|
 Azərbaycan
Dillər Universitetinin İctimaiyyətlə əlaqələr və
mətbuat xidmətindən aldığımız məlumatda
bildirilir ki, iyunun 13-də 11 nəfərdən ibarət
bir qrup tələbə ABŞ Dövlət Departamentinin
Önəmli Dil Təqaüdü (ÖDS) Proqramı ilə Azərbaycan
dilini öyrənmək üçün Azərbaycan Dillər
Universitetinə gəlib.
ADU-da
olduqları müddətdə amerikalı tələbələr Yanardağ
və Atəşgaha, Tarix muzeyinə, müxtəlif dini
yerlərə, o cümlədən kilsələrə, məscidlərə və
sinaqoqlara, eləcə də Qala etnoqrafik muzeyi və
Botanika bağına gediblər. Bununla yanaşı,
Azərbaycanın qədim və tarixi yerlərindən biri
hesab olunan Şəki şəhərində də olublar. Onlar
Şəkidə olduqları zaman Şəki xan sarayı, Cümə
məscidi, Yeni Şəki qalası, Gələrsən-görərsən
qalası, Kiş kafedral alban məbədini ziyarət
ediblər. Amerikalı tələbələr Şəkidən başqa digər
qədim və gözəl şəhərlərimizdən biri Gəncə
şəhərinə də getdilər. Burada Xan bağı, Gəncə
hamamı, Cavadxan mavzoleyində oldular.
8 həftə
ərzində amerikalı tələbələr Azərbaycan dilini
öyrəndilər, Azərbaycanın mədəniyyəti, tarixi,
etnoqrafiyası haqqında biliklərə yiyələndilər.
Bununla yanaşı onlar Azərbaycan ailələrində
yaşayaraq ailə mədəniyyətini öyrəndilər.
Amerikalı tələbələrin bəziləri tar dərslərində
də iştirak etdilər.
Qeyd edək ki,
bu ilin Önəmli Dil Tələbələri sırasına
Azərbaycan dilini başlanğıc, orta və inkişaf
etmiş səviyyələrdə bilən tələbələr daxildir.
Proqrama ev sahibliyini Azərbaycan Dillər
Universiteti etdi. Proqram həftədə azı 20 saat
olmaqla qruplarda keçirilən intensiv dil təlimi
və təşkil olunmuş mədəni-maarifləndirici təcrübə
təqdim etdi.
Builki Önəmli
Dil Tələbələri Azərbaycan dili də daxil olmaqla,
14 prioritet dili öyrənən 575 ABŞ bakalavr və
magistrantlarının arasındadırlar. Onlar meyarlı
seçim prosesində 5200 ərizəçi arasından
seçiliblər.
2006-cı ildə
ABŞ Dövlət Departamenti amerikalı tələbələrin
xarici ölkələrdə önəmli dilləri öyrənmək
imkanlarını artırmaq məqsədilə İntensiv Yay
İnstitutları üçün Önəmli Dil Təqaüdləri
Proqramını başladı. Proqram ABŞ dövlətinin
Azərbaycan dili kimi önəmli dilləri öyrənən və
inkişaf etdirən amerikalıların sayını artırmaq
təşəbbüsünün bir hissəsidir.
Şakir CƏFƏROV |
