|
 Dekabrın
1-də Bakıdakı "Park İNN" otelində "Biliyə
əsaslanan cəmiyyətdə müəllimlərin
kompetensiyaları: siyasət, pedaqogika, sosial
vərdişlər" mövzusunda beynəlxalq konfrans öz
işinə başladı. Tədbirin təşkilatçıları YUNESKO,
Azərbaycan Respublikası Təhsil Nazirliyi, Rabitə
və İnformasiya Texnologiyaları Nazirliyidir.
Konfransın Azərbaycanda keçirilməsinin
təşəbbüskarı YUNESKO-nun Təhsildə İnformasiya
Texnologiyaları İnstitutudur.
Konfransın əsas məqsədi biliyə əsaslanan
cəmiyyətdə müəllimlərin başlıca kompetensiyaları
(İKT, pedaqoji və sosial kompetensiyalar)
əsasında onların peşəkar inkişafı ilə bağlı
strategiya, istiqamət və təcrübə ətrafında fikir
mübadiləsinin aparılmasıdır. Konfransda təhsil
nazirinin müavini Qulu Novruzov, rabitə və
informasiya texnologiyaları nazirinin müavini
Elmir Vəlizadə, YUNESKO-nun Təhsildə İnformasiya
Texnologiyaları İnstitutunun direktoru Dendev
Badarç, 20-dən çox beynəlxalq ekspert və 60
yerli mütəxəssis iştirak edirdi. Ekspertlər
Rusiya, Malayziya, Slovakiya, Finlandiya,
Niderland, Ukrayna, İtaliya, Turkiyə, Litva və
Belarusu təmsil edirlər.
Qeyd edək ki, YUNESKO-nun Təhsildə İnformasiya
Texnologiyaları İnstitutunun (TİTİ) əsas
məqsədlərindən biri təhsildə informasiya və
kommunikasiya texnologiyalarının tətbiqi üzrə
proqramların işlənib hazırlanmasına və
reallaşdırılmasına dəstək göstərmək, həm bütün
dünyanın, həm də ayrı-ayrı ölkələrin tələblərinə
istiqamətlənən proqramlar həyata keçirməkdir. Öz
statusu və funksiyaları çərçivəsində TİTİ bütün
səylərini təhsil və tədrisə yardım imkanlarının
genişləndirilməsi, informasiya texnologiyaları
sahəsində milli potensialın gücləndirilməsi,
təhsildə rəqəmsal qeyri-bərabərliyin aradan
qaldırılması və hamının təhsil ala biləcəyi
cəmiyyətin formalaşmasına dəstək göstərilməsi
istiqamətinə yönəldir.
TİTİ həmçinin texniki peşə təhsili sahəsində İKT-nin
tətbiqi üzrə geniş təcrübə toplayıb. 2001-ci
ildə institut tərəfindən "Texniki peşə
təhsilində informasiya və kommunikasiya
texnologiyaları" layihəsi həyata keçirilib və bu
istiqamətdə bir sıra mühüm nəticələr əldə edilib.
Tədbiri giriş sözü ilə açan təhsil nazirinin
müavini Qulu Novruzov öncə konfrans
iştirakçılarını təhsil naziri Misir Mərdanovun
adından salamlayaraq ölkəmizdə İKT-nin və digər
sahələrin inkişafında mühüm rol oynayacaq
konfransın əhəmiyyətindən danışdı. Bildirdi ki,
Azərbaycanın inkişaf strategiyasının yerinə
yetirilməsi məqsədilə dünyanın ən qabaqcıl
təcrübəsinin öyrənilməsi və təhsildə daha
səmərəli, effektiv tətbiqi üçün sistemli olaraq
bir çox proqram və layihələr reallaşdırılır.
Son illər İKT-nin tətbiqi ilə bağlı kadrların
hazırlanması, elektron təhsil və elektron
idarəetmənin həyata keçirilməsi nəticəsində bir
çox uğurların əldə edildiyini vurğulayan təhsil
nazirinin müavini Qulu Novruzov "2008-2012-ci
illərdə Azərbaycan Respublikasının təhsil
sisteminin informasiyalaşdırılması üzrə Dövlət
Proqramı" çərçivəsində görülən işlər haqqında
məlumat verdi.
Tədbirdə çıxış edən rabitə və informasiya
texnologiyaları nazirinin müavini Elmir Vəlizadə
qloballaşan cəmiyyətimizdə təhsilin inkişaf
etdirilməsində İKT-nin xüsusi əhəmiyyət kəsb
etdiyini iştirakçıların nəzərinə çatdırdı.
E.Vəlizadə son illər respublikamızda bütün
sahələrin dinamik inkişaf etdiyini vurğulayaraq
belə konfransların keçirilməsini təqdirəlayiq
hal kimi qiymətləndirdı.
YUNESKO-nun Təhsildə İnformasiya Texnologiyaları
İnstitutunun direktoru Dendev Badarç çıxış
edərək bildirdi ki, müəllimlər İKT-dən səmərəli
şəkildə istifadə etməlidirlər. İKT-nin
tətbiqində bacarıqlı müəllimlərin xüsusi rol
oynadığını nəzərə çatdıran Dendev Badarç qeyd
etdi ki, tədrisin əsas komponenti müəllim-şagird
münasibətləridir. Bu münasibətlərin inkişaf
etdirilməsi və daha effektiv olmasında onlayn və
virtual tədrisin xüsusi rolu var.
Tədbirin plenar iclasında Azərbaycan
Respublikası Müəllif Hüquqları Agentliyinin
sədri Kamran İmanov, Distant Təhsil üzrə Milli
Mərkəzin təhsil üzrə direktoru, YUNESKO-nun
Təhsildə İnformasiya Texnologiyaları
İnstitutunun İdarəetmə Şurasının sədri Bernard
Kornü, Rusiya Elmlər Akademiyasının Kompüter
Mərkəzinin baş elmi işçisi, YUNESKO-nun Təhsildə
İnformasiya Texnologiyaları İnstitutunun
eksperti Aleksandr Uvarovun və başqalarının
müxtəlif mövzularda məruzələri dinlənildi.
Tədbir plenar iclaslar və müəllimlərin İKT
sahəsində kompetensiyaları, açıq təlim
resursları və peşə təhsilinin inkişafı mövzuları
üzrə işçi qruplarda müzakirələr aparılmaqla
davam etdirildi.
Konfrans dekabrın 2-də öz işini davam etdirəcək.
Niyazi RƏHİMOV |
