|
 Dekabrın
19-da Azərbaycan Dillər Universitetində
Azərbaycanın xalq yazıçısı, dramaturq,
ədəbiyyatşünas və publisist, Sosialist Əməyi
Qəhrəmanı, Azərbaycan Respublikasının Dövlət
mükafatları laureatı, akademik Mirzə İbrahimovun
100 illik yubileyinə həsr olunmuş elmi-praktik
konfrans keçirildi. Tədbirdə Azərbaycan
Respublikasının təhsil naziri Misir Mərdanov,
millət vəkilləri, Təhsil Nazirliyinin müvafiq
şöbəsinin və AMEA-nın əməkdaşları, ADU-nun
professor-müəllim və tələbə heyəti, yubilyarın
ailə üzvləri və KİV təmsilçiləri iştirak
edirdilər.
Konfransı giriş sözü ilə açan təhsil naziri
Misir Mərdanov qeyd etdi ki, dövlət başçısı
cənab İlham Əliyevin müvafiq sərəncamına əsasən
xalq yazıçısı Mirzə İbrahimovun 100 illik
yubileyi ilə bağlı bir sıra dövlət qurumlarında
və təhsil müəssisələrində silsilə tədbirlər
keçirilir və bu konfrans həmin tədbirlərdən
biridir.
Gənclərin bu tədbirdə iştirakının sevindirici
fakt olduğunu vurğulayan təhsil naziri giriş
sözündə görkəmli yazıçının həyatı, təhsili,
ictimai-siyasi fəaliyyəti, bədii və
publisistik yaradıcılığından ətraflı bəhs etdi,
onunla bağlı xatirələrindən söz açdı.
M.İbrahimovun bütün həyatı boyu Azərbaycan
dilinin dövlət dili statusu qazanması uğrunda
mübarizə apardığı diqqətə çatdırıldı.
ADU-nun Azərbaycan ədəbiyyatı kafedrasının
müdiri, dosent Fəridə Səfiyeva Mirzə İbrahimovun
ədəbi-bədii yaradıcılığı haqqında geniş məruzə
etdi. Məruzədə qeyd olundu ki, maraqlı nəsr
əsərlərinin müəllifi kimi tanınsa da, Mirzə
İbrahimovun çox gözəl dram əsərləri də mövcuddur
və məhz bu əsərlər onun Azərbaycan ədəbiyyatında
bir dramaturq kimi də önəmli yerini
müəyyənləşdirib.
Məruzədən sonra yazıçının həyatının müxtəlif
məqamları əks olunmuş fotoşəkillərdən ibarət
slaydlar nümayiş etdirildi.
Azərbaycan Yazıçılar Birliyinin sədri, xalq
yazıçısı Anar Mirzə İbrahimovun bədii və ictimai
fəaliyyətinin əhəmiyyətindən, geniş oxucu
kütləsinin az bələd olduğu publisistik
əsərlərinin dəyərindən, onun xidmətləri
sayəsində Cənubi və Şimali Azərbaycanın vəhdət
şəklində qavranılması və s. məsələlərdən söz
açdı.
Mədəniyyət və turizm nazirinin birinci müavini
Vaqif Əliyev belə görkəmli şəxsiyyətlərin,
yaradıcı insanların, elm və sənət adamlarının
yubileylərinin dövlət səviyyəsində qeyd
edilməsini onlara göstərilən xüsusi diqqət və
qayğının parlaq nümunəsi kimi dəyərləndirdi.
Mirzə İbrahimovun çox məhsuldar yazıçı olduğunu
deyən natiq onun tərcüməçilik fəaliyyəti ilə də
məşğul olduğunu, dünya ədəbiyyatının məşhur
əsərlərini dilimizə çevirdiyini diqqətə çatdırdı.
Vaqif Əliyev çətin, amma şərəfli həyat yolu
keçən Mirzə İbrahimovun qəlblərdə daim
yaşayacağına əminliyini ifadə etdi.
Xalq şairi, millət vəkili Sabir Rüstəmxanlı qeyd
etdi ki, bir insan öz xalqı üçün nə etməyə
qadirdirsə, Mirzə müəllim onu edib. O, çox böyük
alim, istedadlı yazıçı, hamıya yaxşılıq etməyi
özünə borc bilən qayğıkeş insan, dünyada tanınan
ictimai xadim, ən başlıcası isə, ana dilinin
dövlət dili statusu qazanması uğrunda mübarizə
aparan qəhrəman idi. Ona görə ki, həmin dövrdə
bu, son dərəcə böyük cəsarət, qəhrəmanlıq tələb
edirdi.
Sonra çıxış üçün söz yazıçının qızı, xalq
artisti, bəstəkar Sevda İbrahimovaya verildi.
Atasının çox sadə, səmimi bir insan olmasından
bəhs edən Sevda xanım dedi ki, o, ağır, çətin
günlər yaşasa da ürəyi məhəbbətlə dolu idi.
Əməyi, sadə insanları, xüsusilə gəncləri çox
sevirdi. Bir yazısında "Bütün həyatımı, bütün
əsərlərimi sizə ithaf edirəm" deyə gənclərə
xitab etmişdi.
Yazıçının qızı çıxışının sonunda atasını xoş
sözlər və kövrək duyğularla yad edən hər bir
kəsə, atasının yubileyinin keçirilməsi ilə bağlı
sərəncam vermiş dövlət başçısına, tədbirin
təşkilatçılarına, eləcə də iştirakçılara
minnətdarlıq etdi.
ADU-nun rektoru, millət vəkili Səməd Seyidov bu
görkəmli şəxsiyyətin yubileyinin rəhbərlik
etdiyi təhsil ocağında keçirilməsini əlamətdar
hadisə adlandırdı və kollektiv adından tədbirdə
iştirak edənlərə təşəkkürünü bildirdi.
Hicran ƏKBƏROVA |
|
