|
 Amerika
Birləşmiş Ştatlarının paytaxtı Vaşinqton
şəhərində keçirilmiş IV Beynəlxalq Uşaq
Festivalına Bakı şəhəri Nizami Rayon
Uşaq-Gənclər Yaradıcılıq Mərkəzinin gənc
rəssamları da qoşulmuşlar.
Mərkəzin direktoru Lalə Qətinin sözlərinə görə,
Beynəlxalq Uşaq İncəsənət Fondunun təşəbbüsü
ilə "Ən sevdiyim idman növü" mövzusunda
keçiriləcək festivala 8-12 yaş arası rəsm çəkən
azərbaycanlı uşaqlar da qatılmalı idi. Mərkəzin
rəsm dərnəyinin üzvləri arasında bu mövzuda
müsabiqə elan etdik. Uşaqlar ən çox sevdikləri
idman növlərini rənglərin dili ilə təsvir
etdilər. Ən layiqli və məzmunlu 19 rəsm işi
festivala göndərildi.
İyun ayında mərkəzə xoş xəbər gəldi ki, rəsm
dərnəyinin üzvü 12 yaşlı Nərmin İsmayılzadə
festivalın qaliblərindən biri olub. Onun qədim
və milli idman növü sayılan güləşə həsr etdiyi
şəkil milli kolorizmi, məzmunu, orijinallığı və
rəng çalarlarına görə təşkilat komitəsi
üzvlərinin diqqətini cəlb etmiş və o, qaliblər
sırasına daxil olmuşdur.
Qeyd edim ki, Qubanın Uşaq Yaradıcılıq
Mərkəzinin gənc rəssamı Jalə Rizvanova da
festivalın qaliblərindəndir.
17-24 iyun tarixlərində Nərmin İsmayılzadə, gənc
rəssamın yetişməsində böyük əməyi olan dərnək
rəhbəri Nərmin Abdullayeva, eləcə də qubalı
gənc rəssam Jalə və onun dərnək rəhbəri Ramin
müəllimlə birgə dünyanın ən böyük, nüfuzlu
incəsənət və idman proqramı sayılan festivalda
iştirak etmək üçün Vaşinqton şəhərində olduq.
Vaşinqtonun Milli Mərkəzində keçirilən
festivalda 30-a yaxın ölkənin nümayəndələri
iştirak edirdilər. Azərbaycanı isə Nərmin və
Jalə təmsil edirdilər.
Maraqlı tədbirlərdən biri də iyunun 21-də
keçirildi. İştirakçılara tapşırıq verilmişdi ki,
böyük bir pannoda uşaqlar öz ölkələrinin
heyvanat aləmini təsvir etsinlər. Nərmin və Jalə
təbiət qoynunda ceyran və qaranquş rəsmini
təsvir etdilər. Dünya uşaqlarının birgə
yaratdığı bu əsər yekun tədbirdə nümayiş
etdirildi. Elə həmin tədbirdə qaliblərə
sertifikat təqdim olundu.
Lalə xanım onu da qeyd etdi ki, səfər boyu
Azərbaycanın Amerikadakı səfirliyinin
nümayəndələri bizi müşayiət etdilər. Bizi
Vaşinqtonun tarixi və görməli yerləri,
muzeyləri ilə tanış etdilər. İyunun 23-də
Azərbaycan Respublikası Silahlı Qüvvələr Günü
münasibətilə səfirliyin təşkil etdiyi böyük
tədbirə biz də dəvət olunduq. Tədbirə
toplaşan qonaqlar festivalda qazandıqları uğura
görə uşaqları təbrik etdilər.
Sifai SƏFƏROVA |
