|
 Bakı
şəhəri 144 nömrəli orta məktəbdə təhsil
işçilərinin, məktəblilərin, valideynlərin
iştirakı ilə "Ozanların ruhu bizi çağırır"
adlı tədbir keçirilmişdir. Tədbirin təşkilatçısı
məktəbin ibtidai sinif müəllimi Firəngiz
Bayramova giriş sözü ilə tədbiri açaraq qədim
zamanlardan aşıq poeziyasının beşiyi sayılan
Azərbaycanın qərbində Göyçə gölünün sahilləri
boyu geniş bir ərazini əhatə edən tarixi mahal -
Göyçə mahalı haqqında ətraflı məlumat vermiş,
yüzlərlə aşıq yetişdirən bu mahalın Dədə
Ələsgərin həyat və yaradıcılığında xüsusi yeri
olduğunu bildirmişdir.
Aşıq poeziyasının günəşi olan Dədə Ələsgər
yaradıcılığından danışmaq çətin olduğu qədər də
maraqlıdır. Aşıq demək olar ki, xüsusi təhsil
görməmişdir. Lakin bununla belə o,
saysız-hesabsız qoşma, təcnis, gəraylı,
bağlamalar söyləmişdir. Aşıq
Ələsgər poeziyasının dili o qədər
sadə, şirin və yaddaqalandır ki, əsr yarımdan
çox bir zamanda bu əsərlər xalqın dilinin əzbəri
olmuşdur.
Aşıq Ələsgər poeziyasının ədəbiyyatımızdakı
əhəmiyyətindən danışan Firəngiz müəllim
zaman-zaman yadelli işğalçıların qəsbkarlığı
nəticəsində əsarətdə qalmış torpaqlarımızdan, bu
torpaqlarda məzarları dağıdılmış dəyərli
sənətkarlardan söz açmış, işğal olunmuş
torpaqlarımızın tezliklə Azərbaycan
diplomatiyasının, şəxsən Prezident İlham
Əliyevin səyi nəticəsində geri qaytarılacağına,
Azərbaycan bayrağının Göyçədə dalğalanacağına,
Dədə Ələsgərin nigaran ruhunun sakit olacağına
ümidvar olduğunu bildirmişdir.
Sonra Göyçə gölü formasında bəzədilmiş səhnə
gənc istedadların ixtiyarına
verilmişdir.Şagirdlərdən Aysel Gözəlova, Ayan
Abbasova, Nərmin Əliyeva, Uğur Paşayev, Fərid
Vəlizadə və Sabir Əliyevin ifasında Aşıq
Ələsgər poeziyasından, əsərlərinə bəstələnmiş
mahnılardan, eyni zamanda müasir şairlərin
şeirlərindən parçalar səslənmişdir. İfaçılar
ədəbi kompozisiya vasitəsilə qürbətdə qalan
Göyçə nisgilini, Şuşa həsrətini qəribə bir
hüznlə tədbir iştirakçılarına çatdırmışlar.
Tədbir boyunca 30-cu illərin Göyçəsini, həmçinin
işğal olunmamışdan bir az öncəki Göyçəni, Aşıq
Ələsgərin 1972-ci ildə Göyçədə keçirilən 150
illik yubileyini əks etdirən fraqmentlər slayd
şəklində nümayiş etdirilmişdir.
Göyçə həsrətli qonaqlar bir anlıq Göyçə mahalına
səfər etmiş, bu ayrılığın ağrı-acısını
yaşamışlar. Tədbirdə Bakı Şəhəri üzrə Təhsil
İdarəsinin məsləhətçisi İ.İsgəndərov, 3 nömrəli
orta məktəbin direktoru N.Novruzov, şair Məcnun
Göyçəli və başqaları Azərbaycan tarixinin
səhifələrini vərəq-vərəq açan belə tədbirlərin
keçirilməsinin formalaşmaqda olan gənc nəsil
üçün çox böyük əhəmiyyət daşıdığını qeyd etmiş,
məktəbin rəhbərliyinə və pedaqoji kollektivinə
uğurlar arzulamışlar.
Rövşən TALIBOĞLU |
|
