|
Ukraynada şagirdlər üçün vahid elektron dərslik
hazırlanır
Ukraynada şagirdlər üçün vahid elektron dərslik
hazırlanır. Bu barədə ölkənin təhsil və elm,
idman və gənclər naziri Dmitri Tabaçnik
açıqlama verib. Bu, məktəb kursu üzrə bütün
fənlərin təmsil olunduğu universal təhsil
toplusu olacaq. Dərslikdə həm məktəb, həm
məktəbdənkənar və həm də müəllim ehtiyatları
proqramlarına yer veriləcək. Nazir hesab edir ki,
bu, çox uğurlu variantdır, uşaqlar öz dərs
kurslarını 5-6-7-ci siniflər üzrə təkrarlaya
bilərlər. Tabaçnik ümid etdiyini bildirib ki,
tezliklə milli elektron dərsliyi işləyib
hazırlamaq və onu sertifikatlaşdırmaq mümkün
olacaq. Elektron dərsliyin tədrisi vaxtı və
onun maliyyələşdirilməsi barədə hələlik ətraflı
məlumat verilmir. Nazir qeyd edib ki, hazırda bu
məsələ üzərində işlər davam etdirilir.
MDB ölkələri arasında təhsil əlaqələri
genişlənir
Düşənbədə MDB üzvü olan ölkələrin təhsil
nazirlərinin 18-ci konfransı keçirilib.
Konfransda çıxış edən RF təhsil və elm naziri
Andrey Fursenko MDB ölkələrindən Rusiyaya təhsil
almağa gələn tələbələrin sayının 10 dəfə
artdığını bildirib. Cari ildə Rusiya ali
məktəblərinin MDB dövlətlərindən 5 min tələbə
qəbul edəcəyini deyən A.Fursenko MDB ölkələri
universitetləri arasında tələbə, aspirant,
tədris və təcrübə mübadilə proqramları sahəsində
müsbət tendensiyaların müşahidə olunduğunu
qeyd edib. Konfransda iştirak edən nazirlər MDB
Universitetlər Şəbəkəsinin fəaliyyətinin inkişaf
etdirilməsinə dəstək göstərilməsi, MDB ölkələri
təhsil işçilərinin II qurultayına hazırlığın
gedişi, təhsil sahəsində MDB ölkələrinin baza
təhsil təşkilatları arasında əməkdaşlıq
məsələlərini müzakirə ediblər.
Qeyd edək ki, MDB Universitetlər Şəbəkəsi
postsovet məkanı ölkələrinin ən iri
universitetlərini bir araya gətirməklə 2010-cu
ildən fəaliyyətə başlayıb. Şəbəkədə 8 ölkədən
olan 144 tələbə beynəlxalq hüquq, beynəlxalq
layihələrin idarə olunması, beynəlxalq
menecment, beynəlxalq təcrübə, filologiya (rus
dili və ədəbiyyatı) ixtisasları üzrə təhsil alır.
İstedadlı uşaqlar planetin gələcəyidir
Moskvada İttifaqlar Evinin Sütunlu Salonunda "İstedadlı
uşaqlar" Beynəlxalq Moskva Forumunun
iştirakçılarına mükafatların təqdim olunması
mərasimi keçirilib. Bu dəfə paytaxta Rusiyanın
26 regionundan və MDB ölkələrindən 615 laureat -
I-XI sinif şagirdləri gəlmişdilər. Sütünlu
Salona toplaşmış gənc istedadları, onların
valideynlərini, müəllimlərini və qonaqları
forumun təsisçisi Neonila Apatenko, "Rusiyanın
istedadlı uşaqları" hərəkatının vitse-prezidenti
Sergey Apatenko, MDU-nun professoru İrina
Kopyeva salamlamışlar. Mükafatlandırma mərasimi
Qran-prinin və "Rusiyanın gənc zəkaları"
ordenlərinin təqdimatı ilə başlayıb. Bu fəxri
mükafatları Yekaterina Şagina, Anna Pastuxova,
Olqa Qurova və Aleksey Boldakov alıblar. Sonra
forum laureatlarının qala-konserti olub. Çoxlu
uşaq doğma mədəniyyətlərini təmsil edərək
müxtəlif respublikaların milli mahnı və
rəqslərini ifa edib. Laureatların
mükafatlandırılması 20 nominasiya üzrə həyata
keçirilib. Onların sırasında "Gələcək
prezidentlər", "Kompüter dünyası", "Qonaqpərvərlik",
"Xalq yaradıcılığı" kimi nominasiyalar da olub.
Xarici mətbuat materialları əsasında
hazırladılar:
Yusif ƏLİYEV,
Oruc MUSTAFAYEV |
|
