|
Mətbuatda
xəbər verildiyi kimi, Almaniyanın Mayns
şəhərində Bakı Slavyan Universiteti Almaniyanın
nüfuzlu elm mərkəzi olan Mayns Universitetinin
Şərqşünaslıq İnstitutu və Germanistika bölümü,
həmçinin Volkenştayn Cəmiyyəti ilə birgə
"Kitabi-Dədə Qorqud" və "Nibelunqlar haqqında
nəğmə" - Orta əsr qəhrəmanlıq dastanlarında Şərq
və Qərb" adlı layihəsinin növbəti, ikinci
simpoziumunu keçirmişdir. Bu böyük layihə Bakı
Slavyan Universitetinin xarici ölkə
universitetləri və mədəniyyət mərkəzləri ilə
çoxşaxəli əməkdaşlığının yeni səhifəsini açır.
Layihə BSU-nun rektoru, AMEA-nın müxbir üzvü,
professor Kamal Abdullayevin təşəbbüsü ilə BSU
və Almaniyanın Mayns Universiteti arasında
bağlanmış müqaviləyə əsasən 2007-ci ildə təsis
edilmişdir.
Layihənin on
il müddətində həyata keçirilməsi və bu məqsədlə
iki ildə bir dəfə Azərbaycanda və Almaniyada
eposların ən müxtəlif aspektlərini əhatə edən
beş simpoziumun təşkili nəzərdə tutulmuşdur. Bu
simpoziumlar sözügedən dastanların ədəbi
xüsusiyyətləri, üslubiyyatı, nəşri və tərcüməsi,
kulturoloji aspektləri, eləcə də onların dərki
və xalqlarımızın dünyagörüşü və həyatında
oynadıqları rolla bağlı müxtəlif məsələləri
əhatə edir. Artıq layihə çərçivəsində 2009-cu il
30 sentyabr - 4 oktyabr tarixlərində Bakı
Slavyan Universitetində "Kitabi-Dədə Qorqud" və
"Nibelunqlar haqqında nəğmə" eposlarının
linqvistik təhlili" adlı ilk simpozium
keçirilmişdir.
Bu dəfə
Almaniyada keçirilən "Kitabi-Dədə Qorqud" və
Nibelunqlar haqqında nəğmə: Orta əsr qəhrəmanlıq
dastanlarında universalıyalar və spesifik
özünəməxsusluq" adlı ikinci simpozium hər iki
möhtəşəm eposun ədəbiyyatşünaslıq aspektlərinin
öyrənilməsi üçün atılmış mühüm bir addımdır.
Simpozium 2011-ci il 8-13 iyun tarixlərində
Almaniyanın Mayns şəhərində keçirilmişdir.
Azərbaycan alimlərinin böyük bir qrupu BSU-nun
rektoru, professor Kamal Abdullayevin rəhbərliyi
ilə simpoziuma qatılmışdır.
Beynəlxalq
elmi tədbir Almaniyanın Yohannes Gutenberg
Universitetinin Şərqşünaslıq seminarının müdiri,
professor Busxoten tərəfindən açıldı. O, öz
çıxışında ikinci konfransa hazırlıq işlərindən,
Bakı Slavyan Universiteti ilə Mayns Universiteti
arasında imzalanmış müqavilənin tarixindən
ətraflı söhbət açdı. Bundan əlavə, Busxoten öz
çıxışında professor K.Abdullayevin Mayns
Universitetində oxuduğu mühazirələr, BSU-nun
Alman filologiyası kafedrasının müdiri
F.Paşayevanın Almaniyada keçirdiyi Azərbaycan
dili dərsləri və professor Ziqlinde Hartmanın
mütəmadi olaraq BSU-da oxuduğu mühazirələr
haqqında da məlumat verdi.
Sonra
Almaniyanın Mayns Universitetinin rəhbərliyi
adından Mayns Universitetinin Filologiya
fakültəsinin dekanı Stephan Jolie çıxış edərək
bildirdi ki, keçirilən konfrans təkcə filologiya
və komparativstikanın (müqayisəli
ədəbiyyatşünaslığın) yox, eyni zamanda
xalqlarımız arasında mədəni əlaqələrin
inkişafında da böyük əhəmiyyət kəsb edir.
Professor Z.Hartmanın çıxışdan əvvəl qonaqları
Azərbaycan dilində salamlaması alqışlarla
qarşılandı.
