|
 Dekabrın
26-da Azərbaycan Təhsil İşçiləri Azad Həmkarlar
İttifaqı Respublika Komitəsinin təşkilatçılığı
ilə ali məktəb tələbələri arasında təşkil olunan
futzal yarışının və "Nə? Harada? Nə zaman?"
intellektual oyununun qaliblərinin
mükafatlandırılması mərasimi keçirildi.
Azərbaycan Həmkarlar İttifaqları
Konfederasiyasının akt zalında keçirilən tədbiri
konfederasiyanın sədri, millət vəkili Səttar
Mehbalıyev açaraq respublikamızda həyata
keçirilən gənclər siyasətindən danışdı.Qeyd
olundu ki, əsası ümummilli lider Heydər Əliyev
tərəfindən qoyulan və ölkə başçısı cənab İlham
Əliyevin rəhbərliyi ilə uğurla davam etdirilən
gənclər siyasəti Azərbaycan gəncliyinin sürətli
inkişafına təkan verir, respublikamızın qüdrətli
dövlətə çevrilməsi prosesini stimullaşdırır. Bu
gün çoxlu sayda azərbaycanlı gənc dünyanın
inkişaf etmiş ölkələrinin aparıcı ali
məktəblərində təhsil alır. Onların yüksək
ixtisaslı kadrlar kimi Vətənə dönərək fəaliyyət
göstərmələri üçün hər cür imkan və şərait
yaradılır.
Çıxışında ölkəmizdə gənclərlə bağlı digər
görülən işlər, həyata keçirilən tədbirlər barədə
də mərasim iştirakçılarına geniş məlumat verən
millət vəkili Səttar Mehbalıyev Azərbaycan
Təhsil İşçiləri Azad Həmkarlar İttifaqı
Respublika Komitəsinin gənclər siyasətinin fəal
iştirakçılarından biri olduğunu xüsusi vurğuladı.
Bildirildi ki, gənclərə diqqət və qayğı öz
sıralarında on minlərlə gənci birləşdirən
təşkilatın əsas fəaliyyət istiqamətlərindən
birini təşkil edir. ATİAHİ Respublika Komitəsi
tərəfindən hər il gənclərlə festivallar,
spartakiadalar, elmi-praktik konfranslar, fənn
olimpiadaları, inşa müsabiqələri, müxtəlif idman
yarışları keçirilir, istedadlı gənclərin üzə
çıxarılması və onların potensial imkanlarının
genişləndirilməsi, habelə sosial problemlərinin
həlli ilə bağlı tədbirlər təşkil olunur.
Sədr S.Mehbalıyev daha sonra keçirilən tədbir
barədə məlumat verərək ATİAHİ Respublika
Komitəsinin 5 ildən artıqdır ki, respublikamızın
ali təhsil müəssisələrinin tələbələri arasında
futzal yarışının və "Nə? Harada? Nə zaman?"
intellektual oyununun keçirilməsini təmin
etdiyini bildirdi. Hər il yarışın qalibləri
Respublika Komitəsi tərəfindən mükafatlandırılır.
Bu il keçirilən futzal üzrə yarışda I yeri
Azərbaycan Dövlət Pedaqoji Universiteti, II yeri
Azərbaycan Dövlət Aqrar Universiteti, III yeri
Azərbaycan Dövlət İqtisad Universiteti tutub. "Nə?
Harada? Nə zaman?" intellektual oyununun
qalibləri isə Bakı Dövlət Universiteti,
Azərbaycan Dövlət İqtisad Universiteti və
Azərbaycan Dövlət Neft Akademiyasının
komandalarıdır.
Səttar Mehbalıyev hər iki yarışın qalibi olan
tələbələri əldə etdikləri uğur və qarşıdan gələn
31 dekabr- Dünya Azərbaycanlılarının Həmrəylik
Günü, Yeni il münasibəti ilə təbrik edərək
onlara ən xoş istəklərini çatdırdı.
Sonda qaliblərə diplom və hədiyyələr təqdim
olundu.
Samirə KƏRİMOVA |
