|
Bu günlərdə Qobustan rayonu Ərəbqədim kənd tam
orta məktəbində dahi şairimiz Mirzə Ələkbər
Sabirə həsr olunmuş tədbir keçirildi. Məktəbdə
fəaliyyət göstərən "Sabir" ədəbi məclisi
tərəfindən təşkil edilmiş tədbiri giriş sözü ilə
açan məktəbin direktoru Rüsxət Bəzirov böyük söz
ustadı, ictimai satiramızın banisi M.Ə.Sabirin
həyat və fəaliyyəti haqqında məruzə ilə çıxış
etdi.
Çıxışlarda dahi şairimiz M.Ə.Sabirin
yaradıcılığının müxtəlif dövrləri haqqında
ətraflı məlumatlar verildi. Satiramızın ustadı,
ölməz sənətkarımız Mirzə Ələkbər Sabirin
müəllimlik fəaliyyəti haqqında danışan BDU-nun
professoru, yazıçı Əmirxan Xəlilovun çıxışı
tədbir iştirakçıları tərəfindən rəğbətlə
qarşılandı.
Məktəbin XI sinif şagirdlərinin dahi şairin "Hophopnamə"sinə
həsr etdikləri səhnəciklər, şeirlərindən
söylədikləri nümunələr tədbiri daha maraqlı etdi.
Sonda tədbir iştirakçıları şairin Şamaxı
şəhərindəki məzarını ziyarət etdilər. Büstü
önünə gül-çiçək dəstələri qoydular, ruhuna
dualar oxudular.
Zaur FATEH,
Qobustan rayonu Ərəbqədim
kənd tam orta məktəbinin təlim-tərbiyə
işləri üzrə direktor müavini |
