|
 Bu
günlərdə sağlamlıq imkanları məhdud uşaqlar üçün
1 nömrəli xüsusi internat-məktəbdə "İnkişaf və
İnkluziya üçün idman" layihəsinin həyata
keçirilməsi ilə əlaqədar tədbir keçirildi.
Mərasim iştirakçılarını salamlayan məktəbin
direktoru Tanrıverdi Əliyev qonaqları - Bakı
Tennis Akademiyasının aparıcı idmançıları,
dördqat Azərbaycan çempionu Kamilə Fərhadı,
çempionatın ikincisi olan Ayxan Manaflını və
onların məşqçisi İrakliy Uşanqişvilini,
Britaniya mütəxəssisləri tərəfindən təlim keçmiş
və bu layihənin aparıcı idman mütəxəssisləri
Vəli Musayevi və Emil Qaybalıyevi uşaqlara
təqdim etdi. O bildirdi ki, bu idman
mütəxəssisləri 1 nömrəli internat-məktəbdən
Nurəddin Tağıyev, Füzuli Rzayev və Bayram
Allahverdiyev, 3 nömrəli internat-məktəbdən isə
Günay Ağayeva, Vüsalə Həsənova, Gülnar Hüseynova
və ümumilikdə 50 nəfər fiziki tərbiyə müəllimi
və tərbiyəçilər üçün bir ildir ki, müasir təlim
kursları keçiblər. Artıq onlar da hər iki
məktəbdə aparıcı təlimçilər kimi çalışır və
uşaqların cəmiyyətə qatılması üçün uğurlu
fəaliyyət göstərirlər.
Sonra Milli Olimpiya Komitəsinin Beynəlxalq
Proqramlar üzrə mütəxəssisi Mehman Kərimov "İnkişaf
və İnkluziya üçün idman" layihəsinin
əhəmiyyətindən danışaraq bildirdi ki, idman
yalnız əmək qabiliyyətli insanların deyil, eyni
zamanda sağlamlıq imkanları məhdud olan
insanların da inkişaf və inkluziya prosesinə
töhfə verməsinə imkan yaradan nadir
xüsusiyyətlərə malikdir.
Qeyd edildi ki, Təhsil Nazirliyi, Milli Olimpiya
Komitəsi, "İnkişaf naminə idman" İctimai
Birliyinin dəstəyi ilə xüsusi qayğıya ehtiyacı
olan uşaqların həyatını dəyişmək üçün idman,
bədən tərbiyəsi və oyunların gücündən istifadə
etmək məqsədi daşıyan "İnkişaf və İnkluziya üçün
idman" layihəsi hazırlanıb. Odur ki, idman və
bədən tərbiyəsini digər qeyri-idman bacarıqları
- sosial bacarıqların inkişafı komponentləri ilə
birləşdirərək bu layihə çərçivəsində nəzərdə
tutulmuş Bakı şəhər 1 və 3 nömrəli xüsusi
internat müəssisələrində uşaqların bacarıqlarını
gücləndirmək, fərdi potensiallarını üzə çıxarmaq,
o cümlədən onların cəmiyyətə inteqrasiya olunmaq
imkanlarını genişləndirməyə çalışmaqdır.
Həmin gün Bakı Tennis Akademiyasının aparıcı
idmançıları və onların məşqçiləri 1 və 3 nömrəli
xüsusi internat-məktəblərin uşaqları üçün xüsusi
ustad dərsi (tennis üzrə açıq dərs) keçdilər. Bu
oyunun incəliklərini onlara başa saldılar.
Tennisə maraq göstərən hər bir uşaqla oyun
nümayiş etdirdilər.
Sonda 3 nömrəli internat-məktəbdə olduğu kimi, 1
nömrəli internat-məktəbdə də tennis dərnəyi
yaradıldı və ən perspektivli 7 uşaq seçilərək
dərnəyə üzv yazıldı. Həmin uşaqlarla sözugedən
layihəyə əsasən gündəlik məşqlərdən əlavə
aparıcı tennis mütəxəssisləri tərəfindən
vaxtaşırı məşqlər aparılması nəzərdə tutulur. O
da qeyd edildi ki, yazda 1 və 3 nömrəli
internat-məktəbləri arasında tennis yarışları
keçiriləcək, qalib komanda mükafatlandırılacaq.
Ədalət DAŞDƏMİRLİ |
