|
 NDU-da
Naxçıvan Mətbuat Şurası ilə birgə Tarix-filologiya
fakültəsinin Jurnalistika ixtisası üzrə təhsil
alan tələbələri arasında keçirilən və Azərbaycan
Respublikasının dövlət müstəqilliyinin
bərpasının 20 illiyinə həsr olunmuş "Müstəqil
Azərbaycan tələbələrin gözü ilə" mövzusunda yazı
müsabiqəsinə yekun vuruldu. Bədii, esse və digər
janrlarda yazılan 20-ə yaxın məqalədən 6 ən
yaxşısı seçilərək mükafatlandırıldı. Müsabiqənin
şərtlərinə görə I, II və III yerlərin
sahiblərinə pul mükafatları, həmçinin Naxçıvan
Mətbuat Şurasının fəxri diplomları və digər
həvəsləndirici mükafatlar təqdim olundu.
Mükafatlandırma mərasimində çıxış edən ali
məktəbin tərbiyə işləri üzrə prorektoru, fəlsəfə
elmləri doktoru, professor Məmməd Rzayev
müsabiqəni dövlət müstəqilliyinin bərpasının
20-ci ildönümünə dəyərli töhfə kimi
qiymətləndirdi, ölkədə jurnalistika ixtisasının
inkişafına yönəlmiş tədbirlərdən danışdı,
qalibləri təbrik etdi.
Naxçıvan Mətbuat Şurasının sədri Fərəc Fərəcov
belə tədbirlərin tələbə jurnalistlərin peşə
vərdişlərinin inkişaf etdirilməsi, milli
vətənpərvərlik ruhunun möhkəmlənməsi baxımından
əhəmiyyətini vurğuladı.
Jurnalistika və dünya ədəbiyyatı kafedrasının
müdiri, dosent Seyid Surə tələbələrə təhsil
aldıqları ixtisasa mükəmməl yiyələnməklə
gələcəyin layiqli peşəkar jurnalisti səviyyəsinə
yüksəlməyi arzu etdi.
Qaliblər mükafatlandırıldıqdan sonra dövlət
müstəqilliyinə həsr olunmuş filmə baxış oldu.
Nərmin CƏFƏROVA,
NDU-nun Mətbuat şöbəsinin əməkdaşı
|
