Yevlax ŞTŞ Metodmərkəzinin direktoru Xaləddin Niftəliyevin bizə ünvanladığı məlumatda bildirilir ki, bu günlərdə şəhər şahmat məktəbinin geniş foyesində şagirdlərin istedadından xəbər verən "Dünya uşaqların gözü ilə" adlı  sərgi açılıb.

Sərgidə şəhərin bütün məktəbəqədər tərbiyə müəssisələrinin, məktəblərin yaradıcı şagirdləri iştirak edib.

Tədbiri giriş sözü ilə Yevlax Şəhər İcra Hakimiyyəti təhsil, səhiyyə və mədəniyyət məsələləri şöbəsinin böyük məsləhətçisi Vaqif Əliyev açaraq, buraya seyrçi marağı ilə gələnləri salamlayıb və onları uşaqların yaradıcı dünyasına səyahətə dəvət edib.

Sərgidə nümayiş etdirilən balacaların əl işləri, məktəbli rəssamların daxili aləmlərini şərtləndirən, rəng çalarları ilə hiss və duyğularını əks etdirən al-əlvan tablolara baxış seyrçilərin sonsuz marağına səbəb olub. Bağça uşaqlarının kibritdən, kartondan, kağızdan, çubuqlardan, yüngül taxta materiallarından düzəltdiyi, rənglədiyi müxtəlif əşyalar, meyvələr, sevimli ev heyvanlarının, flora və faunamızın bəzəyi olan canlıların maketləri tamaşaçılar tərəfindən böyük maraqla qarşılanıb.

Həmin gün şahmat məktəbində kiçikyaşlı şahmatçıların qatıldığı yarışlara da start verilib. 

Ə.DAŞDƏMİRLİ