|
 Oktyabrın
31-də Azərbaycan Dillər Universitetində
filologiya fakültəsinin tələbələri arasında
keçirilən xalq yazıçısı Mirzə İbrahimovun 100
illik yubileyinə həsr olunmuş inşa müsabiqəsinin
nəticələri ilə bağlı tədbir keçirildi. ADU-nun
filologiya fakültəsinin dekanı Fikrət Cahangirov
çıxış edərək xalq yazıçısı Mirzə İbrahimovun
ədəbi fəaliyyətindən, gənc nəslin tərbiyəsində,
eləcə də Azərbaycan dilinin inkişafında
göstərdiyi xidmətlərdən söz açdı. "Mirzə
İbrahimov və dil məsələləri", "Mirzə İbrahimovun
ədəbi-bədii yaradıcılığı" və "Mirzə İbrahimov -
ictimai-siyasi xadim kimi" mövzularında
keçirilən müsabiqəyə toxunan dekan bildirdi ki,
təqdim olunan 100-ə yaxın yazıdan qiymətləndirmə
komissiyası 14 yazını mükafata layiq görüb.
Qalib tələbələrdən Məhəbbət Hacıyeva, Flora
Zərbəliyeva, Aynur İsmayılova və magistr Mətanət
Atakişiyeva isə çıxışlarında M.İbrahimovun
Azərbaycan ədəbiyyatının və dilinin inkişafına
verdiyi töhfələrdən danışdılar. Tələbələr xalq
yazıçısının yaradıcılığında azadlıq məfhumuna
daha çox yer verdiyini qeyd etdilər.
ADU-nun tərbiyə işləri üzrə prorektoru Ələddin
Əliyev filologiya fakültəsinin tələbələrinin
inşa müsabiqəsində uğurlu çıxışlarından məmnun
olduğunu bildirdi. O, mədəni-kütləvi, ədəbi
yaradıcılıq tədbirlərinin təşkilində filologiya
fakültəsinin xüsusilə fərqləndiyini tədbir
iştirakçılarının nəzərinə çatdırdı.
M.İbrahimovun xidmətlərindən söz açan Ə.Əliyev
tələbələrə gələcək fəaliyyətlərində uğurlar
arzuladı.
Azərbaycan dilçiliyi kafedrasının müdiri,
professor Adil Babayev isə xalq yazıçısının
ictimai-siyasi fəaliyyətindən danışdı. O, Mirzə
İbrahimovun istər ictimai, istərsə də siyasi
fəaliyyətində azadlıq axtarışında olduğunu və
Azərbaycan dilinin kənar təsirlərdən
qorunmasında mübarizlik göstərdiyini vurğuladı.
Sonda mövzular üzrə qalib olan 14 tələbə
mükafatlandırıldı. Qaliblərə diplom və
hədiyyələr təqdim olundu.
ADU-nun Mətbuat xidməti |
