|
 Bu
günlər xalqımız ölkəmizin dövlət müstəqilliyinin
bərpasının 20 illiyini böyük təntənə ilə,
həyatın bütün sahələrində qazanılmış
diqqətəlayiq uğurlarla qeyd edir. Müstəqillik
illərində ölkəmiz böyük inkişaf yolu keçmişdir.
Əsası ulu öndərimiz Heydər Əliyev tərəfindən
qoyulmuş milli quruculuq siyasəti nəticəsində
ölkəmizdə siyasi sabitlik yaranmış,
müstəqilliyimiz möhkəmlənmiş, dövlətçiliyimiz
inkişaf etmiş, müstəqillik üçün zəruri olan
güclü iqtisadiyyatın yaradılması istiqamətində
məqsədyönlü addımlar atılmış, ölkə həyatının
bütün sahələrində islahatlara başlanmışdır. Çox
əlamətdar haldır ki, ulu öndərin başladığı
quruculuq işləri, ölkəmizin beynəlxalq aləmdə
güclənməsi və nüfuzunun artmasına yönəlmiş
daxili və xarici siyasət onun layiqli davamçısı
ölkə Prezidenti İlham Əliyev tərəfindən uğurla
davam etdirilir.
Müstəqillik illərində digər sahələr kimi
təhsilimizdə də güclü inkişaf baş vermiş, təhsil
sektorunda aparılan islahatlar, 2000-dən çox
məktəbin tikilməsi, əsaslı təmiri nəticəsində
təhsilin maddi-texniki bazası möhkəmləndirilmiş,
infrastrukturu, məzmunu tamamilə
yeniləşdirilmiş, təhsildə yeni
informasiya-kommunikasiya texnologiyalarının,
yeni qiymətləndirmə mexanizmlərinin tətbiqi,
dərsliklərlə, kadrlarla təminat sahəsində çox
ciddi addımlar atılmışdır. Möhtərəm
Prezidentimizin iqtisadi potensialın insan
kapitalına çevrilməsində təhsilin roluna verdiyi
böyük önəm nəticəsində təhsil hazırda ölkəmizdə
dövlət və cəmiyyətin inkişafının prioritet
sahəsinə çevrilmişdir. Azərbaycan dövləti, onun
Prezidenti İlham Əliyev təhsilə, təhsil
işçilərinə böyük diqqət və qayğı göstərir,
təhsildə aparılan islahat yönümlü işləri,
qazanılan uğurları, təhsil işçilərinin əməyini
yüksək qiymətləndirir.
Bu, bütün təhsil işçiləri kimi bizi - Bakıdakı
E.Cəlilov adına 272 nömrəli tam orta məktəbin
kollektivini də qarşımıza qoyulan vəzifələri
yüksək səviyyədə yerinə yetirməyə ruhlandırır.
Müstəqilliyimizin 20 illiyini qeyd etdiyimiz bu
il bizim üçün xüsusilə əlamətdar olub. Belə ki,
məktəbimiz möhtərəm Prezidentimizin məlum
sərəncamına əsasən keçirilən "Ən yaxşı ümumi
təhsil müəssisəsi" müsabiqəsinin 2010-2011-ci
tədris ili üzrə qaliblərindən biri olub və cənab
Prezidentin sərəncamı ilə 10 min manat
məbləğində birdəfəlik pul mükafatı alıb.
Fürsətdən istifadə edərək mən təhsilimizə
göstərdiyi böyük qayğıya, əməyimizə verdiyi
yüksək qiymətə görə kollektivimiz adından cənab
Prezidentə minnətdarlığımı bildirirəm.
Dövrün tələblərinə cavab verən təhsil xidməti
göstərmək üçün hazırda məktəbimizdə zəruri
maddi-texniki baza və keyfiyyətli təhsilə
zəmanət verən əlverişli təlim mühiti mövcuddur.
Belə ki, fəaliyyətə başladığı 1985-ci ildə inşa
olunmuş üçmərtəbəli böyük tədris korpusundan
başqa məktəbimiz üçün 2008-ci ildə üçmərtəbəli
müasir əlavə tədris korpusu da tikilərək
istifadəyə verilib. Əsas tədris korpusunda 37
sinif otağı və 3 kompüter otağı, əlavə korpusda
isə 35 sinif otağı, 2 kompüter otağı və
kitabxana fəaliyyət göstərir. Bütün otaqlar
zəruri inventarlar, tədris ləvazimatları ilə
təmin olunub.
5
günlük iş həftəsi ilə işləyən məktəbimizdə təlim
Azərbaycan və rus dillərində aparılır.
