2006-cı ildən etibarən davamlı olaraq tətbiq edilən "Həyati bacarıqlara əsaslanan təhsil" kursu şagirdlər arasında sağlam həyat tərzini təbliğ edir. Kursun müəllimlər üçün nəzərdə tutulmuş dərsliklərində qarşılıqlı münasibət, xüsusən də bacarıqların inkişaf etdirilməsi vasitəsilə sağlam fərdi və fərdlərarası münasibət mühitinin yaradılmasına xidmət edən mövzulara toxunulmuşdur. Bundan başqa, dərslikdə sosial və sağlamlıq bölmələri də vardır ki, burada da uşaqların ictimai münasibətlərindən, hüquqlarının qorunması sahəsində  və sağlam inkişafı üçün lazımi şərait yaradılması, ailə və cəmiyyətin digər təbəqələri ilə düzgün dialoqun qurulmasından, uşaqların maraq dairəsindən, əqli, mədəni və sosial inkişaf səviyyəsindən, eləcə də gender problemlərinin mümkün həlli yollarından bəhs edilir.

Ümumilikdə bu təhsil təhsilin bütün pillələrində gənclərin sağlamlığı sahəsində yaranan problemlərin qarşısının alınmasına xidmət edir. Tam sağlam həyatı dərk edən, hüquq və vəzifələrini lazımi şəkildə yerinə yetirən, hər cür zərərli vərdişlərə qarşı mübarizə aparmağı, lazım gəldikdə özünə və yoldaşlarına yardım etməyi  bacaran şəxsiyyət yetişdirmək bu təhsilin əsas məqsədidir.

Bu gün "Həyati bacarıqlara əsaslanan təhsil" kursu Naxçıvan MR daxil olmaqla respublikamızın bütün regionlarını əhatə edir. Bakı şəhərində və rayonlarda  "Reproduktiv sağlamlıq", "Zərərli vərdişlər", "Sağlam rəqabəti necə qurmalı?" "YOX! demək bacarığı" mövzularında tədbirlər və "açıq dərs"lər keçirilməkdədir. Habelə Bakı, Gəncə, Sumqayıt və Mingəçevir kimi şəhərlərin orta məktəblərində  "1 dekabr - Beynəlxalq QİÇS-lə mübarizə günü"nə həsr olunmuş tədbirlər təşkil olunur.

Təhsil naziri Misir Mərdanovun müvafiq əmrinə əsasən "Həyati bacarıqlara əsaslanan təhsil" üzrə fakültativ kursun tədrisi ilə əlaqədar müəllimlərlə təlimlərin təşkili məqsədilə təlimçilər bölgələrə ezam olunurlar.

Bundan başqa, hazırda layihənin işçi qrupu "Həyati bacarıqlara əsaslanan təhsil" kursunun müəllimlər üçün nəzərdə tutulmuş vəsaitinin mövzularını təkrar işləmiş və yeni məlumatlarla zənginləşdirmişlər ki, bu da vəsaitin növbəti dəfə təkmilləşərək işıq üzü görməsi deməkdir. 

A.HACIYEVA,
Layihənin əlaqələndirmə  qrupunun direktoru