək təhsil səviyyəsi və ixtisas
dərəcəsinin tələb olunduğu vakansiyalar arasında
daha azdır. |
| |
|
Amerikalı tələbələr öz mövqelərini itirməkdədir |
|
 Uzun
müddət bütün dünyada təhsilin səviyyəsinə görə
ön sırada olan amerikalı tələbələr gözlənilmədən
öz mövqelərini itirməkdədir. Bu barədə Amerika
Ehtiyat Fondunun sabiq prezidenti Alan Qrinspen
The Financial Times qəzetində dərc olunmuş
məqaləsində qeyd edir. Onun sözlərinə görə, yaşı
25-ə qədər olan indiki Amerika gəncliyi yaşlı
nəsillə müqayisədə daha aşağı məhsuldarlıq
nümayiş etdirir. Xoşbəxtlikdən, statistik olaraq
məhsuldarlığın aşağı düşməsi o qədər böyük
olmasa da, onun miqyası getdikcə arta bilər.
Əgər Amerikanın təhsil sistemi dəyişməsə və
digər xarici ölkələrdən peşəkar kadrlar üçün
kvotalar artırılmasa, məhsuldarlıq səviyyəsinin
aşağı düşməsi fəlakətli miqyas alacaq. Onun
sözlərinə görə, Amerika təhsil sistemi inqilabi
dəyişikliklər ərəfəsindədir. Əgər ciddi
islahatlar baş verməsə, onda gələcək nəslin
firavanlığını təmin etmək mümkün olmayacaq.
|
| |
|
"Köhnə təhsil sistemi dünyanın heç bir yerində
işləmir" |
|
Estoniyanın təhsil və elm naziri Yaak Aaviksoo
hesab edir ki, informasiya texnologiyaları
təhsil sisteminə arzuolunan fayda verməyib.
Təhsil sistemində informasiya texnologiyalarının
roluna dair Londonda keçirilmiş forumda çıxış
edən nazir bunun səbəblərinə aydınlıq gətirib.
Onun sözlərinə görə, köhnə təhsil sistemi
informasiya və kommunikasiya texnologiyalarından
istifadəni dəstəkləmir. "Bir çox ölkələrdə
informasiya texnologiyalarına münasibətdə
gözləntilər olduqca böyük idi, lakin səmimi
olaraq etiraf etmək lazımdır ki, dünyanın heç
bir yerində arzuolunan tərəqqi baş vermədi",-deyə
nazir bildirib. Onun sözlərinə görə, artıq bütün
dünya başa düşüb ki, indi təhsildə uğuru
biliklərin deyil, bacarıqların inkişafı təmin
edir. Buna görə də təhsil sisteminə daha
köhnə təhsil modeli lazım deyil. "Biz yolları və
avtomobilləri 100 il əvvəl olduğu kimi salmır və
istehsal etmirik. Məktəbdə isə nədənsə hər şey
əvvəlki kimi qalıb". |
Xarici mətbuat materialları əsasında hazırladı:
Oruc MUSTAFAYEV |
|
|
|
|
|
|
|
|
|
|
|
|
|
|
|
