|
 Maqsud
Məmməd oğlu Məmmədov 1897-ci ilin dekabrında
İrəvan şəhərində anadan olub. İrəvan kişi
gimnaziyasını bitirib. Azərbaycan Politexnik
İnstitutunda, Yakov Sverdlov adına Kommunist
İnstitutunda təhsil alıb. 1936-cı ildə Moskvada
Qırmızı Professura İnstitutunun üçüncü kursunda
oxuyarkən Bakıya çağırılıb. Maqsud Məmmədov
1916-cı ildən ictimai və siyasi həyatda fəal
iştirak edib. 1917-ci ilin Fevral inqilabından
sonra şagird komitəsi təşkil edərək proletar və
zəhmətkeş ailələrdən olan şagirdləri ətrafına
toplayıb. Komitə tez-tez nümayişlər təşkil edib
və şagird qəzetinin nəşrinə nail olub. 1920-ci
ilin sentyabrından Azərbaycan Kommunist
Partiyası sıralarına qoşulub.
Əmək fəaliyyətinə 1915-ci ildə İrəvan şəhərində
müəllim kimi başlayıb. 1920-1923-cü illərdə Bakı
Şəhər Xalq Ərzaq Komissarlığı İdarəsinin rəisi
vəzifəsində çalışıb. 1925-1927-ci illərdə
Naxçıvan Muxtar Respublikası Fövqəladə Xalq
Maliyyə Komissarlığında işləyib, 1929-1930-cu
illərdə Azərbaycan Dövlət Universitetinin
(indiki Bakı Dövlət Universitetinin) rektoru
olub. 1930-1931-ci illərdə Azərbaycan xalq
maarifi komissarı vəzifəsində çalışıb. Maqsud
Məmmədov Azərbaycan xalqının təhsil və mədəni
səviyyəsinin yüksəlməsinə yönəlmiş partiya
kursunun uğurla həyata keçirilməsi üçün böyük
güc və enerji sərf edib.
1931-ci ildə Azərbaycan K(b)P MK-nın katibi
təyin edilən Maqsud Məmmədov 1933-cü ilə kimi bu
vəzifədə çalışıb.
1933-1934-cü illərdə Azərbaycan Partiya Tarixi
İnstitutunun direktoru olub.
 Partiya
işində zəngin təcrübəsini nəzərə alaraq onu
yenidən Mərkəzi Komitədə işləməyə dəvət edirlər.
1936-1937-ci illərdə Azərbaycan K(b)P MK-nın
şöbə müdiri işləyib, 1937-ci il iyulun 29-dan
sentyabrın 19-na qədər "Azərnəşr"in direktorunun
səlahiyyətlərini icra edib. Respublikanın
həyatında fəal iştirak edən Maqsud Məmmədovun
həmin dövrdə gördüyü işlər mətbuat səhifələrində
öz əksini tapıb, onun müxtəlif məsələlərlə bağlı
çıxışlarına geniş yer verilib.
Marksizm-leninizm ideyalarının fəal təbliğatçısı
olan Maqsud Məmmədov Azərbaycan K(b)P MK-nın
büro üzvü seçilib, 1933-cü ildə Azərbaycan
Dövlət Nəşriyyatında ilk dəfə Azərbaycan dilində
nəşr olunan "V.İ.Lenin. Seçilmiş əsərləri"
altıcildliyinin redaksiya heyətinin tərkibinə
daxil edilib. Həmcinin V.İ.Leninin Azərbaycan
dilində nəşr olunmuş digər seçilmiş əsərlərinin
redaktor və tərcüməçilər qrupunun tərkibində
təmsil olunub.
1925-1927-ci illərdə Naxçıvan Mərkəzi İcraiyyə
Komitəsinin, 1930-1934-cü illərdə Azərbaycan
K(b)P Bakı Komitəsinin, 1931-ci ildən Azərbaycan
K(b)P MK-nın, 1931-1933-cü illərdə Ümumittifaq
K(b)P Zaqafqaziya Diyar Komitəsinin üzvü
seçilib.
O, 1937-ci ilin sentyabrında Xalq Daxili İşlər
Komissarlığı tərəfindən həbs olunub,
repressiyaya məruz qalıb.
Maqsud Məmmədov 1938-ci ildə vəfat edib. |
