|
 Bu
il ölkəmizdə ibtidai təhsil pilləsini başa vuran
10 minlərlə şagirdin arasında Bakıdakı 8 nömrəli
tam orta məktəbin rus bölməsi üzrə IV "a" sinif
şagirdləri də var. Onlar həyatlarındakı bu mühüm
hadisəni mayın 25-də - Respublika günü
ərəfəsində məktəbdə keçirdikləri bayram şənliyi
ilə qeyd etdilər. Dördüncülər öz müəllimləri, "Ən
yaxşı müəllim" müsabiqəsinin 2009-2010-cu tədris
ili üzrə qalibi Jalə Zeynalovanın rəhbərliyi
altında maraqlı bayram proqramı hazırlamışdılar
və bir saat ərzində onu məharətlə təqdim etdilər.
Şənlikdə məktəbin direktoru Aytən Baxşıyeva,
direktor müavini Sevinc Əliyeva və dördüncülərin
valideynləri də iştirak edirdilər. Məşhur "Ələddinin
sehirli çırağı" nağılının motivləri əsasında
hazırlanmış kompozisiya bir neçə şagirdin
ifasında mahnı ilə başladı.
Şagirdlər nağılın personajlarına uyğun yaraşıqlı
al-əlvan geyimlərdə idi. Uşaqların çıxış
etdikləri səhnə də buna uyğun tərtib edilmişdi.
Nağıldakı əhvalatlar uşaqlar tərəfindən
məharətlə canlandırıldı. Eyni zamanda şagirdlər
kompozisiya boyu vətənpərvərlik ruhlu şeirlər
söylədilər, mahnılar, rəqslər ifa etdilər.
Bayram tədbiri həm də bir növ onların 4 ildə
bilik, bacarıq və vərdişlərə necə
yiyələnmələrinin, istedad və qabiliyyətlərini
necə inkişaf etdirmələrinin nümayişinə çevrildi
və şagirdlər təhsilin növbəti pilləsinə mükəmməl
hazırlıqla qədəm qoyduqlarını sübut etdilər.
Tədbirin sonunda dördüncülərin sinif müəllimi
Jalə Zeynalova yetirmələrini ibtidai təhsil
pilləsini başa vurmaları münasibəti ilə təbrik
etdi. Ötən 4 il ərzində məktəbdə çox şey
öyrəndiklərini, böyüdüklərini, biliklərin
əsasları ilə bərabər zəruri həyati bacarıq və
vərdişlər də qazandıqlarını, yaradıcı təfəkkürə
yiyələndiklərini bildirən J.Zeynalova
yetirmələrinə harada olurlarsa olsunlar, ilk
müəllimlərini, ibtidai məktəb həyatını
unutmamağı tövsiyə etdi, onlara təhsilin növbəti
pilləsində uğurlar arzuladı.
Məktəbin direktoru Aytən Baxşıyeva, onun müavini
Sevinc Əliyeva və valideynlər də şagirdləri,
övladlarını məktəb həyatının ilk pilləsini başa
vurmaları münasibəti ilə təbrik etdilər, onlara
cansağlığı, xoşbəxtlik, təhsillərində uğurlar
arzuladılar. Çıxışlarda 20 ildən çox pedaqoji
təcrübəyə malik, çalışdığı bütün illərdə
innovativ fəaliyyəti, yaradıcı axtarışları ilə
fərqlənmiş, bir sıra öyrədici kursların
iştirakçısı olmuş ibtidai sinif müəllimi Jalə
Zeynalovanın zəhməti yüksək qiymətləndirildi,
uşaqların bayram tədbirini olduqca maraqlı
aparmaları qeyd olundu. Sonra mərasimin kövrək
anları yaşandı: 4-cülər öz müəllimləri ilə
vidalaşıb 4 ildə onlara göstərdiyi qayğıya və
məhəbbətə görə ilk müəllimlərinə minnətdarlıq
etdilər, gül dəstələri bağışladılar.
Yusif ƏLİYEV |
|
