31 dekabr - Dünya Azərbaycanlılarının Həmrəylik Günü və Yeni il bayramı münasibətilə Naxçıvan Müəllimlər İnstitutunun kollektivi  muxtar respublika ərazisində yerləşən "N" saylı hərbi hissəyə getmiş, vətən qarşısındakı müqəddəs xidməti borcunu yerinə yetirən zabit və əsgərlərlə görüşmüşdür. Ali təhsil ocağının rektoru, professor Oruc Həsənli əsgər və zabit heyətini salamlamış, orduya göstərilən dövlət qayğısından danışmışdır. Bildirilmişdir ki, hər bir dövlətin güvənc yeri, arxalandığı, ilk növbədə, onun güclü və qüdrətli  ordusudur. Bu səbəbdəndir ki,  Cənubi Qafqazda ən güclü ordu olan Azərbaycan ordusu hərtərəfli qayğı ilə əhatə edilib. Bu qayğının təməli isə ulu öndərimiz Heydər Əliyev tərəfindən  qoyulub.  Dahi öndərin ordu quruculuğu siyasətinin uğurla davam etdirilməsinin  nəticəsidir ki, ordumuz gündən-günə güclənir və hərbi qüvvətini artırır. Ərazi bütövlüyümüzü, müstəqilliyimizi qoruyan igid oğullarımız  da yaxşı bilirlər ki,  üstündə gəzdiyimiz bu torpaq bizə və onlara ata-baba əmanətidir. Bu müqəddəs əmanəti qorumaq, gələcək nəsillərə ərməğan etmək bugünkü gəncliyin  bir nömrəli vəzifəsidir.  Bu vəzifəni yerinə yetirmək torpağa, mənsub olduğu xalqa ən böyük sevginin ifadəsidir.

Bu gün fəxr etməyə mənəvi haqqımız çatır ki,  Azərbaycan Respublikası Silahlı Qüvvələri Ali Baş Komandanının əmrini gözləyən ordumuz işğal altında olan torpaqlarımızı tez bir zamanda azad etmək iqtidarındadır. Çünki onun xalqla sıx birliyi var. Ordumuzun bu səviyyəyə yüksəlməsində həmin amil də başlıca rol oynayır. Muxtar respublikamızın ərazisindəki  hərbi hissələrin timsalında bunu bütün aydınlığı ilə  görmək mümkündür. Naxçıvan Muxtar Respublikası  Ali Məclis sədrinin tez-tez hərbi hissələrdə olması, zabit və əsgərlərlə görüşməsi onlarda ruh yüksəkliyi yaradır, hərbiçilərin döyüş əzmini yüksəldir.

Bu gün düşmənlə həmsərhəd məntəqələrdə ictimaiyyətin nümayəndələrinin əsgərlərlə birlikdə bayramları qeyd etməsi isə onu göstərir ki, xalq öz ordusunun, ordu isə xalqın yanındadır və istənilən anda xalqın hər bir nümayəndəsi əlinə silah alıb, səngərlərdə keşik çəkməyə hazırdır.

Sonra gətirilmiş bayram sovqatı hərbiçilərə təqdim olunmuşdur. 

Naxçıvan Müəllimlər İnstitutunun Mətbuat xidməti