Bakıdakı 152 nömrəli  tam orta  məktəbin pedaqoji kollektivi  2011-2012-ci dərs  ilində böyüyən nəslin təlim-tərbiyəsini yüksək səviyyədə qurmaq, qarşıya qoyulan vəzifələri uğurla həyata keçirmək üçün öz işlərində və həyata keçirdikləri bütün tədbirlərdə   ciddi səylə  çalışırlar.

Məktəbin direktoru Gülarə Verdiyeva  bildirir ki,     məktəbdə dərsin  təkmilləşdirilməsi ilə  əlaqədar metodik işlər geniş vüsət alıb. Metodiki iş  "Təlim və tərbiyə metodlarını həyatın tələblərinə müvafiq quraq " və  "Yaradıcılıqla işləyən  müəllimdən yaradıcılıqla işləyən kollektivə" devizləri altında aparılır. Təhsil ocağında metodiki iş müəllimlərin özünütəhsili məsələsi ilə  üzvi şəkildə əlaqələndirilir, dərsin təkmilləşdirilməsinə, proqram materiallarının şagirdlər tərəfindən dərindən mənimsənilməsinə kömək etməklə bərabər, həm də  müəllimlərin vaxtaşırı fikir mübadiləsi aparmasına, müzakirələr,  mübahisələr şəklində şəxsi  fikirlərini həmkarlarına çatdırmaq üçün geniş  meydan  açılmasına şərait yaradır.

Hazırda  məktəbdə ayrı -ayrı fənlər üzrə  metodbirləşmə sədrləri   tərəfindən dərslərin təşkili, bu  və ya digər məsələ ilə bağlı qabaqcıl müəllimlərin çıxışı, seminar və konfransların keçirilməsi  mühüm rol oynayır. Məktəbdə   "açıq dərs"lər  dinlənilir və müzakirə zamanı verilən tövsiyələr, göstərilən metodik kömək işin xeyrinə  istiqamətləndirilir.

 Burada  metodik  işin yaxşı təşkili   yeni işə başlayan  gənc müəllimlər üçün  daha faydalı olur.

Şakir CƏFƏROV