|
 Oktyabrın
26-da Azərbaycan Dillər Universitetində ADU-nun
və Norveçin Oslo Universitetinin təşkilatçılığı
ilə "Tur Heyerdal və Azərbaycan" mövzusunda
elmi-praktik konfrans öz işinə başlayıb.
Açılış mərasimində çıxış edən ADU-nun rektoru,
millət vəkili, professor Səməd Seyidov
konfransın Norveç-Azərbaycan arasında olan
əlaqələrin daha da dərinləşməsində mühüm
əhəmiyyət kəsb etdiyini vurğulayıb. Rəhbərlik
etdiyi universitetdə Skandinaviya Araşdırmalar
Mərkəzinin fəaliyyət göstərdiyini diqqətə
çatdıran S.Seyidov bu mərkəzin iki ölkə arasında
əlaqələrin inkişafına, mədəniyyətlərin
öyrənilməsinə xidmət etdiyini deyib. Məşhur
Norveç səyyahı Tur Heyerdalın 1994-cü ildə
Azərbaycan Respublikasının Prezidenti, mərhum
ümummilli lider Heydər Əliyevlə görüşdüyünü
xatırladan rektor bu görüşün əlaqələrin sonrakı
inkişafında önəmli rol oynadığını söyləyib. O,
Tur Heyerdalın Azərbaycana 4 dəfə səfər etdiyini
və tədqiqatlar apardığını konfrans
iştirakçılarının nəzərinə çatdırıb.
Oslo Universitetinin kafedra müdiri Bente
Kristensen isə çıxışında çalışdığı ali təhsil
ocağının tarixindən danışıb. ADU-da keçirilən
konfransın ölkələr arasında təhsil, mədəniyyət,
elm və digər sahələrdə olan münasibətlərin
gələcək inkişafına təkan verəcəyini qeyd edib.
Ekologiya və təbii sərvətlər naziri Hüseynqulu
Bağırov, mədəniyyət və turizm nazirinin birinci
müavini Vaqif Əliyev, "Statoyl" şirkətinin
Azərbaycan üzrə meneceri Laş Troen Sörensen,
Norveçin Azərbaycandakı fövqəladə və
səlahiyyətli səfiri Erlinq Şönsberq, kiçik Tur
Heyerdal və Oslo Kon-Tiki muzeyinin direktoru
Maya Bəuge çıxış edərək Tur Heyerdalın
Azərbaycan və region haqqındakı nəzəriyyələri,
onun Azərbaycana səfərləri və alimin iki ölkə
arasında yaxşı münasibətlərin qurulmasında vacib
rolundan danışıblar.
"Azerbaijan İntenational" jurnalının baş
redaktoru Betti Bleyer isə Tur Heyerdalın
Azərbaycanda olan tədqiqatlarından bəhs edən
Azərbaycan dilində nəşr olunan ilk kitabın
yaranma tarixindən danışıb. Betti Bleyer
redaktoru olduğu Azərbaycan və ingilis
dillərində çapdan çıxan "Tur Heyerdal:
Sərhədləri aşaraq, dənizləri aşaraq,
Azərbaycanla əlaqələr" adlı kitabını konfrans
iştirakçılarına təqdim edib.
Sonra konfrans Heyerdalın "Odin nəzəriyyəsi
tarixçəsi" mövzusunda müzakirələrlə davam edib.
Konfransa oktyabrın 29-da yekun vurulacaq.
Konfrans çərçivəsində "Odin
nəzəriyyəsi-Arxeoloji sübut", "Heyerdalın
müxtəlif aspektlərdən tədqiq edilən işi", "Odin
nəzəriyyəsi-Metodologiya və müxtəlif yanaşmalar"
mövzularında müzakirələr aparılacaq. Daha sonra
konfrans iştirakçıları Qobustan Milli
Tarix-Bədii Qoruğuna, Yanardağ və "Atəşgah
Məbədi" Dövlət Tarix-Memarlıq Qoruğuna səyahət
edəcəklər.
Şakir CƏFƏROV |
