|
 Bakı
Dövlət Universitetinin rektoru, akademik Abel
Məhərrəmov V.N.Karazin adına Xarkov Milli
Universitetinin birinci prorektoru, professor
Vladimir Aleksandrovun rəhbərlik etdiyi
nümayəndə heyətini qəbul edib. Universitet
haqqında qonaqlara ətraflı məlumat verən rektor
Abel Məhərrəmov əsasən BDU-nun beynəlxalq
əlaqələrindən danışıb. İkitərəfli əməkdaşlıq
məsələlərinin müzakirə olunduğu görüşdə
nümayəndə heyətinin rəhbəri Xarkovda Azərbaycan
Mərkəzinin yaradılması fikrini açıqlayıb.
Görüşün nəticəsi olaraq Bakı Dövlət Universiteti
ilə Xarkov Milli Universiteti arasında anlaşma
memorandumu imzalanıb. Memorandum qarşılıqlı
mühazirələrin oxunması, elmin aktual problemləri
üzrə qarşılıqlı maraq doğuran sahələrdə birgə
elmi tədqiqatların aparılması, pedaqogika,
tədris metodikası, ali təhsilin strukturu
məsələlərində təcrübə və informasiya
mübadiləsini nəzərdə tutur.
Bundan başqa, tərəflər stajkeçmə və ixtisasın
artırılması məqsədi ilə müəllim, aspirant və
tələbə mübadiləsi, elmi məqalələrin, tədris
vəsaitlərinin, tədris planlarının və
proqramlarının, ədəbiyyatın mübadiləsi və hər
iki tərəfin nailiyyətlərini əks etdirən
sərgilərin təşkilində və digər məsələlərdə
əməkdaşlıq edəcəklər.
Ukraynalı qonaqlar BDU-nun laboratoriyaları ilə
tanış olub, Azərbaycan təhsili və elminin
flaqmanından xoş təəssüratlarla ayrılıblar.
BDU-nun Mətbuat və informasiya şöbəsi |