Şagirdlərimizin sayı 1280, müəllimlərimizin sayı
isə 214 nəfərdir. Məktəbimizdə İKT-nin təhsilə
tətbiqi, dərslərin elektron vasitələrlə
aparılmasına xüsusi diqqət yetiririk. Müasir
kompüterlərlə təchiz olunmuş 5 kompüter otağımız
buna geniş imkan verir. Məktəbimizin İnternetə
çıxışı təmin olunub. Müəllimlərimiz təhsilin
keyfiyyətini yüksəltmək üçün müasir təlim
metodlarından, elektron dərslərdən, hər bir fənn
üzrə test yoxlamalarından geniş istifadə
edirlər.
Yeni kurikulumlarla iş də məktəbimizdə
qənaətbəxş təşkil olunub. Müəllimlərin hamısı
müvafiq təlim kursundan keçərək yeni tədris
modelini yaradıcılıqla mənimsəyiblər və uğurla
tətbiq edirlər.
Məktəbimizdə təcrübə mübadiləsi məqsədi ilə
"açıq dərs"lərin keçirilməsi və onların
nəticələrinin müzakirəsi də ənənə halını alıb.
Kollektivimizdə təcrübəsi öyrənilməli və
yayılmalı müəllimlər çoxdur. İbtidai sinif
müəllimləri Mahirə Cəfərova, Sevil Qulubəyova,
nəğmə və musiqi müəllimi Mehriban Musayeva,
dil-ədəbiyyat müəllimi Şiringül Ağamalıyeva,
coğrafiya müəllimi Gülnisə Allahverdiyeva və
başqaları belələrinə misal ola bilər. Həmin
müəllimlərin təcrübələri məktəbdə öyrənilir,
həmkarları onların tədris metodları ilə tanış
olurlar. Bütün bunlar təbii ki, məktəbdə
uğurların artmasına müsbət təsir göstərir. Təkcə
bir faktı qeyd edim ki, məzunlarımızın ali
məktəblərə qəbulu son üç ildə 10 faizədək
artaraq 2008-ci ildəki 40,57 faizdən 2010-cu
ildə 49,43 faizə çatıb. Qəbul imtahanlarında
500-700 bal toplayan məzunlarımızın sayında
diqqətəlayiq artım özünü göstərib. Belə ki,
həmin göstərici 2008-ci ildə 13,76%, 2009-cu
ildə 14,28%, 2010-cu ildə isə 24,42 faiz olub.
Bu il 5 məzunumuz 600-dən çox bal toplayıb.
Müxtəlif illərdə ali məktəblərə qəbulda ən
yüksək nəticə göstərən 3 məzunumuz Prezident
təqaüdünə layiq görülüb. Məktəbimizin XI sinif
şagirdi Fidan Həsənbəyli AzTV-nin keçirdiyi "Mən
azərbaycanlıyam" intellektual bilik yarışmasının
qalibi olub. VIII sinif şagirdi İlham
Qələndərov isə dəfələrlə rəsm müsabiqələrində
qalib gəlib. VIII sinif şagirdləri Kamil Əhmədov
və Ramin Aşumov müxtəlif rəqs müsabiqələrində
fərqlənib, Türkiyədə keçirilən uluslararası rəqs
müsabiqəsində I və II yerlərə layiq görülərək
diplomlarla mükafatlandırılıblar.
Şagirdlərimiz respublika fənn olimpiadalarında,
digər bilik yarışlarında da fəallıq göstərir və
məktəbimizə üzağlığı gətirirlər. İdmançı
şagirdlərimizdən Ramiz Bayramov, Ramin Aşumov,
Zaman Zamanov, Aqil Camalov, Rəsul Bayramov
müxtəlif idman növləri üzrə yarışlarda qələbələr
qazanaraq perspektivli idmançılar olduqlarını
sübut ediblər.
Məktəbimizdə şagirdlərin dünyagörüşlərinin
genişlənməsinə, milli mənəvi və vətənpərvərlik
tərbiyəsinə xidmət edən çoxlu sayda tədbirin,
tanınmış şairlər, elm və mədəniyyət xadimləri
ilə görüşlərin keçirilməsi də ənənə halını alıb.
Biz yeni dərs ilinə daha keyfiyyətli təhsil
vermək və daha çox uğurlara imza atmaq devizi
ilə başlamışıq. Əminik ki, yeni-yeni uğurlar
qazanmaqla müstəqilliyimizə verdiyimiz töhfələri
daha da artıracağıq.
Qarşıdan gələn Beynəlxalq Müəllim Günü
münasibəti ilə həmkarlarımızı təbrik edir,
onlara müstəqilliyimizin daha da möhkəmlənməsi
naminə səmərəli fəaliyyət və uğurlar
arzulayıram.
Rəhilə ƏHMƏDOVA,
Bakı şəhər E.Cəlilov adına 272 nömrəli
tam orta məktəbin direktoru |
|
