|
"Oriqami" Uşaq və Yeniyetmələr İctimai Birliyi
iyulun 26-dan avqustun 21-dək 45 nəfər 6-18
yaşlı xüsusi qayğıya ehtiyacı olan uşaq,
valideyn himayəsindən məhrum olmuş usaqlar və
İmisli rayonu Bəhram-Təpə qəsəbəsi Fin 1 və 2
şəhərciklərində məskunlaşmış Ağdam, Füzuli və
Cəbrayıl rayonlarından olan məcburi köçkün
ailələrin övladları üçün Qusar rayonu Yasab
kəndində yay sağlamlıq düşərgəsi təşkil
etmişdir.
İctimai birlikdən aldığımız məlumata görə,
istirahət düşərgəsinin təşkili ilə əlaqədar
"Oriqami" İB-nin işçiləri Qusar rayonuna ezam
olunmuş, Qusar Rayon İcra Hakimiyyəti, Yasab
qəsəbə nümayəndəliyi və bələdiyyəsində görüşlər
keçirmis, fərdi qaydada, icarə əsasında
düşərgənin yerləşməsi məsələsini, həmin ərazidə
asayişin qorunması, tibbi yardımın təşkili, su,
elektrik enerjisi təminatı problemlərini həll
etmişlər.
45 uşağın düşərgədə yay istirahətinin təşkili
ictimai birlikdə tərtib edilmiş pedaqoji yönümlü
proqram əsasında həyata keçirilmişdir. İstirahət
müddətində usaqların bir neçə dəfə meşə
massivinə, "Qara Baba" pirinə, yaxında yerləşən
zəmilərə, çay kənarına, bulaqlara və s. yerlərə
ekskursiyaları təşkil olunmuşdur.
Xüsusi qayğıya ehtiyacı olan uşaqlarda özünə
inam hissini möhkəmlətmək məqsədi ilə
təşkilatın psixoloq və tərbiyəçiləri tərəfindən
onlarla ətraf mühit, təbiət haqqında söhbətlər
keçirilmiş, hər şeyi bilmək istəyən uşaqlara
təlimçilər tərəfindən Uşaq Hüquqları
Konvensiyası, xüsusən də uşaqların hüquqları,
onları maraqlandıran digər məsələlər haqqında
məlumat verilmişdir. Bu işlərdə düsərgənin
pedaqoji kollektivinin üzvləri psixoloq
Z.Bayramova, təşkilatçı A.Ağayeva, bədən
tərbiyəsi mütəxəssisi T.Məmmədov və digərləri
xüsusilə fərqlənmişlər.
Uşaqlar düşərgədə keçirilən "Bacarıqlı əllər"
yarışlarında iştirak edərək gil, saman, talaşa
materiallarından müxtəlif əl işləri yaratmış,
birlikdə multiplikasıya filmlərinə və digər TV
verilişlərinə baxmış, hər gün təşkil olunan
diskotekada rəqs etmişlər.
Nəsimi rayonundakı Uşaq Yaradıcılıq Mərkəzinin
nəzdində fəaliyyət göstərən "Dəcəl qızlar" rəqs
qrupu (bədii rəhbər Azərbaycan Respublikasının
xalq artisti Cəmilə Bayramovadır) 3 gün
düşərgədə olmuş, uşaqlar qarşısında maraqlı
proqramla çıxış etmişdir.
Xüsusi qayğıya ehtiyacı olan uşaqların yay
istirahətinin təşkilinə Azərbaycan Beynəlxalq
Bankı maliyyə yardımı göstərmiş və TUSİAB-ın
təşkilatçılığı ilə "Toyes AZE" MMC isə uşaqların
isti qida, meyvə-tərəvəzlə təminatına kömək
göstərmişdir. Düşərgədə keçirdikləri günlər
uşaqların psixoloji durumuna müsbət təsir
göstərmiş, onların sağlamlıqlarının
möhkəmləndirilməsində, həyata nikbin
baxışlarının formalaşmasında mühüm rol
oynamışdır.
Yusif ƏLİYEV |
