|
 Müsahibimiz
"Regional Futbol Federasiyaları" İctimai
Birliyinin prezidenti, "Şöhrət" ordenli İsgəndər
Cavadovdur.
Gələn ayın əvvəllərindən dünyanın ən populyar
idman növü olan futbolun ölkəmizdə yüzillik
tarixi ilə bağlı yubiley tədbirləri keçiriləcək.
Bir əsrlik tarixi olan Azərbaycan futbolunun bu
müddət ərzində uğurları az olmayıb. Ölkəmiz
müstəqillik əldə etdikdən sonra idmanın bütün
sahələrində olduğu kimi, futbola da diqqət və
qayğı xeyli artmışdır. Futbolumuzun yubileyi
ərəfəsində məşhur dəri top ustası, AFFA-nın
İcraiyyə Komitəsinin üzvü, "Regional Futbol
Federasiyaları" İctimai Birliyinin prezidenti, "Şöhrət"
ordenli İsgəndər Cavadovla söhbət etdik.
İsgəndər Cavadov 1956-cı il sentyabrın 20-də
Bakı şəhərində anadan olub. Orta təhsilini 6
nömrəli internat-məktəbdə alıb. 1976-cı ildə
Azərbaycan Dövlət Bədən Tərbiyəsi və İdman
Akademiyasına daxil olaraq 1980-ci ildə oranı
bitirib. 1983-cü ildə Bakı Dövlət
Universitetinin hüquq fakültəsinə daxil olub.
Peşəkar idman fəaliyyəti ilə yanaşı, Respublika
Prokurorluğunda işləyir. Ailəlidir, iki oğlu
var.
- İsgəndər Cavadovun dünyaya göz açdığı yurd
yeri haqqında düşüncələri...
- Hər şeydən əvvəl, Azərbaycan futbolunun
yüzillik yubileyi münasibəti ilə bütün
idmansevərləri, veteranları, azarkeşləri və bu
idman növünün inkişafı üçün əmək sərf edənlərin
hamısını təbrik edirəm. Mən 6 nömrəli
internat-məktəbdə təhsil almışam. Uşaq
yaşlarımdan idmanın gimnastika və sərbəst güləş
növlərinə böyük həvəsim olub və bir neçə il bu
idman növləri ilə məşğul olmuşam. Təxminən on
yaşımdan sonra məhəllələrdə keçirilən futbol
oyunlarında oynamışam. Heç yadımdan çıxmır,
mənim boyum balaca olduğuna görə, məhlə uşaqları
məni ilk vaxtlar meydançaya buraxmırdılar. Amma
qardaşlarımın futbolçu olmalarını nəzərə alıb,
hərdənbir oyunlarda iştirak etməyə icazə
verirdilər. Sonradan mənim cəldliyimi görüb
komanda yoldaşlarım həmişə oyunlarda önə
çəkirdilər. Suraxanı və Balaxanı rayonlarının
uşaqları ilə məhəllələr və rayonlararası
yarışlar keçirirdik. Məhəllə futbolu məni bir az
da peşəkarlaşdırdı. 14 yaşımda məşqçilərin
köməyi ilə futbolun texniki sirlərini öyrənməyə
başladım. Uğurlarım da bundan sonra artdı.
- İsgəndər Cavadova futbolu sevdirən nə oldu?
 -
Ailədə 9 uşaq olmuşuq. Mən ailənin sonuncu
övladıyam. Məndən böyük qardaşlarım Rza Cavadov,
Tofiq Cavadov, Füzuli Cavadov da məşhur
futbolçular olub. Onların futbola həvəsi məndə
də bu idman növünə maraq oyatdı. Müəllimim
Eduard Dadaşoviç Cəbrayılovun mənim peşəkar və
təcrübəli futbolçu olmağımda böyük zəhməti
vardır. O, mənim boyumun balaca olmasına
baxmayaraq, çevikliyimə görə deyərdi: sən
peşəkar və tanınmış futbolçu olacaqsan.
1974-1976-cı illərdə "Xəzər" (Sumqayıt) və "Avtomobilçi"
(Bakı) komandalarında iştirak etmişəm. Təcrübə
toplayaraq 1977-ci ildən böyük futbola çıxdım.
1980-ci ildə idman ustası adına layiq görüldüm.
Peşəkar futbolçu kimi "Neftçi", "Dinamo"
klublarında çıxış etmişəm.
- Böyük futbola gəlməyinizdə kimlərin köməyini
gördünüz?
- Əldə etdiyim uğurlara görə həmişə özümü
ümummilli lider Heydər Əliyevə borclu bilirəm.
Məhz onun diqqət və qayğısı nəticəsində biz -
Maşallah Əhmədov, İqor Ponomaryov, Səməd
Qurbanov, Asim Xudiyev və başqaları peşəkar
futbolçu kimi yetişmişik. O, sovetlər dönəmində
respublikaya rəhbərlik etdiyi vaxt tez-tez
idmançılarla görüşür, onların problemləri ilə
maraqlanır və yerindəcə həll edirdi. Ötən əsrin
80-90-cı illərində "Neftçi"də yerli
futbolçuların artması da ulu öndərin diqqət və
qayğısı hesabına həyata keçmişdi. Onun tapşırığı
ilə komandamız üçün yeni təlim - məşq bazası
tikilmiş, respublika stadionu təmir olunmuşdu.
