Kürdəmir RTŞ-dan aldığımız məlumatda bildirilir ki, bu günlərdə rayonun bütün ümumtəhsil məktəblərində dərs deyən 373 ibtidai sinif müəllimi ilə elmi-metodiki seminar keçirilib. Seminar metodik kabinetin direkoru Seyidhüseyn Qasımov və şəhər 3 nömrəli tam orta məktəbin direktoru, "Müəllimlərin peşəkarlıq səviyyəsinin təkmilləşdirilməsi" layihəsi üzrə təlimçi Əli Ağayev tərəfindən həyata keçirilib. Elmi-metodiki seminarda müəllimlərə fəal təlimin qurulması mərhələləri və yeni qiymətləndirmə sistemi haqqında hazırlanmış prezentasiyalar təqdim olunub, onların çoxsaylı sualları cavablandırılıb.

Tədbirdə kurikulumların tətbiqi üzrə sertifikat almış şəhər 1 nömrəli tam orta məktəbin müəllimi Saray Səlimova, şəhər 4 nömrəli tam orta məktəbin müəllimi Xavər Baloğlanova, Beyi kənd tam orta məktəbin müəllimi Səməd Bədəlov öz qabaqcıl təcrübələrini müəllimlərlə bölüşüblər.

Eyni zamanda seminarda İKT-nin tətbiqi ilə fəal dərsin qurulması qaydaları, şagirdlərin müxtəlif meyarlara əsasən formativ qiymətləndirilməsi normativləri, böyük və kiçik summativ qiymətləndirilmə qaydaları, eləcə də yarımillik və illik qiymətlərin hesablanması qaydası geniş izah və müzakirə edilib.

Sonda bir qrup qabaqcıl müəllimlərin i

ştirakı ilə şəhər 3 nömrəli tam orta məktəbin birinci sinfində- müəllim Dilşad Mehdiyevanın və üçüncü sinifdə- müəllim Rahidə Abdullayevanın İKT-nin tətbiqi ilə hazırlanmış, fəal təlimə əsaslanan "açıq dərs"lərə baxış keçirilib. 

Ədalət DAŞDƏMİRLİ