|
 Bakıdakı
28 nömrəli tam orta məktəbin "Azəri" və "Qarabağ"
komandaları arasında 31 dekabr - Dünya
Azərbaycanlılarının Həmrəylik Gününə həsr
olunan "Şən startlar" intellektual, əyləncəli
idman yarışı keçirildi. Tədbiri giriş sözü ilə
açan məktəbin direktoru Mehriban Əlizadə
əlamətdar bayram münasibətilə qonaqları təbrik
etdi. M.Əlizadə ölkə başçısı cənab İlham
Əliyev tərəfindən idmana göstərilən diqqət və
qayğıdan bəhs edərək, idmanın bütün sahələrində
qazanılan uğurlarından, əldə olunan
nailiyyətlərin günü-gündən artmasını diqqətə
çatdırdı. Qeyd etdi ki, istər paytaxtımızda,
istərsə də regionlarda idmançılarımız üçün hər
cür şərait yaradılıb. Məktəbdə böyüməkdə olan
gənc nəslin fiziki tərbiyəsi, onların sağlam
inkişaf etməsi diqqətdə saxlanılan ən ümdə
məsələlərdəndir. Şagirdlər arasında keçirilən
bugünkü yarışda uşaqlar istedad və bacarıqlarını
nümayiş etdirəcəklər.
Sonra Dövlət himni səsləndi."Azərbaycan"
mahnısının sədaları altında hər iki komandada
10 şagird olmaqla sıraya düzüldülər. Fiziki
tərbiyə müəllimi Səriyyə Süleymanova yarışın
başlanmasına start verdi.
İki saat davam edən estafet yarışında
komandalar dözümlülük, cəldlik, çeviklik
bacarıqlarını fəal yerinə yetirərək, müxtəlif
idman növləri üzrə oyun nümayiş etdirdilər. "Azəri"
komandası 28 xal toplayaraq qalib adını qazandı.
Münsiflər heyəti komandalar arasında keçirilən
idman yarışını yüksək dəyərləndirdi. Onlara,
bütün idmansevərlərə yeni-yeni uğurlar
arzuladı. Azərbaycan idmanının şərəfini
ləyaqətlə qoruyub saxlamağı, vətənə layiqli
vətənpərvər övlad olmağı tövsiyə etdilər.
Müxtəlif yarışlarda yeniyetmə idmançılarımızı
fəxri kürsünün ən yüksək pilləsində durmağa,
vətənə qızıl, gümüş və bürünc medallarla
dönməyə, müxtəlif yarışlarda bacarıq və
məharətlərini ustalıqla nümayiş etdirməyə
çağırdılar.
Mərasimin sonunda məktəbin direktoru Mehriban
Əlizadə, müavini Nərminə Aşurova komandalara
gələcək idman yarışlarında daha böyük qələbələrə
imza atmağı, təhsil ocağının adını uca tutmağı
arzuladılar.Tədbirin hazırlanmasında əməyi olan
fiziki tərbiyə müəllimləri Səriyyə
Süleymanovaya və Xəyalə İbişovaya
təşəkkürlərini bildirdilər. Qeyd etdilər ki,
torpaqlarımızın 20 faizi işğal altında
qaldığı bir vaxtda təhsil ocaqlarında idman
yarışlarının keçirilməsi, yeniyetmələrin fiziki
hazırlığının yüksək səviyyədə olması vacib
şərtlərdən biridir.
Sonda " Şən startlar" üzrə 6-cı və 7-ci sinif
şagirdləri arasında keçirilən məktəbin açıq
birinciliyində qələbə qazanan komandanın
üzvlərinə diplom və hədiyyələr təqdim olundu.
Sifai SƏFƏROVA |