32 il bundan əvvəl Heydər Əliyev komandanın
üzvlərini qəbul etmişdi. Həmin görüşdə bir çox
məsələlər müzakirə olundu, bizə tövsiyələr
verildi. Ümummilli lider həmin görüşdə
bildirmişdi ki, "Neftçi"nin hər bir qələbəsinə
mən də xalqımız kimi sevinirəm. Ulu öndər "Neftçi"nin
o vaxtkı rəhbərliyinə tapşırmışdı ki,
Azərbaycanın bütün regionlarında olan istedadlı,
futbola marağı olan yeniyetmələri tapıb üzə
çıxarsın. Ümummilli liderimiz deyirdi ki, hər
bir idman növündə olduğu kimi, futbolda da böyük
məsuliyyət, özünə qarşı tələbkarlıq və əzmkarlıq
lazımdır. Bu görüşdən çox ruhlanmışdım. Bu
görüşdən sonra mənim həyatımda, futbolçu kimi
futbol karyeramda bir dönüş yarandı.
- Sizcə, futbolumuzu irəli aparmaq üçün idman
məktəblərində və cəmiyyətlərdə hansı işlər
görülməlidir?
 -
İlk növbədə, idman məktəblərində və idman
cəmiyyətlərində peşəkar müəllim - mütəxəssislər
olmalıdır. Müəllim bilməlidir ki, o, idmanın
hansı növünün incəliklərini uşaqlara öyrədir.
Sevinirik ki, ümummilli liderin layiqli
davamçısı ölkə başçısı cənab İlham Əliyevin
rəhbərliyi altında idmanın bütün sahələrində
Azərbaycan dünya ölkələri arasında öz sözünü
deyir. Ölkə başçısı futbolumuzun da dünya
standartlarına çatması üçün böyük işlər görür.
Bunun nəticəsi olaraq bu yaxınlarda ölkəmizdə
yüksək səviyyədə stadionun tikilməsinə start
verilib.
- Rəhbərlik etdiyiniz "Regional Futbol
Federasiyaları" İctimai Birliyi üç ildir ki,
fəaliyyət göstərir. Bu müddət ərzində hansı
işləri həyata keçirə bilmisiniz?
- Təşkilat hazırladığımız plan üzrə fəaliyyət
göstərir. Bölgələrdə futbol ictimaiyyətinin
nümayəndələri ilə görüşlər keçirilmişdir. "Danone"
klub yarışları bütün bölgələri əhatə etmişdir.
17 yaşlı futbolçular arasında region kuboku
yarışları keçirilmişdir. Ötən il 1995 -1996-cı
il təvəllüdlü futbolçular arasında yeddi region
üzrə yarışlar start götürmüşdür. Turnirdə
regionlar üzrə 45 komanda mübarizə aparırdı. Bu
yaxınlarda ikinci region kuboku keçirildi. Bu
turnirdə artıq 64 komanda iştirak etdi. Hesab
edirəm ki, futbolun inkişafında bölgələr diqqət
mərkəzində saxlanılmalıdır. Futbolumuzu irəli
aparmaq üçün bölgələrdə peşəkar kadrlar
işləməlidir. Bunun üçün müvafiq işlər görürük.
Xüsusilə qeyd etmək istərdim ki, məhz bütün
ölkədə kütləvi və uşaq futbolunun populyarlığı
bu idman növünün uğurlu sabahı üçün zəmin yarada
bilər. Uşaq futbolunun inkişafı üçün aidiyyəti
nazirliklər də böyük diqqət göstərirlər. Bu
yaxınlarda Təhsil Nazirliyi və AFFA-nın dəstəyi
ilə müasir standartlara cavab verən yüksək
səviyyədə stadion yeniyetmələrin istifadəsinə
verildi.
- Sonda xahiş edərdik ki, yarışlarda olan
maraqlı və yumoristik məqamlardan yadda qalanını
bizə danışasınız.
- Klubun fiziki baxımdan çox güclü olan
administratoru var idi. Uzun illər sərbəst güləş
və ağırlıqqaldırmaqla məşğul olduğuna görə,
həmişə çempionata səfərə gedəndə tibbi
avadanlıqlarla dolu olan ağır çanta götürərdi.
Güclü olduğuna görə fikir verməzdi ki, əlində 10
və yaxud 20 kq yük var. Mən də uşaqlarla
sözləşib zarafat üçün bunun çantasına 5 dənə
qırmızı kərpic qoydum. Hava limanının polis
işçiləri çantanı monitordan keçirəndə ona sual
verdilər ki, kərpicləri hara aparırsan. O
əsəbiləşdi ki, kərpic nədi, tibbi avadanlıqlar
aparıram. Çantanı yerə boşaldanda 5 dənə kərpic
çıxdı.
Hava limanının işçiləri bizimkilərlə yarım saat gülüşdülər.
Rəşad ZİYADOV |