Bakı Slavyan
Universitetinin rektoru, AMEA-nın müxbir üzvü,
professor Kamal Abdullayev öz çıxışında qeyd
etdi ki, konfransın ərsəyə gəlməsində böyük əmək
sərf olunub. O, həmçinin alman həmkarlarına, o
cümlədən Osfald fon Folkanştayn cəmiyyətinin
prezidenti xanım Ziqlinde Hartmana, Alman
Filologiyası İnstitutunun direktoru, professor
Utu Ştörmer-Krayza və Yohannes Gutenberg
Universitetinin Şərqşünaslıq seminarının müdiri
Busxotenə dərin təşəkkürünü bildirdi. Professor
K.Abdullayev öz nitqini "Kitabi-Dədə Qorqud" və
yunan mifoloji motivləri" adlı elmi məruzə ilə
davam etdirdi. Sonra konfransda alman və
Azərbaycan alimlərinin elmi məruzələri böyük
maraqla dinlənildi.
Konfransın ilk
iş günü başa çatdıqdan sonra Azərbaycan
nümayəndə heyətinin şərəfinə şəhər meriyasında
Mayns şəhərinin oberburqomaysteri tərəfindən
ziyafət təşkil olundu. Ziyafətdə həm alman, həm
də Azərbaycan nümayəndə heyətləri iştirak
edirdilər. Mayns şəhərinin meri Jens Beutel
qeyd etdi ki, simpozium ölkələrimiz arasında
elmi və mədəni əlaqələrin genişlənməsində böyük
rol oynayır və əlbəttə ki, bu cür möhtəşəm
tədbirlər xalqlarımız arasında elmi əlaqələrin
inkişaf etməsi üçün önəmli addımdır. Bundan
əlavə, qeyd olundu ki, "Bakı və Mayns
qardaşlaşmış şəhərlərdir və biz bu
münasibətlərin dərinləşməsi, genişlənməsi üçün
əlimizdən gələni etməliyik".
Konfransın
ikinci iş günündə də elmi məruzələr dinlənildi.
Tədbirdə doktor Eberhard Kummerin "Nibelunqlar
haqqında nəğmə"dən ifa etdiyi hissələr
dinləyicilər tərəfindən yüksək rəğbətlə
qarşılandı və professor K.Abdullayev doktor
Eberhard Kummeri Bakıya dəvət etdi.
Konfransın
sonuncu günü məruzələr bitdikdən sonra professor
Busxoten konfransın nəticələri və ümumi
yekunları haqqında məlumat verdi. Bildirdi ki,
Bakıda keçirilmiş ilk simpoziumun uğurlu davamı
olan ikinci konfrans 10 illik layihə
çərçivəsində həyata keçirilən elmi araşdırmalar
üçün yeni zəmin yaratmış, elmi əməkdaşlığın
inkişafında yeni səhifə açmışdır: "Əminəm ki,
Bakıda keçiriləcək növbəti simpozium bu iki
möhtəşəm eposun bir-birinə daha da
yaxınlaşmasına, onlar haqqında bizim
biliklərimizin daha da dərinləşməsinə,
mədəniyyətlərarası dialoqun inkişafına yeni
təkan verəcək".
Yekun
iclasında çıxış edən professor K.Abdullayev
"Dədə Qorqud"a göstərdikləri böyük diqqət və
qayğıya görə alman alimlərinə dərin təşəkkürünü
bildirdi və qeyd etdi ki, bu konfransın ən böyük
nailiyyətlərindən biri germanistlərin
"Kitabi-Dədə Qorqud"a, türkoloqların isə
"Nibelunqlar haqqında nəğmə"yə olan diqqət və
marağının artırmasıdır. Sonda BSU-nun rektoru
tədbir iştirakçılarını 2013-cü ildə Bakıda
keçiriləcək növbəti, üçüncü simpoziuma dəvət
etdi.
Simpozium
təkcə elmi araşdırmalarla deyil, eyni zamanda
geniş mədəni proqramla da yadda qaldı. Belə ki,
Almaniyanın bir çox tarixi və mədəni
abidələrinə, o cümlədən Nibelunqlar muzeyinə və
Nibelunqların vətəni sayılan Vorms şəhərinə,
orta əsr Alman kilsəsinə ekskursiya, Reyn çayı
ilə tarixi-mədəni yerlərə səyahət təşkil
edildi.
BSU-nun Mətbuat xidməti |
