|
Sentyabrın 15-də Bakıdakı 151 nömrəli məktəbdə
Bilik günü ilə əlaqədar tədbir keçirildi.
Dövlət himninin səslənməsindən sonra
Azərbaycanın Dövlət bayrağı səhnəyə gətirildi.
Tədbir başlamazdan əvvəl ulu öndər Heydər
Əliyevin və torpaqlarımızın azadlığı uğrunda
şəhid olmuş vətən oğullarının əziz xatirəsi bir
dəqiqəlik sükutla yad edildi.
Tədbir iştirakçılarını salamlayan məktəbin
direktoru Gülarə Verdiyeva pedaqoji kollektiv
üzvlərini, şagirdləri, xüsusən də birinci sinfə
yeni qədəm qoyan birinciləri və onların
valideynlərini ürəkdən təbrik etdi.
Onlara dərslərində uğurlar arzulayaraq bu gün
təhsilə göstərilən dövlət qayğısından söz açdı.
***
Bayram tədbiri Bakının Nəsimi rayonunda yerləşən
35 nömrəli orta məktəbdə də geniş qeyd edildi.
Yeni dərs ili məktəb kollektivi üçün ikiqat
bayrama çevrilmişdi. Belə ki, bu il təhsil ocağı
ölkə başçısı cənab İlham Əliyevin təsdiq etdiyi
Bakı şəhərinin və onun qəsəbələrinin
sosial-iqtisadi inkişafına dair Dövlət
Proqramına əsasən təmir olunaraq Bilik günündə
istifadəyə verilib. Tədbiri giriş sözü ilə
açan məktəbin direktoru Rəna Naibova təhsilə
göstərilən diqqət və qayğıya görə, məktəb
kollektivi və valideynlər adından ölkə
Prezidenti İlham Əliyevə və Heydər Əliyev
Fondunun prezidenti Mehriban xanım Əliyevaya
minnətdarlığını bildirdi.
Nəsimi Rayon İcra Hakimiyyəti başçısının
müavini Ağaəli Əhmədov də birinciləri təbrik
etdi. Onlara dərslərində yaxşı oxumağı, həmişə
valideynlərinin və müəllimlərin nəsihətlərini
eşitməyi tövsiyə etdi.
Məktəbin açılış mərasimini bildirən rəmzi lent
kəsildi. Tədbir iştirakçıları məktəbin müasir
standartlara cavab verən yenicə təmirdən çıxmış
binası ilə yaxından tanış oldular.
***
Həmin gün bütün təhsil ocaqlarında olduğu kimi,
Bakının Nərimanov rayonunda yerləşən 258 nömrəli
orta məktəbdə də bayram sevinci yaşanırdı.
Məktəbdə Bilik günü və binanın açılışı mərasimi
unudulmaz xatirələrlə yadda qaldı. Bu təhsil
ocağı da bu il əsaslı təmir olunub.
Tədbirdə iştirak edən Nərimanov Rayon İcra
Hakimiyyətinin başçısı A.Fərzəliyev, Bakı Şəhəri
üzrə Təhsil İdarəsinin müdir müavini M.Bayramov,
millət vəkili A.Əliyev və digərləri çıxışlarında
məktəbin pedaqoji kollektivini və birinciləri
təbrik etdilər. Birincilər maraqlı şeirlərlə,
mahnılarla, rəqs nömrələri ilə həmin günü
unudulmaz xatirəyə çevirdilər.
Rəşad ZİYADOV |
