|
 Oktyabrın
14-də Bakıdakı Hilton otelində "Kənd təsərrüfatı
sahəsində ilkin peşə təhsilinin inkişafı"
layihəsinin təqdimatına həsr olunmuş konfrans
keçirilib. Konfransda Azərbaycan Respublikasının
təhsil naziri Misir Mərdanov, təhsil nazirinin
müavini Qulu Novruzov, kənd təsərrüfatı
nazirinin müavini Bəhram Əliyev, Almaniyanın
Azərbaycandakı fövqəladə və səlahiyyətli səfiri
Herbert Kvellen, Almaniyanın Qida, Kənd
Təsərrüfatı və İstehlakçının Müdafiəsi Federal
nazirinin müavini Peter Bleser, Vaynştefan-Trisdorf
Tətbiqi Elmlər Universitetinin professoru, "Kənd
təsərrüfatı sahəsində ilkin peşə təhsilinin
inkişafı" layihəsinin Almaniya tərəfdən meneceri
Herbert Strobel, Təhsil Nazirliyinin Texniki
peşə təhsili şöbəsinin müdiri Namiq Məmmədov,
peşə məktəblərinin direktorları və digər
qonaqlar iştirak ediblər. Konfransda Avropa
İttifaqı tərəfindən maliyyələşən "Tvinninq"
layihəsinin ölkəmizdə tətbiqi əsas məsələlərdən
biri kimi nəzərdə tutulmuşdu. Məlumat üçün
bildirək ki, 2010-cu ilin avqustunda Avropa
İttifaqına üzv ölkələr arasında "Kənd
təsərrüfatı sahəsində ilkin peşə təhsilinin
inkişafı" layihəsi elan olunub.
"Kənd təsərrüfatı sahəsində ilkin peşə
təhsilinin inkişafı" layihəsi Avropa Qonşuluq
Siyasətinin (AQS) 2008-ci il Milli Fəaliyyət
Planı çərçivəsində Avropa İttifaqı tərəfindən
maliyyələşdirilir və layihənin büdcəsi 1200000
avrodur. 15 avqust 2011-ci il tarixdə başlanmış
layihənin 21 ay müddətində icra olunması nəzərdə
tutulub. Eyni zamanda layihədə ilk peşə-ixtisas
təhsili strategiyası çərçivəsində həyata
keçirilən cari islahatların kənd təsərrüfatı
sahəsində peşə təhsili və təlimini əhatə etməsi
məqsədilə ilk peşə-ixtisas təhsili qurumlarının
və digər əlaqədar təşkilatların institusional
potensialının gücləndirilməsi öz əksini tapıb.
"Kənd təsərrüfatı sahəsində ilkin peşə
təhsilinin inkişafı" layihəsi "Azərbaycan
Respublikasında texniki peşə təhsilinin inkişafı
üzrə Dövlət Proqramı (2007-2012-ci illər)"nın
prinsiplərinə uyğun olaraq tərtib olunub.
Layihədə kənd təsərrüfatı sahəsinə aid ixtisas
standartlarının və kurikulum nümunələrinin
hazırlanması, müvafiq istiqamətdə bir və ya bir
neçə peşə təhsili müəssisəsində pilot layihənin
həyata keçirilməsi, layihənin icrasını
dəstəkləyənlər və bununla bağlı kurikulumları
tərtib edənlər, peşə təhsili müəssisələrinin
rəhbərləri və müəllimləri üçün təlimlər
keçirilməsi öz əksini tapıb. Layihə "Tvinninq"
tərəfdaşlarının - Azərbaycan Respublikası Təhsil
Nazirliyi və Almaniyanın Qida, Kənd Təsərrüfatı
və İstehlakçının Müdafiəsi Federal Nazirliyinin
dəstəyi ilə həyata keçiriləcək.
Konfransı giriş sözü ilə açan təhsil naziri
Misir Mərdanov qonaqları salamlayaraq,
Azərbaycanın müstəqillik qazandıqdan sonra
Almaniya ilə bütün istiqamətlərdə olduğu kimi
təhsil sahəsində də əməkdaşlığının
genişləndiyini nəzərə çatdırdı. Ölkə Prezidenti
cənab İlham Əliyevin digər sahələrlə yanaşı,
kənd təsərrüfatı sektoruna da xüsusi diqqət
yetirdiyini bildirən nazir kənd təsərrüfatı üzrə
ixtisaslı kadrların yetişdirilməsinin prioritet
məsələlərdən biri olduğunu qeyd etdi.
Təhsil naziri Misir Mərdanov layihənin həyata
keçirilməsində əsas məqsədin Azərbaycan
Respublikasında kənd təsərrüfatı sahəsində peşə
təhsili islahatlarına yardım etmək, peşə təhsili
almış məzunların işlə təmin olunma vəziyyətini
yaxşılaşdırmaq və ölkədə qeyri-neft sektoru
sahələrinin rəqabət qabiliyyətini artırmaqdan
ibarət olduğunu söylədi. Layihənin gələcəkdə
peşə təhsilinin və kənd təsərrüfatının
inkişafına böyük təkan verəcəyinə inamını ifadə
edən nazir bu baxımdan "Kənd təsərrüfatı
sahəsində ilkin peşə təhsilinin inkişafı"
layihəsini yüksək dəyərləndirdi.
Konfransda çıxış edən Almaniyanın
Azərbaycandakı səfiri Herbert Kvellen
respublikamızın son illər sürətlə inkişaf edən
iqtisadiyyatından söz açdı. Bildirdi ki, kənd
təsərrüfatı sahəsi vacib sahələrdəndir.
Azərbaycan Asiya və Avropa qitələri arasında
yerləşir ki, bu da kənd təsərrüfatı sahəsinin
genişlənməsi və idxalın artırılması üçün böyük
əhəmiyyət kəsb edir. Təsadüfü deyil ki, Cənubu
Qafqaz iqtisadiyyatının 75%-i Azərbaycanın
payına düşür. Ölkəmizin geniş potensiala malik
olduğunu və kənd təsərrüfatının inkişafı üçün
hər bir şəraitin mövcudluğunu qeyd edən səfir
layihənin uğurla həyata keçiriləcəyinə ümidvar
olduğunu qeyd etdi.
Çıxış edən Almaniyanın Qida, Kənd Təsərrüfatı
və İstehlakçının Müdafiəsi Federal nazirinin
müavini Peter Bleser kənd təsərrüfatı sahəsinə
böyük investisiyaların yatırılmasının
vacibliyini vurğuladı. Bu sahənin inkişafı üçün
yüksək ixtisaslı kadrların hazırlanmasının əsas
amillərdən biri olduğunu qeyd edən Peter Bleser
həm ekoloji, həm də qida cəhətdən inkişaf etmiş
Almaniyanın bir neçə olkədə tədris mərkəzləri
yaratdığını və bu mərkəzlərdən ölkələrin xeyli
faydalandığını nəzərə çatdırdı.
Sonda "Kənd təsərrüfatı sahəsində ilkin peşə
təhsilinin inkişafı" layihəsinin Almaniya
tərəfdən meneceri Herbert Strobelin layihə
haqqında geniş təqdimatı dinlənildi.
Niyazi RƏHİMOV |
