İmişli RTŞ-dan redaksiyamıza daxil olan məlumatda bildirilir ki, Milli Kurikulumun tətbiqi yeni qiymətləndirmə sisteminin yaradılmasını zərurətə çevirib, "Ümumtəhsil məktəblərində məktəbdaxili qiymətləndirmənin aparılması qaydaları" hazırlanıb. 2012-2013-cü dərs ilindən ibtidai təhsil pilləsi ilə yanaşı ölkəmizin ümumu təhsil müəssisələrinin V siniflərində də yeni fənn kurikulumlarının tətbiqi həmin siniflərdə dərs deyənlərin, eləcə də bütün müəllimlərin bilik və məlumatlılıq səviyyələrinin artırılmasını və bu işə rəhbərliyin lazımi şəkildə qurulmasını tələb edir.

İmişli RTŞ-da ümumtəhsil məktəblərinin təlim-tərbiyə işləri üzrə direktor müavinlərinin iştirakı ilə həmin məsələnin müzakirəsinə həsr olunmuş "dəyirmi masa" keçirilib. İmişli Rayon Təhsil Şöbəsinin müdir müavini V.Tağıyev Azərbaycan Respublikasının Prezidenti cənab İlham Əliyevin təhsilimizə böyük önəm verdiyini, kurikulumun tətbiqinin mühüm mərhələyə qədəm qoyduğunu qeyd edərək, "dəyirmi masa"nın nəticəyönümlü kurikulumlarla işə, şagirdlərin təlim nəticələrinə, qiymətləndirmənin xüsusiyyətlərinə həsr olunduğunu bildirib.

Mövzu ətrafında çıxış edənlər yeni qiymətləndirmənin dəqiq müəyyənləşdirilmiş standartlara və meyarlara əsaslandığını vurğulayıblar.

İmişli RTŞ Metodik kabinetinin direktoru Sevdimalı Hüseynov son illər kurikulum və yeni qiymətləndirmə ilə bağlı metodik vəsait, praktik material və digər ədəbiyyatların nəşr edilib yerlərə çatdırılmasının böyük səmərə verdiyini, müəllimlər tərəfindən razılıqla qarşılandığını diqqətə çatdırıb.

İmişli şəhər 1 nömrəli məktəb-liseyin təlim-tərbiyə işləri üzrə direktor müavini, respublikanın əməkdar müəllimi Ş.Məmmədova, təhsil şöbəsinin aparıcı məsləhətçiləri Ə.Quliyev, A.Məmmədov, ibtidai siniflər üzrə metodist K.Məmmədova, direktor müavinləri Ş.Əmrahov, Q.Hümbətov, M.Orucov, A.Allahverdiyev, S.Süleymanov, B.Əmirov və başqaları qiymətləndirmənin aparılması ilə bağlı məktəblərdə görülən işlərdən, tətbiq edilən diaqnostik, formativ və summativ qiymətləndirmə formalarından, qabaqcıl müəllimlərin iş təcrübəsindən, qarşıya çıxan çətinliklərdən danışıblar.

Çıxışlarda summativ qiymətləndirmələrin aparılmasının planlaşdırılması və həyata keçirilməsi, sinif jurnalında gündəlik qeydlər, musiqi, təsviri incəsənət, texnologiya və informatika fənləri üzrə qiymətləndirmə formaları kimi aktual məsələlər ətrafında fikirlər səsləndirilib.

"Dəyirmi masa" iştirakçıları qiymətləndirmənin təlim prosesinin təşkili və təhsilin idarə olunmasında böyük əhəmiyyətə malik olduğunu, bu işə nəzarətin daim diqqət mərkəzində saxlanılmasının vacibliyini qeyd ediblər.  

ƏDALƏT