|
Respublikamız üçün savadlı və peşəkar müəllim
kadrlarının hazırlanması və təkmilləşməsi
prosesində aparıcı rol oynayan BPKİYİ bu gün öz
üzərinə düşən vəzifəni şərəflə yerinə yetirir.
İnstitut həm də xarici dil mütəxəssislərinin
ixtisasartırma sahəsində elm və tədris mərkəzi
rolunu oynayır.
Biz, bir qrup orta məktəb müəllimi bu il iyunun
1-dən 24-dək Bakıdakı 47 nömrəli orta məktəbdə
BPKİYİ tərəfindən təşkil olunan ixtisasartırma
kurslarında iştirak etdik və çox razı qaldıq.
Burada yüksək səviyyəli mütəxəssislər bizə dərs
deyirdilər. Dərslər yeni texnologiyalar əsasında
keçilirdi. Xüsusən də BPKİYİ-nin Xarici dillər
kafedrasının müdiri Rəfiqə Əliyevanın təşkil
etdiyi dərslər və oraya respublikamızın bir sıra
görkəmli müəllimlərinin - "Ən yaxşı müəllim"
müsabiqəsinin qaliblərinin cəlb edilməsi
təqdirəlayiq idi. Onlardan bəzilərini xüsusilə
qeyd etmək istərdim: Rəfiqə Əliyeva ("Fəal
dərsin quruluşu və yeni təlim metodlarının
tətbiqi ilə model dərslərin hazırlanması"),
Xalidə Rüstəmova ("Dərsin planlaşdırılması"),
Solmaz Quliyeva ("Ətraf mühit"), Elmira
İlizarova ("Mən və mənim fəaliyyətim"), Təranə
Böyükzadə ("Dərs prosesində oyunların tətbiqi"),
Qəmər Rüstəmova ("Yazı və dinləmə", "Yuxarı
siniflərdə inşaların tədrisi"), Dilarə
Bünyatova ("Kurikulum"), Natavan Daştıyeva
("İbtidai siniflərdə qavrama qabiliyyətinin
inkişafı") və başqaları.
Tədris prosesinin əsas məqsədi mənəvi dəyərləri
dərk etmək, müstəqil düşünmək, vacib qərarlar
qəbul etmək, tək və qrup şəklində araşdırmalar
aparmaq, şəraiti düzgün qiymətləndirməklə
şagirdlərin məntiqi, tənqidi və yaradıcı
təfəkkürünü inkişaf etdirməkdir.
Təlim zamanı biz yeni metodlara əsaslanaraq,
tədris prosesinin əsas məqsədini mənimsədik və
bu, əlbəttə, gələcəkdə işimizi düzgün
istiqamətləndirməyə kömək edəcək.
Öz ixtisasımız sahəsində yeni biliklər, yeni
təlim texnologiyalarına yiyələndik və əminəm ki,
yeni dərs ilində əldə etdiyimiz bu biliklər bizə
dərslərimizi daha səmərəli qurmağa,
şagirdlərimizin ünsiyyət bacarıqlarının
formalaşmasına yardımçı olacaqdır.
Kursun yüksək səviyyədə təşkilinə görə başda
rektor, professor Asəf Zamanov olmaqla
institutun bütün kollektivinə təşəkkürümüzü
bildiririk.
Kamilə KƏBİRLİ,
Bakıdakı E.Yəhyayev adına 56 nömrəli orta
məktəbin müəllimi |
