|
 Regionların
sosial-iqtisadi inkişafı Dövlət Proqramına
müvafiq olaraq ölkəmizin əksər bölgələrində yeni
məktəb binaları tikilir və ya əsaslı təmir
olunur. Belə bölgələrimizdən biri də Qax
rayonudur. Rayonun Qıpçaq kəndində Təhsil
Nazirliyinin sifarişi ilə 180 şagird yerlik yeni
məktəb binası tikilib. İkimərtəbəli məktəb
binasında 9 sinif otağı, fizika və kimya
laboratoriyaları, kompüter otağı, akt və idman
zalları, bufet, arxiv otağı vardır. Binanın
istilik, elektrik və kanalizasiya sistemləri
artıq qurulub. Hazırda otaqların, dəhlizlərin
divarları rənglənir, həyətdə abadlıq işləri
aparılır.
***
Dövlət Proqramı çərçivəsində bu il Balakən
rayonunda da iki məktəb binası tikilir. Onlardan
biri Qazböluk kəndindəki 180 yerlik məktəb
binasıdır. İnşası yekunlaşmaqda olan bina 11
sinif otağı, fənn kabinetləri, laboratoriya, akt
zalı, kompüter otağından ibarətdir. Məktəb üçün
yeni qazanxana və nasosxana inşa olunub, müasir
istilik sistemi qurulub. Hazırda idman zalında
tikinti başa çatmaqdadır, əsas korpusda isə
tamamlama işləri yerinə yetirilir. Məktəbin
həyətində də qızğın iş gedir, həyət
abadlaşdırılır, burada gözoxşayan yaşıllıq
salınır.
Rayonun Katex kəndində də yeni məktəb inşa
olunub. Katex kənd 2 nömrəli orta məktəb üçün
nəzərdə tutulmuş həmin binanın təməli 2010-cu
ildə qoyulub. İnşaat işləri isə əsasən bu il
aparılıb. Hazırda tikintisi başa çatan 220
şagird yerlik məktəb binası Təhsil Nazirliyinin
sifarişi ilə inşa olunub. Fənn kabinetləri,
laboratoriya otaqları, akt zalı, kompüter otağı
və yardımçı binalardan ibarət olan məktəb müasir
standartlara uyğun inşa olunub. Qeyd edək ki, bu
bina son illər Balakən rayonunda inşa olunan
sayca 21-ci məktəb binasıdır.
Y.ƏLİYEV |
|
