|
 Noyabrın
2-də Bakıdakı "Hyatt Regency" otelinin Quba
zalında Dövlət Neft Fondunun təşkilatçılığı ilə
Azərbaycan Respublikasının dövlət
müstəqilliyinin bərpasının 20-ci ildönümünə həsr
edilmiş "Milli neft strategiyasında Dövlət Neft
Fondunun yeri və rolu" mövzusunda konfrans
keçirildi.
Tədbirdə Azərbaycan Respublikasının hökumət
nümayəndələri, ölkəmizdə fəaliyyət göstərən
xarici ölkələrin səfirləri, beynəlxalq
təşkilatların, neft-qaz hasilatı sənayesində
çalışan xarici və yerli şirkətlərin, qeyri-hökumət
təşkilatlarının təmsilçiləri, müstəqil
ekspertlər iştirak edirdilər.
Konfransı Azərbaycan Respublikası Dövlət Neft
Fondunun icraçı direktoru Şahmar Mövsümov açaraq
Azərbaycanın milli sərvəti olan qara qızıldan
əldə olunan gəlirlərin toplanması, idarə
edilməsi və bu vəsaitlərin gələcək nəsillərə
çatdırılması məqsədilə xalqımızın ümummilli
lideri Heydər Əliyevin müdrik qərarı ilə təsis
edilmiş Dövlət Neft Fondunun fəaliyyəti barədə
geniş məlumat verdi. Dövlət Neft Fondunun ildən-ilə
vəsaitinin artdığını deyən icraçı direktor bunun
Azərbaycanın maliyyə potensialının və bütövlükdə
ölkənin iqtisadi qüdrətinin artması demək
olduğunu bildirdi. Şahmar Mövsümov daha sonra
rəhbərlik etdiyi qurumun respublika
iqtisadiyyatının inkişafında və bir sıra
sosialyönümlü layihələrin icrasında yaxından
iştirak etdiyini bildirərək bununla bağlı
görülən işlərdən, həyata keçirilən tədbirlərdən
ətraflı bəhs etdi.
Sonra konfrans öz işini "Dövlət Neft Fondu
milli neft strategiyasının ayrılmaz hissəsi kimi",
"Neft Fondunun investisiya siyasəti: əsas
prinsiplər, mövcud istiqamətlər və gələcək
prioritetlər", "Dövlət Neft Fondunun
maliyyələşdirdiyi layihələr: məqsəd və nəticələr",
"Mineral Ehtiyatların Hasilatı ilə Məşğul olan
Sənaye Sahələrində Şəffaflıq Təşəbbüsünün (MHŞT)
tətbiqi: nailiyyətlər və gələcəyə baxış"
mövzularında 4 sessiyada davam etdirdi.
Sessiyalarda müxtəlif məsələləri əhatə edən
çoxsaylı məruzələr dinlənildi. Çıxış edənlər
milli neft strategiyasında Dövlət Neft Fondunun
yeri və rolundan, ölkəmizdə fəaliyyət göstərən
yerli və beynəlxalq qurumlarla işgüzar
əməkdaşlığından söz açdılar.
3-cü sessiyada Azərbaycan Respublikasının təhsil
naziri Misir Mərdanov "Azərbaycan gənclərinin
xaricdə təhsili üzrə Dövlət Proqramı - qara
qızılın insan kapitalına çevrilməsi mexanizmi
kimi" mövzusunda məruzə etdi. Nazir öncə
ölkəmizdə həyata keçirilən milli neft
strategiyasının müsbət nəticələrindən danışaraq
Dövlət Neft Fondunun bu istiqamətdəki şəffaf
fəaliyyətini xüsusi vurğuladı. Ulu öndər Heydər
Əliyevin azərbaycanlı gənclərin xaricdə təhsil
almalarına hər zaman xüsusi önəm verməsindən
söz açan təhsil naziri bu işin ölkə başçısı
cənab İlham Əliyev tərəfindən uğurla davam
etdirildiyini söylədi. Qeyd olundu ki, bu gün də
Azərbaycandan kənarda yüksək ixtisaslı kadrların
hazırlanması istiqamətində ümummilli lider
tərəfindən həyata keçirilmiş siyasət daha geniş
coğrafiyada və dünyanın ən qabaqcıl ali təhsil
və elm müəssisələrinə göndərilməsi ilə davam
etdirilir. Belə ki, respublika Prezidenti cənab
İlham Əliyevin rəhbərliyi ilə Azərbaycan
xalqının ilahi sərvəti olan "qara qızılının
insan kapitalına çevrilməsi" siyasəti uğurla
reallaşdırılır. Azərbaycanlı gənclərin ölkəmiz
üçün zəruri ixtisaslar üzrə xaricdə təhsil
almalarını və ölkənin inkişafının mühüm amilinə
çevrilmələrini təmin etmək məqsədilə Təhsil
Nazirliyi tərəfindən Dövlət Proqramı icra olunur.
