|
"Dövlət qulluğu haqqında" Azərbaycan
Respublikasının Qanununda dəyişikliklər edilməsi
barədə" Azərbaycan Respublikasının 2011-ci il 17
may tarixli 126-İVQD nömrəli Qanununu elan
edirəm:
"Azərbaycan Respublikasının Milli Məclisi
Azərbaycan Respublikası Konstitusiyasının 94-cü
maddəsinin I hissəsinin 19-cu bəndinə əsasən
QƏRARA ALIR:
"Dövlət qulluğu haqqında" Azərbaycan
Respublikasının Qanununda (Azərbaycan
Respublikasının Qanunvericilik Toplusu, 2001-ci
il, ¹1, maddə 1, ¹3, maddə 131; 2002-ci il, ¹12,
maddə 693; 2003-cü il, ¹1, maddə 16; 2004-cü il,
¹1, maddə 10, ¹4, maddə 199, ¹5, maddə 321, ¹8,
maddə 597, ¹11, maddə 884; 2005-ci il, ¹6,
maddələr 463, 475, ¹10, maddə 874; 2006-cı il,
¹5, maddə 386, ¹6, maddə 479, ¹8, maddə 657,
¹11, maddə 927, ¹12, maddələr 1005, 1014;
2007-ci il, ¹2, maddə 83, ¹5, maddələr 434, 436,
¹7, maddə 711, ¹10, maddə 934, ¹11, maddələr
1049, 1074, 1078, ¹12, maddələr 1213, 1219;
2008-ci il, ¹3, maddə 153, ¹5, maddələr 326,
341, ¹6, maddələr 471, 481, ¹7, maddə 602, ¹8,
maddə 699, ¹10, maddə 881; 2009-cu il, ¹2, maddə
54, ¹5, maddə 311, ¹6, maddə 403, ¹10, maddə
771, ¹11, maddə 878, ¹12, maddə 964; 2010-cu il,
¹4, maddə 276; 2011-ci il, ¹3, maddə 165)
aşağıdakı dəyişikliklər edilsin:
1. Aşağıdakı məzmunda 32-1-ci maddə əlavə
edilsin:
"Maddə 32-1. Dövlət qulluğunda olmanın yaş həddi
32-1.1. Dövlət qulluqçusunun dövlət qulluğunda
olmasının yaş həddi 65-dir.
32-1.2. 65 yaşına çatmış dövlət qulluqçusunun
dövlət qulluğunda olma müddəti müvafiq dövlət
orqanının rəhbəri tərəfindən hər dəfə 1 ildən
çox olmayaraq uzadıla bilər. Dövlət
qulluqçusunun dövlət qulluğunda olma müddətinin
5 ildən çox uzadılmasına yol verilmir.
32-1.3. İnzibati vəzifələrin birinci-dördüncü
təsnifatına aid vəzifələrdə qulluq keçən dövlət
qulluqçusunun dövlət qulluğunda olma müddəti
müvafiq dövlət orqanının razılığı əsasında bu
Qanunun 32-1.2-ci maddəsində nəzərdə tutulmuş
müddətdən artıq uzadıla bilər.
32-1.4. Bu Qanunun 32-1.2-ci maddəsinə uyğun
olaraq dövlət orqanına aid edilən sahədə dövlət
qulluğunda olma müddəti uzadılmış dövlət
qulluqçularının sayı həmin dövlət orqanının
vahid sistemini təşkil edən qurumların
işçilərinin ümumi sayının 15 faizindən artıq ola
bilməz.
32-1.5. Dövlət orqanının aparatının və
tabeliyində olan qurumun çalışma müddəti
uzadılmış işçilərinin sayı müvafiq olaraq onun
aparatının və tabeliyində olan həmin qurumun
işçilərinin sayının 2 faizindən artıq ola
bilməz.
32-1.6. Dövlət orqanının aparatında və ya
tabeliyində olan qurumunda dövlət
qulluqçularının sayı 100 nəfərdən az olduqda,
çalışma müddəti uzadılmış işçilərin sayı iki
ştat vahidinə qədər yuvarlaqlaşdırılır.
