|
 ABŞ-ın
Alabama Hantsvill Universitetinə dəvət olunmuş
azərbaycanlı tələbələr İREX-in "İctimai
məsuliyyət üzrə Azərbaycan tələbə liderləri üçün
Birləşmiş Ştatlar institutu tədrisi" (SUSI)
layihəsi çərçivəsində "Azərbaycan günü"
keçirmişlər.
AzərTAc xəbər
verir ki, universitetin "Frank Franz Hall"
zalında 100-dək xarici qonağın iştirakı ilə
keçirilən tədbir "Yallı" rəqs musiqisi ilə
başlanmışdır.
Azərbaycanlı
tələbələr Samir Qədirov və Linara Əliyeva
ölkəmiz haqqında təqdimatla çıxış etmişlər.
Təqdimatda Azərbaycanın tarixi, mədəniyyəti,
coğrafiyası, musiqisi, milli geyimləri, milli
mətbəxi, atributları və şəhərləri haqqında geniş
məlumat verilmişdir.
Tədbirin bədii
hissəsində Könül Hüseynova Cəmilə Əhmədzadənin
ifa etdiyi "Sarı gəlin" xalq mahnısının
sədaları altında milli rəqslərimizdən ibarət
kompozisiya göstərmişdir.
Sonra qonaqlar
Azərbaycan mətbəxinin ləziz nümunələri ilə
bəzədilmiş süfrəyə dəvət olunmuşlar.
Qeyd edək ki,
SUSI layihəsi İREX Azərbaycan və ABŞ Dövlət
Departamentinin Təhsil və Mədəniyyət Bürosu
tərəfindən təşkil olunmuşdur. Layihədə iştirak
etmək üçün Azərbaycanda fəaliyyət göstərən
universitetlərin I-III kurs tələbələri arasından
23 nəfər seçilmişdir.
Layihənin əsas
məqsədi Azərbaycan gənclərini ictimai
məsuliyyətdə daha fəal iştirak etmək üçün
maarifləndirmək, Amerika institutları proqramını
tədris etmək və iki ölkə arasında mübadiləni
genişləndirməkdir.
Layihə
çərçivəsində gənclərin əvvəlcə Alabamaya, sonra
isə Arizona ştatına və Vaşinqtona səfərləri
nəzərdə tutulmuşdur. Hər ştatda Azərbaycanla
bağlı xüsusi bir günün keçirilməsi
planlaşdırılmışdır. |
