Müdriklərdən birinin dediyi bu aforistik fikir ötən il dekabrın 24-də Bakıdakı 311 nömrəli tam orta məktəbdə "Riyaziyyat və poeziya" mövzusunda keçirilən ədəbi-bədii gecənin əsas leytmotivini təşkil edirdi. Bakı Şəhəri üzrə Təhsil İdarəsinin müvafiq əmri ilə paytaxtın ümumtəhsil müəssisələrində keçirilən "Riyaziyyat aylığı" çərçivəsində təşkil olunmuş tədbirə tanınmış şairlər İlyas Tapdıq, Musa Ələkbərli dəvət olunmuşdular.

Gecəni məktəbin direktoru Esmira Muradova açaraq qonaqları salamladı, onları tədris ocağında görməkdən məmnun qaldıqlarını bildirdi. Aylıqla bağlı məktəbdə həyata keçirilən tədbirlərdən danışan direktor riyaziyyat müəllimlərinin "açıq dərs"lər verdiyini, riyaziyyata dair sinif divar qəzetlərinin buraxıldığını, əyləncəli viktorinalar keçirildiyini, bütün bunların şagirdlərin riyaziyyata marağını daha da artırdığını söylədi.

Sonra şagirdlərdən biri sözləri və musiqisi tədbirin əsas təşkilatçısı və ssenarisinin müəllifi, məktəbin riyaziyyat və informatika müəllimi Vahid Aslana məxsus "Riyaziyyat" mahnısını ifa etdi.

Gecənin aparıcısı, məktəbin VII sinif şagirdi Aytən Həsənova məşhur alimlərin riyaziyyat, onun rolu və əhəmiyyəti, elmlər sistemindəki yeri haqqında dedikləri aforistik fikirləri səsləndirdi, riyaziyyat elminə böyük töhfələr vermiş görkəmli alimlərin, o cümlədən Azərbaycan riyaziyyatçılarının adlarını çəkdi. Müvafiq videogörüntülər ekranda canlandırıldı. Görkəmli Azərbaycan alimi, ABŞ-dakı Berkli Kaliforniya Universitetinin professoru Lütfi Zadənin həyatından və elmi fəaliyyətindən, onun məşhur qeyri-səlis çoxluqlar nəzəriyyəsindən bəhs edən qısametrajlı film nümayiş olundu.

Sonra səhnəyə sinələrində müxtəlif rəqəmlər və həndəsi fiqurların adları yazılmış lövhələr asılmış şagirdlər çıxdılar. Onlar riyaziyyat və informatika müəllimi, şair Vahid Aslanın həmin rəqəmlərə və fiqurlara həsr etdiyi şeirləri səsləndirdilər. Zalda əyləşmiş şagirdlər də proqrama qatılaraq tanınmış alim və filosofların riyaziyyata dair müdrik fikirlərini diqqətə çatdırdılar.

Gecədə çıxış edən məktəbin riyaziyyat və informatika müəllimi Vahid Aslan, təlim-tərbiyə işləri üzrə direktor müavini Mehparə Qurbanova və b. "Riyaziyyat aylığı"nın əhəmiyyətindən danışdılar, ekranda aylıq çərçivəsində aparılmış "açıq dərs"lərdən görüntülər nümayiş olundu.

V sinif şagirdlərindən bir qrupunun "Rəqəmlərin mübahisəsi" mövzusunda təqdim etdikləri əyləncəli kompozisiya, istedadlı şagirdlərdən birinin ifa etdiyi saz havası tədbir iştirakçılarında xüsusilə xoş ovqat yaratdı.

Aparıcının şairlər İlyas Tapdıq və Musa Ələkbərli haqqında ekranda görüntülərlə müşayiət olunan təqdimatından sonra söz qonaqlara verildi.  Tanınmış şair, uşaqların sevimlisi İlyas Tapdıq maraqlı çıxışlarına görə şagirdlərə təşəkkürünü, gecənin hazırlanmasında əməyi olanlara minnətdarlığını bildirdi. Fəaliyyət göstərdiyi qısa müddət ərzində məktəbin böyük inkişaf yolu keçdiyini qeyd edən şair burada yaradılan yüksək təhsil mühitində, əldə olunan uğurlarda məktəbin direktoru və müəllimlərinin böyük zəhmət payı olduğunu vurğuladı. Riyaziyyatın elmlərin şahı olduğunu deyən İlyas Tapdıq şagirdlərə bu elmi daha yaxşı öyrənməyi tövsiyə etdi. Sonra o, ölkəmizin görkəmli riyaziyyatçı alimlərinə həsr etdiyi şeirlərin yaranma şəraitindən söz açdı, "Hesab" şeirini və digər şeirlərini oxudu.

Şair Musa Ələkbərli də dəvət üçün minnətdarlıq edib, həyat və yaradıcılıq yolundan danışdı. Özünün poeziyaya gəlməsində və şair kimi formalaşmasında ustadı İlyas Tapdığın böyük rolu olduğunu bildirdi və çıxışını şeirlərini oxuması ilə bitirdi.

Gecədə qonaq qismində iştirak edən şairlər Hacı Salman Qazi, Hacı Loğman Qorqud, habelə Bakı Şəhəri üzrə Təhsil İdarəsi Metodik Mərkəzinin Sabunçu-Xəzər metodik bölməsinin müdiri Alı Məmmədov çıxışlarında riyaziyyatla poeziyanın vəhdətindən, riyaziyyatı öyrənməyin əhəmiyyətindən söz açdılar, şagirdlərə məktəbdə tədris olunan bütün elmlərin əsaslarına, o cümlədən riyaziyyata dərindən yiyələnməyi tövsiyə etdilər. Tədbirin təşkilini yüksək dəyərləndirib belə görüşlərin şagirdlərin yaddaşında dərin iz buraxdığını, onların tərbiyəsində mühüm rol oynadığını bildirdilər.

Yusif ƏLİYEV