Ölkə başçısı cənab İlham Əliyevin sərəncamı ilə
təsdiq olunan "2007-2015-ci illərdə Azərbaycan
gənclərinin xarici ölkələrdə təhsili üzrə Dövlət
Proqramı"nın uğurla həyata keçirildiyini qeyd
edən nazir onun icrasına başlandığı gündən bu
günədək 1200-ə yaxın gəncin ölkəmizin ehtiyac
duyduğu sahələr üzrə müxtəlif təhsil
səviyyələrində təhsil almaq məqsədilə dünyanın
ən nüfuzlu ali təhsil müəssisələrinə
göndərildiyini bildirdi. Nazir qeyd etdi ki,
adıçəkilən Dövlət Proqramı Dövlət Neft Fondu
tərəfindən maliyyələşdirilir. Məlumat üçün
bildirildi ki, ötən illər ərzində gənclərimiz
Dövlət Proqramı çərçivəsində dünyanın 24
ölkəsinin 160-dək nüfuzlu ali məktəblərində
təhsil almaq üçün göndərilib. Nazir bununla
bağlı statistik rəqəmləri və həmin ölkələrin
adlarını konfrans iştirakçılarının diqqətinə
çatdıraraq 2011-2012-ci tədris ilində 500-ə
yaxın azərbaycanlı gəncin dünyanın ən qabaqcıl
ali məktəblərinə təhsil almağa göndərildiyini
bildirdi.
Təhsil naziri xarici ölkələrin tanınmış ali
məktəblərində təhsil alan gənclərdən müəyyən
qisminin artıq məzun olduğunu, məzunlardan bir
neçəsinin təhsilini növbəti səviyyədə davam
etdirdiyini, digərlərinin isə ölkəmizdə müxtəlif
dövlət qurumlarında və özəl sektorda
çalışdıqlarını söylədi.
Xaricdə təhsil alan gənclərimizin illər və
təhsil səviyyələri üzrə statistik təhlilini
aparan nazir Misir Mərdanov bu məsələyə olduqca
ciddi və məsuliyyətlə yanaşıldığını, xarici
ölkələrdə təhsil almaq istəyən gənclərin sayının
ildən-ilə artdığını qeyd etdi.
Nazir daha sonra Dövlət Proqramı çərçivəsində
gənclərin xaricdə təhsil almağa getməsi ilə
bağlı tətbiq edilən yeniliklərdən danışdı,
Təhsil Nazirliyi ilə Dövlət Neft Fondu arasında
yaranmış işgüzar əməkdaşlıqdan məmnunluğunu
ifadə etdi. Birgə fəaliyyətin uğurlu
nəticələrindən bəhs edən təhsil naziri çıxışının
sonunda tək təhsildə deyil, əhalinin sosial
rifahının yaxşılaşdırılmasında, mədəniyyətimizin
təbliğində, tikintidə, bütövlükdə
iqtisadiyyatımızın bütün sahələrində neft
kapitalının müsbət mənada təsirini aydın şəkildə
görmək mümkün olduğunu dedi və bildirdi ki, bu
siyasət ulu öndərin əsasını qoyduğu Azərbaycanın
neft strategiyasının uğurlarıdır.
Sonra həmin sessiyada Məcburi Köçkünlərin Sosial
İnkişaf Fondunun icraçı direktoru Ayaz Orucov,
Azərbaycan Dövlət İnvestisiya Şirkətinin icraçı
direktoru Əfqan İsayev, Nəqliyyat Nazirliyi
Aparatının rəhbəri Cavid Nəcəfov məruzələrlə
çıxış etdilər. Sessiyada geniş fikir mübadiləsi
aparıldı, məruzəçilər konfrans iştirakçılarının
onlara ünvanladığı suallara cavab verdilər.
Üçüncü sessiyanın işini yekunlaşdıran Dövlət
Neft Fondunun icraçı direktoru Şahmar Mövsümov
hamıya uğurlar arzuladı.
Samirə KƏRİMOVA |
