|
 Paytaxtımızın
Xətai rayonunda yerləşən 240 nömrəli körpələr
evi-uşaq bağçasında oktyabrın 17-də keçirilən
bayram tədbirində balaca sakinlərin sevinci yerə-göyə
sığmırdı. Onlar müstəqilliyimizin bərpasının 20
illiyini bayram edirdilər. Şənlikdə bağçanın
pedaqoji kollektiv üzvləri və valideynlərlə
yanaşı xeyli qonaq - Bakı Şəhəri üzrə Təhsil
İdarəsinin metodisti Tamella Useynova,
Azərbaycan Təhsil İşçiləri Azad Həmkarlar
İttifaqı Xətai Rayon Komitəsinin sədri Cəmil
Əliyev, 222, 235, 236, 241, 256 nömrəli körpələr
evi-uşaq bağçalarının müdirləri Aygun
İsgəndərova, Səlahət Musayeva, Lyuba Hümbətova,
Xalidə Balayeva, Könül Hacıyeva, 236 nömrəli
bağçanın metodisti Rəhilə Həsənova və b. iştirak
edirdilər.
Bayram şənliyi bağçanın balaca sakinlərinin
əllərində bayraqlar "Azərbaycan" mahnısının
sədaları altında zala daxil olmaları ilə
başlandı. Dairə vuran uşaqlar Dövlət himnimizi
ifa etdilər.
Aparıcı uşaqları salamlayıb bu günlər ölkəmizin
hər yerində bayram əhvali-ruhiyyəsinin
yaşandığını, xalqımızın azadlığa, müstəqilliyə
qovuşmağımızın 20 illiyini qeyd etdiyini
bildirdi və bu əziz bayram münasibəti ilə hamını
təbrik etdi.
Uşaqlar "Bu gün bayramdır" mahnısını xorla ifa
etdilər. Sonra Ayxan, İranə, Murad, Nərmin,
Günel, Kənan müstəqilliyimizə, bayrağımıza,
gerbimizə, bayrağımızın rənglərinə aid şeir
parçaları söylədilər. Meydan mahnıya verildi.
Uşaqlar "Əzizsən, vətən" mahnısını ifa etdilər.
Beləcə, şənlik mahnı və rəqslərlə davam etdi və
körpə fidanların "Yallı" getməsi ilə başa çatdı.
Bağçanın müdiri Sədaqət Rəhimova əziz bayram
münasibəti ilə uşaqları təbrik etdi, onlara
müstəqilliyin böyük nemət olmasından danışdı,
ölkəmizdə körpə balaların aydın səma altında
azad, firavan, sülh şəraitində yaşayıb
böyüməsinin dövlətimizin əsas prioritet
istiqamətlərindən biri olduğunu vurğuladı. Çıxış
edən qonaqlar isə təqdim etdikləri maraqlı
bayram proqramına, məharətli çıxışlarına görə
uşaqlara təşəkkür etdilər, bağça rəhbərliyinin,
xüsusən də tədbirin hazırlanmasında böyük rolu
olan musiqi rəhbəri Günay İsrafilovanın əməyini
yüksək qiymətləndirdilər.
Yusif ƏLİYEV |
|
