|
İyunun 13-də
Sumqayıt Dövlət Universitetində 2010-2011-ci
tədris ilinin məzunlarını yolasalma mərasimi
keçirildi. Tədbirdə SDU-nun rektoru, professor
Nadir Qəhrəmanov çıxış edərək məzunları təbrik
etdi, onlara gələcək müstəqil həyatlarında
müvəffəqiyyətlər dilədi. Rektor N.Qəhrəmanov
bildirdi ki, "Məzun günü" ilə universitetin
yaranma tarixi üst-üstə düşür.
 Düz
on bir il bundan əvvəl ümummilli lider Heydər
Əliyevin fərmanı ilə 2000-ci ilin iyun ayının
13-də Azərbaycan Sənaye İnstitutunun bazasında
Sumqayıt Dövlət Universiteti yarandı. Əgər
vaxtilə bu ali təhsil ocağında yalnız texniki
mütəxəssislər yetişdirilirdisə, bu gün
universitet çoxprofilli kadrların hazırlanması
ilə məşğuldur. Hazırda SDU-da 7 fakültə, 45
kafedra, əcnəbi tələbələrin hazırlıq mərkəzi,
zəngin kitabxana, 6 elmi-tədqiqat laboratoriyası
fəaliyyət göstərir. Əlamətdar hal budur ki,
əcnəbi tələbələrin ilk buraxılışıdır. Ümidvaram
ki, əcnəbi məzunlarımız hansı ölkədə fəaliyyət
göstərmələrindən asılı olmayaraq SDU-nun adını
uğurla təmsil edəcəklər.
Beynəlxalq
əlaqələrin ildən-ilə genişlənməsindən söhbət
açan rektor qeyd etdi ki, universitet TEMPUS
layihəsinə qoşularaq 4 layihənin qalibi olmuşdur
və universitetlərarası nailiyyətlərimiz az
deyildir. Beynəlxalq idman yarışlarında 18
tələbə qızıl medala layiq görülüb. Ümummilli
lider Heydər Əliyevin qurduğu, bu gün onun
siyasi kursunu layiqincə davam etdirən möhtərəm
Prezidentimiz İlham Əliyevin başçılıq etdiyi
Azərbaycan Respublikası qüdrətli ölkə kimi
həmişə yer üzərində bərqərar olacaqdır.
Məzunları
təbrik etmək üçün Azərbaycan Respublikası təhsil
nazirinin müavini Elmar Qasımov, Sumqayıt Şəhər
İcra Hakimiyyətinin səlahiyyətli nümayəndəsi
Rövşən Sadıqov, Sumqayıt Şəhər Təhsil Şöbəsinin
müdiri Vidadi Bağırov, şair-publisist Əvəz
Mahmud Lələdağ və başqaları tədbirdə iştirak
edirdilər.
Azərbaycan
Respublikası təhsil nazirinin müavini Elmar
Qasımov SDU-nun rektoru, professor Nadir
Qəhrəmanov başda olmaqla, bütün
professor-müəllim heyətini və məzunları təbrik
edərək dedi ki, SDU-nun həyatında əlamətdar
hadisə yaşanır. Belə ki, bu gün universitet
növbəti "Məzun günü"nü keçirir. Təbii ki,
məzunların formalaşmasında, uğurlarında
müəllimlərin əvəzsiz xidməti olmuşdur. Bu gündən
sonra harada çalışıb işləməyinizdən asılı
olmayaraq, öz universitetinizin adını uca
tutmalısınız.
Sumqayıt
gənclər şəhəridir. Siz də öz bilik və
savadınızla, gənclik ruhunuzla bu şəhərə enerji
verməlisiniz. Ulu öndər Heydər Əliyev dəfələrlə
Sumqayıtda olmuş, hər gəlişi ilə bu gənclər
şəhərini diqqət mərkəzində saxlamış, Sumqayıtda
elm və təhsilin inkişafına xüsusi qayğı
göstərmişdir.
Bu gün siz
universitetə "Əlvida" yox, "Hələlik"
deməlisiniz! Çalışın universitetlə əlaqənizi
kəsməyin və öz uğurlarınızla müəllimlərinizi
sevindirin.
Sumqayıt Şəhər
İcra Hakimiyyətinin nümayəndəsi R.Sadıqov
məzunları Sumqayıt Şəhər İcra Hakimiyyətinin
başçısı Eldar Əzizovun adından da təbrik edərək
fəaliyyətlərində uğurlar arzuladı.
Şair Əvəz
Mahmud Lələdağ çıxışında bildirdi ki, Sumqayıt
Dövlət Universiteti mənim üçün əziz və doğmadır.
Çünki bu universitetin rektoru, professor Nadir
Qəhrəmanov mənim yetirməm olub və mən onunla bu
gün yanaşı dayanmaqdan qürur hissi duyuram. Arzu
edirəm ki, siz də nə vaxtsa öz yetirmələrinizlə
belə qürur duyasınız. Mən bu gün sizin hər
birinizi millətimizə və dövlətimizə layiqli
vətəndaş kimi görmək istəyirəm.
Çıxışlar
bitdikdən sonra "Məzun günü" bədii hissəyə keçid
aldı. Respublikamızın tanınmış incəsənət
nümayəndələrinin ifasında mahnılar dinlənildi.
Universitetin "Səma" rəqs qrupunun ifasında rəqs
nömrələri izləndikdən sonra meydan məzunlara
verildi.
İlahə ƏHMƏD,
Sumqayıt Dövlət Universiteti
Mətbuat xidmətinin rəhbəri |
