|
 Naxçıvan
Dövlət Universitetində İran İslam
Respublikasının Naxçıvandakı Baş Konsulluğunun
mədəniyyət mərkəzi ilə birlikdə böyük Azərbaycan
- İran şairi Seyid Məhəmmədhüseyn Şəhriyara
həsr olunmuş lMəhəmmədhüseyn Şəhriyarın sənət
dünyası» mövzusunda beynəlxalq elmi konfrans
keçirildi.
Ali məktəbin rektoru, akademik İsa Həbibbəyli
qonaqları salamlayaraq konfransın keçirilməsində
məqsədin iki qonşu ölkə arasında mədəni
əlaqələrin, dostluq münasibətlərinin
möhkəmləndirilməsindən ibarət olduğunu bildirdi.
Qeyd olundu ki, şeiri həyatın ən böyük möcüzəsi
adlandıran «Şərq dünyasının hafizi» - Şəhriyar
öz möhtəşəm poeziyası ilə sərhədsiz söz
dünyamızın mənəvi bütövlüyünün daha möhkəm, daha
əzəmətli olmasına əvəzsiz xidmətlər göstərmiş,
Yaxın Şərq ədəbiyyatını təravətli obraz və ifadə
vasitələrilə zənginləşdirmiş, dünya poeziyasına
«Heydərbabaya salam» kimi yüksək dərəcədə xəlqi
və sənətkarlıq baxımından nadir əsərlərdən
birini töhfə vermişdir.
İran İslam Respublikasının Naxçıvandakı baş
konsulu Məhəmmədtağı Məhəmmədəli konfransın
əhəmiyyətini vurğulayaraq Şəhriyarın yazdığı
bütün üslublarda yalnız bir mövzunun - Vətənin
mənəvi bütövlüyünü görmək, can qardaşlarının xoş
sədasını eşitmək mövzusunun üstünlük təşkil
etdiyini və hansı dildə yazmasından asılı
olmayaraq həmişə vicdanın səsinə qulaq asan,
başından keçən fikirləri səmimiyyətlə əks
etdirən dahi bir sənətkar olduğunu dedi.
Sonra məruzələr dinlənildi. Naxçıvan Dövlət
Universitetinin tədris işləri üzrə prorektoru,
filologiya üzrə fəlsəfə doktoru, dosent Hüseyn
Həşimlinin «Şəhriyar şeirlərinin janr
xüsusiyyətləri», Təbriz Universitetinin
Ədəbiyyat kafedrasının müəllimi, filologiya
elmləri doktoru, dosent Əbülfəz Əli Mühəmmədinin
«Şəhriyarın ədəbi məktəbi», Naxçıvan Dövlət
Universitetinin «Qeyrət» nəşriyyatının
direktoru, tarix üzrə fəlsəfə doktoru Vaqif
Məmmədovun «Ustad Şəhriyara ithaf olunan şeir və
nəzirələr», Urmiya Universitetinin rektoru,
filologiya elmləri doktoru, professor Məhbub
Taleyinin «Ustad Şəhriyarın sözlərində nöqtələr,
dəyərlər və irfaniyyə», Naxçıvan Dövlət
Universitetinin Azərbaycan ədəbiyyatı
kafedrasının dosenti Xanəli Kərimlinin
«Azərbaycan poeziyasında Şəhriyar mövzusu» adlı
məruzələri dinlənildi. Urmiya Universitetinin
Ədəbiyyat kafedrasının müəllimi, filologiya üzrə
fəlsəfə doktoru Mənsur Şükrinin, həmin
kafedranın müəllimi, filologiya üzrə fəlsəfə
doktoru Müzəffər Xudavəndigar Muğanın, Ərdəbil
Universitetinin Ədəbiyyat kafedrasının dosenti,
filologiya üzrə fəlsəfə doktoru Əsgər Şahinin
ifasında Şəhriyara həsr olunmuş şeirlərinin
bədii qiraəti səsləndi, İran Mədəniyyət
şöbəsinin müdiri Əli Əkbər Talehi Mətinin çıxışı
oldu. Sonda xatirə hədiyyələri təqdim olundu.
Konfrans öz işini İran İslam Respublikasının
Poldəşt şəhərində davam etdirdi. Naxçıvan
nümayəndə heyəti ustad Şəhriyarın Poldəşt
şəhərindəki heykəlini ziyarət edərək əklil
qoydu. Sonra şəhərlə tanışlıq oldu.
Nərmin CƏFƏROVA |
|
