|
Oktyabrın
12-də Azərbaycan Dövlət Bədən Tərbiyəsi və
İdman Akademiyasının idman meydançasında
Azərbaycan Respublikasının dövlət
müstəqilliyinin bərpasının 20-ci ildönümünə həsr
olunmuş ümumtəhsil və ilk peşə-ixtisas təhsili
müəssisələri şagirdlərinin VI Respublika
spartakiadasının açılış mərasimi keçirildi.
Əvvəlcə
Azərbaycan Respublikasının Dövlət himni
səsləndirildi. Sonra bildirildi ki, iki ildən
bir keçirilən spartakiadanın əsas məqsədi
uşaqlar arasında bədən tərbiyəsi və idmanın
kütləviliyinə nail olmaq, uşaqların fiziki
cəhətdən sağlam böyümələrinə və idman növləri
ilə daimi məşğul olmalarına zəmin yaratmaq,
məktəblilərin vətənpərvərlik ruhunda
tərbiyəsində bədən tərbiyəsi və idmanın rolunu,
onların idman ustalıqlarını artırmaqdır.
Qeyd olundu
ki, spartakiadada umumtəhsil və ilk peşə-ixtisas
məktəblərinin şagirdləri 8 idman növü (futbol,
həndbol, basketbol, voleybol, stolüstü tennis,
atletika, yunan - Roma güləşi və boks) üzrə IV
mərhələdə mübarizə aparmışlar. I mərhələdə -
məktəbdaxili yarışlarda ümumtəhsil və ilk
peşə-ixtisas təhsili müəssisələrinin əksər
şagirdləri iştirak etmişdir. II mərhələyə
(rayon, şəhər mərhələsi) 880 komanda vəsiqə
qazanmışdır. Rayon, şəhər yarışlarında 151 min
şagird iştirak etmişdir ki, onlardan da 70 min
nəfərini qızlar təşkil edib. III mərhələdə zona
yarışlarında II mərhələnin qalibi olmuş 58
komandanın tərkibində 5545 nəfər şagird iştirak
etmişdir. Onlardan da 2 min 180 nəfəri
qızlardır. Zona yarışları respublikamızın 10
şəhər və rayonunda keçirilmişdir. Finalda 35
şəhər və rayondan 75 komanda iştirak edir.
Sentyabrın
27-dən yarışların final mərhələsinin oyunlarına
start verilmişdir. Yarışlara oktyabrın 18-də
Azərbaycan Respublikasının dövlət
müstəqilliyinin bərpasının 20-ci ildönümü günü
yekun vurulacaq.
Tədbirdə
Təhsil Nazirliyinin baş məsləhətçiləri Arzu
Qarayev, Elnur Əlizadə, Təhsil Nazirliyinin
Respublika Bədən Tərbiyəsi Mərkəzinin direktoru
Niftalı Quliyev və digər qonaqlar çıxış edərək
idmançıları təbrik etdilər.
Rəşad ZİYADOV |
