|
Azərbaycan "2008-2012-ci illərdə təhsil
sisteminin informasiyalaşdırılması üzrə Dövlət
Proqramı" çərçivəsində Intel Beynəlxalq Elm və
Mühəndislik Sərgisinə (Intel ISEF) qoşuldu.
Sözügedən forum şagirdlər arasında keçirilən
dünyanın ən genişmiqyaslı elmi müsabiqəsidir.
Hər il müsabiqənin final mərhələsində 50-dən çox
ölkəni təmsil edən 3 minə yaxın şagird iştirak
edir.
Intel ISEF zamanı şagirdlər onları maraqlandıran
sahələrdə çalışan alim və mühəndislərlə ünsiyyət
saxlamaq, onlara sual vermək və qarşılarında
açılan perspektivlər haqqında daha geniş məlumat
almaq imkanı əldə edirlər. Intel ISEF
müsabiqəsinin 20-dən çox qalibi sonralar Nobel,
3-ü isə riyaziyyat sahəsində ali mükafat olan
Filds mükafatları laureatları olmuşlar.
Bu il ölkəmiz 2012-ci ildə keçiriləcək
müsabiqəyə qoşulmağa hazırlıq məqsədilə
"2008-2012-ci illərdə təhsil sisteminin
informasiyalaşdırılması üzrə Dövlət Proqramı"
çərçivəsində milli səviyyədə şagirdlər arasında
müsabiqə keçirməyi planlaşdırır. Müsabiqə ilə
yaxından tanış olmaq üçün Azərbaycan nümayəndə
heyəti cari ilin may ayında Los-Ancelesdə
keçirilmiş ümumdünya forumunda iştirak etmişdir.
Nümayəndə heyətinə Təhsil Nazirliyinin Elm
şöbəsinin müdiri Gültəkin Hüseynova, Bakı Dövlət
Universitetinin dosenti Ramin Mahmudzadə və
"Mədəd" təşkilatının nümayəndəsi Ülkər Babayeva
daxil idi.
Intel ISEF-in bütün iştirakçıları yerli,
regional və milli səviyyələrdə keçirilən
regional müsabiqələr zamanı seçilirlər. Hər bir
regional müsabiqə "İntel"in ümumdünya
elmi-texniki müsabiqəsinə iki fərdi və bir
komanda layihəsini təqdim edə bilər.
1950-ci ildə Amerika ictimaiyyətinin gücü
hesabına təşkil olunan ISEF 13-18 yaş arası
yeniyetmələr üçün nəzərdə tutulmuş bu tipli
yeganə beynəlxalq tədbirdir. Münsiflər heyətinin
tərkibinə daxil olan hakimlər ABŞ-ın aparıcı
institutlarının (Elektrik və Elektronika
Mühəndisləri İnstitutu (İEEE), Hesablama
Maşınları Assosiasiyasının (ACM)) professor və
əməkdaşlarıdır.
Intel ISEF müsabiqəsinin mükafat fondu 4 milyon
ABŞ dollarından çoxdur. Bu vəsait mükafat və
təqaüd şəklində bölüşdürülür.
Hicran ƏKBƏROVA |
