|
 Tofiq
Əliheydər oğlu Allahverdiyev 1917-ci ildə Bakı şəhərində
anadan olub. 1930-cu ildə Paris Kommunası adına zavodun
fabrikzavod məktəbinə daxil olub, qaynaqçı ixtisasına
yiyələnib. Komsomol təşkilatlarında seçkili vəzifələrdə
çalışıb, 1940-cı ildə Məşədi Əzizbəyov adına Azərbaycan
Sənaye İnstitutunu dağ mühəndisi ixtisası üzrə bitirib.
1942-ci ildə Azərbaycan LKGİ Bakı Şəhər Komitəsinin
katibi işləyib. Böyük Vətən müharibəsi illərində 390-cı
atıcı diviziyanın siyasi şöbəsində qulluq edib,
yaralandıqdan sonra ordudan tərxis edilib. 1942-1944-cü
illərdə Azərbaycan LKGİ MK-nın katibi seçilib. 1944-cü
ilin fevralından SSRİ Müdafiə Nazirliyi Kəşfiyyat
İdarəsinin Akademiyasında bir il təhsil alıb,
1945-1947-ci illərdə İranda, SSRİ konsulluğunda katib
işləyib.
1947-ci ildə Azərbaycan KP MK-nın şöbə müdirinin müavini,
1947-1948-ci illərdə şöbə müdiri vəzifələrində çalışıb.
1950-1952-ci illərdə Azərbaycan KP MK katibi, 1952-1953-cü
illərdə Gurganneft Trestinin rəis müavini, 1955-1961-ci
illərdə Bakı Şəhər PK-nın birinci katibi işləyib.
1953-1955-ci illərdə SSRİ Neft Sənayesi Akademiyasının
dinləyicisi olub. Azərbaycan SSR Ali Sovetinə deputat
seçilib.
Texnika elmləri namizədi, dosent Tofiq Allahverdiyev
1966-cı ildə Azərbaycan Dövlət Texniki Peşə Təhsili
Komitəsinin sədri təyin olunub. 1982-ci ilə qədər bu
vəzifədə çalışıb. Onun sədr işlədiyi dövrdə texniki peşə
məktəblərinin sayı 1,7 dəfə, şagirdlərin sayı 2 dəfə
artmışdı. 1966-1970-ci illərdə bu məktəblərdə 96,4 min
ixtisaslı fəhlə hazırlanıb.
Təkcə 1970-ci ildə Azərbaycanda fəaliyyət göstərən 76
texniki peşə məktəbində
150 peşə
üzrə 40,9 min şagird təhsil alıb. Texniki peşə
məktəblərində 594 kabinet,
100 laboratoriya, 285 tədris emalatxanası təşkil edilib.
Həmin dövrdə kənd texniki peşə məktəblərində 335 traktor,
93 taxılbiçən kombayn, 28 pambıqyığan maşın, 430 ədəd
müxtəlif kənd təsərrüfatı maşını olub.
Həmin dövrdə Azərbaycanda texniki peşə məktəblərinin
tədris-maddi bazasının ləng inkişaf etdiyi, ixtisaslı
fəhlə kadrları hazırlığının aşağı səviyyədə qurulduğu
nəzərə alınaraq (1971-1975-ci illər) 54 yeni texniki
peşə məktəbi, o cümlədən Ağdaş, Astara, Balakən,
Cəlilabad, Cəbrayıl, Yevlax, Beyləqan, Zəngilan, Zərdab,
Şərur, İmişli, İsmayıllı, Qubadlı, Laçın, Sabirabad,
Salyan, Tovuz, Ucar, Şəmkir, Şəki və Şuşada yeni texniki
peşə məktəbləri açılıb.
 İxtisaslı
fəhlələrin xarakterinin formalaşması və ideya-siyasi
cəhətdən yetkinləşməsi üçün
hərtərəfli iş aparılır, hər il şagirdlərin peşə
hazırlığı
vəziyyətini müəyyənləşdirmək
məqsədilə müvafiq yarışlar keçirilirdi. Estetik, etik,
vətənpərvərlik tərbiyəsi baxımından faydalı olan
rəngarəng tədbirlərin keçirilməsini pedaqoji
kollektivlər daim diqqət mərkəzində saxlayırdı.
İxtisaslı fəhlə kadrlarının hazırlanmasında qazanılmış
qabaqcıl təcrübənin öyrənilib ümumiləşdirilməsi və
yayılmasında, müəllimlərə
və istehsalat təlimi ustalarına yenilikləri mənimsəməkdə,
təlim-tərbiyə prosesini daha da təkmilləşdirmək
yollarını göstərməkdə komitənin orqanı olan "Gənc fəhlə
bülleteni" əhəmiyyətli rol oynayırdı.
Texniki peşə məktəbinin məzunlarından bir çoxu Sosialist
Əməyi Qəhrəmanı kimi yüksək ada layiq görülmüş,
istehsalatda xarüqələr yaratmış, SSRİ-nin orden və
medalları ilə təltif olunmuşdular. Texniki peşə
məktəblərinin onlarca müəllimi və istehsalat təlimi
ustası "Əməkdar müəllim", "Əməkdar usta" kimi adlara
layiq görülüb.
Öz işinin bilicisi olan Tofiq Allahverdiyev Azərbaycan
müəllimlərinin VIII qurultayındakı (20
yanvar 1967-ci il) çıxışında peşə təhsili sahəsində
müşahidə olunan nöqsanları yığcam şəkildə təsvir və
təhlil edib.
Tofiq Allahverdiyevin komitə sədri işlədiyi 1966-1982-ci
illəri texniki
peşə
təhsili sisteminin yüksəliş dövrü kimi səciyyələndirmək
olar. 1982-ci ilin əvvəllərində zəngin maddi-texniki
bazaya malik 182 texniki peşə məktəbi fəaliyyət göstərib.
Fəaliyyət göstərdiyi bütün sahələrdə bilik və bacarığını
əsirgəməyib, işinə
yaradıcı münasibət göstərib. Onun çoxillik əməyi "Şərəf
nişanı" (1944), iki "Qırmızı Əmək Bayrağı" (1958, 1971),
"İkinci dərəcəli Vətən müharibəsi" (1976), "Oktyabr
inqilabı" (1976) ordenlərinə, on bir medala layiq
görülüb.
1982-ci il oktyabrın 13-də komitə sədri vəzifəsindən
azad olunub.
Tofiq Allahverdiyev 1982-ci ildə dünyasını dəyişib.
***
Onu da qeyd edək ki, Tofiq Allahverdiyevin səhhətindəki
müəyyən problemlərlə bağlı tanınmış partiya işçisi
Zülfüqar Abdullayev bir il dörd ay Dövlət Texniki Peşə
Təhsili Komitəsinin sədri vəzifəsini icra edib. |
