|
Regionların
sosial-iqtisadi inkişafı Dövlət Proqramına uyğun
olaraq respublikamızın hər yerində olduğu kimi,
Beyləqan rayonunda da yeni məktəb binaları
tikilir. Beyləqan Rayon Təhsil Şöbəsindən
aldığımız məlumata görə, akademik M.Mehdizadə
adına şəhər 3 nömrəli tam orta məktəbin
tikintisi başa çatmışdır. Təhsil Nazirliyinin
vəsaiti hesabına "Saqibət İnşaat MMC"
tərəfindən inşa olunan 360 yerlik üçmərtəbəli
məktəbdə 16 sinif otağı, fizika və kimya
laboratoriyaları, kitabxana, kompüter otağı,
bufet, tibb otağı, akt və idman zalları vardır.
Laboratoriya
və sinif otaqlarında havatəmizləyici qurğular
quraşdırılıb. Təhsil ocağı müasir istilik
sistemi ilə təchiz olunmuş, su xətti və
kanalizasiya sistemi, transformator
yenilənmişdir. Məktəbin həyətində ağac əkilmiş,
gül kolları salınmış, asfalt örtüyü çəkilmiş və
ərazi hasarlanmışdır. Məktəb 2011-2012-ci tədris
ilinə hazır vəziyyətdədir.
***
Sabirabad
Rayon Təhsil Şöbəsinin müdiri E.Bünyadovdan
aldığımız məlumatda bildirilir ki, Təhsil
Nazirliyi tərəfindən rayonun Əsgərbəyli kənd
ümumi orta məktəbi üçün əlavə 9 sinif
otağının, idman zalının, Fövqəladə Hallar
Nazirliyi tərəfindən Yuxarı Axtaçı kənd tam orta
məktəbi üçün 250 şagird yerlik və Heydər Əliyev
Fondunun vəsaiti hesabına M.Ə.Sabir adına şəhər
1 nömrəli tam orta məktəbi üçün 1176 şagird
yerlik yeni məktəb binalarının tikintisinə
başlanılıb. Eyni zamanda Təhsil Nazirliyi
tərəfindən şəhər 6 nömrəli tam orta məktəbi üçün
200 şagird yerlik əlavə sinif otaqlarının
tikintisinin və bərpaedici təmir işlərinin
aparılmasına, şəhər 8 nömrəli tam orta və
Nərimankənd kənd tam orta məktəbləri üçün yeni
məktəb binalarının tikintisinə isə yaxın
günlərdə başlanılacaq. |
|
