|
Gürcüstanın
Qardabani rayonunun Qaratəhlə açıq məktəbində
Azərbaycanlıların Mədəniyyət Mərkəzinin (AMM)
Qaratəhlə və Ağtəhlə məktəblərində təşkil etdiyi
gürcü dili kurslarının müəllimləri tədbir
keçirmişlər.
Azərbaycan
Respublikası Diasporla İş üzrə Dövlət
Komitəsindən AzərTAc-a bildirmişlər ki,
Qaratəhlə məktəbinin direktoru Elza Həsənova
şagirdlərin gürcü dilini öyrənməyə böyük
marağından, bu işdə AMM-in təşkil etdiyi
kursların əhəmiyyətindən danışmışdır.
Bildirmişdir ki, məktəbin 15 siniflik binası bp
neft şirkəti və yerli əhalinin köməyi ilə
tikilmişdir. Burada təhsil alan 285 şagirdin
təlim-tərbiyəsi ilə 23 nəfərlik pedaqoji
kollektiv məşğul olur. Məktəbdə fəaliyyət
göstərən gürcü dili kurslarında hazırda 20
azərbaycanlı şagird gürcü dilini öyrənir.
Ağtəhlə
məktəbində fəaliyyət göstərən gürcü dili
kurslarına Sofio Koberidze rəhbərlik edir.
Kurslarda 24 şagird gürcü dilini öyrənir. Bir
ildir fəaliyyət göstərdiklərinə baxmayaraq,
böyük uğurlar qazandıqlarını qeyd edən
S.Koberidze şagirdlərin böyük həvəslə kurslara
gəlməsini, ikinci bir qrupun açılmasına ehtiyac
olduğunu da bildirmişdir. Məktəbin direktoru
Ketevan Koçiaşvili qeyd etmişdir ki, builki
buraxılış sinifləri gürcü dili fənni üzrə test
imtahanlarını 6,5-7 bal göstəricisi ilə başa
vurmuşlar ki, bu da çox yüksək göstəricidir.
K.Koçiaşvili belə yüksək göstəricilərin əldə
olunmasında AMM-in təşkil etdiyi kursların böyük
rolunu vurğulamışdır.
Sonra
Qaratəhlə məktəbinin binasında hər iki məktəbin
nəzdində fəaliyyət göstərən gürcü dili
kurslarında oxuyan şagirdlərin iştirakı ilə
Gürcüstanın və Azərbaycanın müstəqillik gününə
həsr olunmuş tədbir keçirilmişdir. Qaratəhlə
məktəbinin dil-ədəbiyyat müəllimi Məhərrəm
Cəfərov may ayının hər iki xalq üçün əlamətdar
olduğunu vurğulamış, tədbir iştirakçılarını
bayram münasibətilə təbrik etmişdir.
Tədbirdə
şagirdlər hər iki ölkənin dövlət himnlərini
səsləndirmiş, Azərbaycan və gürcü dillərində
şeirlər oxumuş, səhnəciklər göstərmişlər.
Şagirdlərin ifası alqışlarla qarşılanmışdır.
AMM-in
əməkdaşı Əbülhəsən Əzizov tədbir iştirakçılarını
Azərbaycan və Gürcüstanın milli bayramları
münasibətilə təbrik etmiş, gürcü dili
kurslarının işinin yüksək səviyyədə təşkilinə
görə hər iki məktəbin rəhbərliyinə təşəkkürünü
bildirmişdir.
Tədbirdə
Kvemo-Kartli qubernatorunun köməkçisi Ramilə
Allahyarova iştirak etmişdir. |
