|
Naxçıvan Dövlət Universitetində Azərbaycan
xalqının ümummilli lideri Heydər Əliyevin
xatirəsinə həsr olunmuş elmi konfrans keçirilib.
"Heydər Əliyev və müasir Azərbaycan" mövzusunda
elmi konfransda əvvəlcə ümummilli liderin
xatirəsi bir dəqiqəlik sükutla ehtiramla yad
edilmişdir. Tədbiri giriş sözü ilə Naxçıvan
Dövlət Universitetinin rektoru, akademik İsa
Həbibbəyli açaraq ulu öndər Heydər Əliyevin
dünya siyasət tarixində nadir şəxsiyyətlərdən
olduğunu vurğulamış, ulu öndərin Azərbaycanın
milli müstəqilliyinin qorunmasında, beynəlxalq
sferada tanınmasında misilsiz xidmətlərindən
danışmışdır. Millət vəkili qeyd etmişdir ki,
məhz bu dahi şəxsiyyətin parlaq siyasəti
nəticəsində azərbaycançılıq məfkurəsi müstəqil
dövlətimizin ümummilli ideologiyasına çevrilmiş,
milli ziyalılıq, milli birlik formalaşmışdır.
Dahi öndər Azərbaycanı ən çətin zamanlarda məhv
olmaq təhlükəsindən xilas etmiş, ölkənin
hərtərəfli inkişafına nail olmuşdur. Heydər
Əliyevin məqsədyönlü uğurlu siyasətinin
Prezident İlham Əliyev tərəfindən layiqincə
davam etdirilməsi vurğulandı.
Sonra beynəlxalq münasibətlər kafedrasının
müdiri, fəlsəfə doktoru, dosent Yusif Hüseynov "Heydər
Əliyev və Azərbaycanın xarici siyasəti", Sosial
İdarəetmə və hüquq fakültəsinin dekanı, fəlsəfə
doktoru, dosent Qərib Allahverdiyev "Heydər
Əliyev və azərbaycançılıq ideologiyası",
Mühasibat uçotu və maliyyə kafedrasının müdiri,
iqtisad elmləri doktoru Teymur Abbasov "Heydər
Əliyev və Azərbaycan iqtisadiyyatı",
universitetin Elmi kitabxanasının direktoru,
filologiya üzrə fəlsəfə doktoru Aypara Behbudova
"Heydər Əliyev və Azərbaycan ədəbiyyatı",
universitet gənclər təşkilatının sədri, magistr
Arzu Abdullayev "Heydər Əliyev və Azərbaycan
gəncliyi" mövzusunda məruzələr etmişlər.
Məruzələrdə ümummilli liderin daxili və xarici
siyasətinin uğurlarından, Azərbaycan
iqtisadiyyatının, elm və təhsilinin,
mədəniyyətinin tərəqqisindəki əvəzsiz rolundan
danışılmışdır. Tədbirin sonunda Azərbaycan
Respublikasının əməkdar incəsənət xadimi Vasif
Allahverdiyevin "Ömür yolu" simfonik poeması
əsasında hazırlanmış film nümayiş etdirilmişdir.
M.SULTAN |
|
