|
Çexiyanın Olomouts şəhərində atletika üzrə bu
ölkənin açıq çempionatı keçirilmişdir.
Yarışda atletika üzrə Azərbaycan paralimpiya
milli komandası da iştirak etmişdir.
AzərTAc xəbər verir ki, məşqçilər Oqtay
Şahtaxtinski və Ziya Xalfayevin rəhbərliyi ilə
turnirdə 9 idmançımız atletikanın müxtəlif
növlərində öz gücünü sınamışdır.
İdmançılarımız çempionatda uğurla yarışaraq
Vətənə 4 qızıl, 7 gümüş və 2 bürünc medalla
qayıtmışlar.
Yuri Gornak T13 kateqoriyasında 200 metr və 400
metr məsafəyə qaçışda ikinci nəticə
göstərmişdir. Elçin Muradov F12 kateqoriyasında
100 metr məsafəyə qaçışda ikinci və 400 metr
məsafəyə dördüncü, Orxan Ramazanov T13
kateqoriyasında 800 metr məsafəyə üçüncü və 1500
m məsafəyə qaçışda ikinci yerləri tutmuşlar.
Üç təkanla tullanmada Vüqar Adışirinov F46
kateqoriyasında birinci, Hüseyn Həsənov isə
ikinci yerlərə layiq görülmüşlər.
Uzunluğa tullanmada Hüseyn Həsənov F46
kateqoriyasında fəxri kürsünün ən yüksək
pilləsinə qalxmışdır. Vüqar Adışirinov ikinci
nəticə göstəmişdir. Nadir Ələkbərov isə bu idman
növündə T13 kateqoriyasında yeddinci yerdə
qərarlaşmışdır.
İdmanın nüvə-itələmə növündə Mehman Ramazanzadə
F56 kateqoriyasında birinci, Allahverdi
Allahverdiyev isə ikinci yerlərə sahib olmuşlar.
Nizə atmada Allahverdi Allahverdiyev F56
kateqoriyasında fəxri kürsünün ən yüksək
pilləsinə qalxmışdır. Lövhə atmaqda isə Samir
Nəbiyev F57 kateqoriyasında üçüncü nəticə
göstərmişdir. |