32-1.7. Dövlət qulluqçusunun dövlət qulluğunda
olma müddətinin uzadılmasına onun razılığı
əsasında yol verilir.
32-1.8. Bu Qanunun 32-1.2-ci maddəsi tətbiq
edilərkən aşağıdakılar nəzərə alınır:
32-1.8.1. dövlət qulluğunda intizam tənbeh
tədbirlərinin tətbiq edilməməsi;
32-1.8.2. elmi dərəcənin və ya elmi adın olması;
32-1.8.3. dövlət təltifi ilə təltif edilmə;
32-1.8.4. attestasiyadan üç dəfə müvəffəqiyyətlə
keçmə.
2. 33.1.11-ci maddənin sonunda nöqtə işarəsi
nöqtəli vergül işarəsi ilə əvəz edilsin və
aşağıdakı məzmunda 33.1.12-ci maddə əlavə
edilsin:
"33.1.12. dövlət qulluğunda olmanın yaş həddinə
çatdıqda.".
İlham ƏLİYEV,
Azərbaycan Respublikasının Prezidenti
Bakı şəhəri, 17 may 2011-ci il. ¹ 126-İVQD"
Qanunun icrasını təmin etmək məqsədilə
ƏMR EDİRƏM:
1. "Dövlət qulluğu haqqında" Azərbaycan
Respublikasının Qanununda dəyişikliklər edilməsi
barədə" Azərbaycan Respublikasının 2011-ci il 17
may tarixli Qanunu rəhbərlik və icra üçün qəbul
edilsin.
2. Aparatın rəhbəri (İ.Pirməmmədov), Strateji
təhlil, planlaşdırma və kadrların idarə olunması
şöbəsi (F.Qədirov), Hüquq sektoru (E.Həsənov):
2.1.Qanunun 32-1.1-ci maddəsinə uyğun olaraq
Təhsil Nazirliyinin Mərkəzi aparatında və yerli
təhsili idarəetmə orqanlarında yaş həddi 65-ə
çatmış dövlət qulluqçularının siyahısını
hazırlayıb rəhbərliyə təqdim etsinlər.
2.2.Qanunun 32-1.8-ci maddəsində nəzərdə
tutulmuş meyarlar nəzərə alınmaqla yerli təhsili
idarəetmə orqanlarının təklifləri əsasında
Qanunun 32-1.2, 32-1.4, 32-1.5, 32-1.6 və
32-1.7-ci maddələrinə əsasən 65 yaşına çatmış
dövlət qulluqçularının dövlət qulluğunda olma
müddətinin uzadılması ilə bağlı təklifləri
hazırlayıb təqdim etsinlər.
3. Bakı Şəhəri üzrə Təhsil İdarəsi, Gəncə Şəhər
Təhsil İdarəsi, rayon (şəhər) təhsil şöbələri:
3.1.Qanunun 32-1.8-ci maddəsi ilə
müəyyənləşdirilmiş meyarlar nəzərə alınmaqla
Qanunun 32-1.2-ci maddəsində nəzərdə tutulmuş 65
və ondan yuxarı yaş həddində olan dövlət
qulluqçularının dövlət qulluğunda olma
müddətinin uzadılması ilə bağlı təkliflərini
hazırlayıb 10 gün ərzində nazirliyə təqdim
etsinlər.
3.2.Sonrakı mərhələlərdə 65 yaş həddinə çatmış,
habelə dövlət qulluğunda olma müddəti uzadılmış
dövlət qulluqçularının dövlət qulluğunda olma
müddətinin təkrar uzadılması ilə bağlı
təkliflərini 1 ay əvvəldən hazırlayıb nazirliyə
təqdim etsinlər.
4. İctimaiyyətlə əlaqə şöbəsi (B.Hüseynzadə)
əmrin "Azərbaycan müəllimi" qəzetində və "Təhsil
xəbərləri" məcmuəsində dərc olunmasını təmin
etsin.
5. Ümumi şöbə (X.Fərəcov) əmrin çoxaldılıb
yerlərə göndərilməsini təşkil etsin.
6. Əmrin icrasına nəzarəti öz üzərimə götürürəm.
Misir MƏRDANOV,
Azərbaycan Respublikasının təhsil naziri
15 iyul 2011-ci il |
