|
 Bakıdakı
287 nömrəli "Zəkalar" liseyi yüksək intellektual
qabiliyyətə malik uşaqları aşkara çıxarmaq və
liseydə təhsilə cəlb etmək, onların hərtərəfli
inkişaflarına nail olmaq məqsədi ilə hər il
müxtəlif tədbirlər - bilik yarışları,
müsabiqələr, olimpiadalar keçirir. Artıq ənənə
halını almış belə tədbirlərdən biri də liseyin
yarandığı 1992-ci ildən bəri hər il Respublika
günündə təşkil olunan məntiq olimpiadasıdır.
Mayın 28-də liseydə "Zəka-2011" devizi altında
növbəti belə olimpiada keçirildi. Respublika
gününə həsr olunmuş məntiq olimpiadasında hər il
olduğu kimi, bu il də 7-ci sinif şagirdləri
iştirak edirdilər. Yarışa liseyin şagirdləri ilə
birlikdə paytaxtın digər təhsil ocaqlarından
gəlmiş 207 məktəbli qatılmışdı. Olimpiada
başlamazdan əvvəl onun haqqında bizə ətraflı
məlumat verən liseyin direktoru, biologiya
elmləri üzrə fəlsəfə doktoru, əməkdar müəllim
Aygün Əhmədli tədbir çərçivəsində xüsusi bədii
proqramla həm də 28 May - Respublika gününü qeyd
etdiklərini bildirdi. Dedi ki, olimpiadanın
əsas özəlliklərindən biri onun şagirdlərin
özləri tərəfindən aparılması və
qiymətləndirilməsi, liseyin əvvəlki illərinin
tanınmış məzunlarının tədbirdə yaxından iştirak
etmələridir. Məzunlar həm də tədbirə sponsorluq
köməyi göstərir, qaliblər üçün pul mükafatı
ayırır, hədiyyələr alırlar.
Liseyin
həyətində keçirilən açılış mərasimində yarışmaya
gəlmiş şagirdlərin valideynləri və çoxlu qonaq -
müxtəlif ali məktəblərdən alimlər, Xətai Rayon
İcra Hakimiyyətindən nümayəndələr, məktəb
direktorları iştirak edirdilər.
Bayram tədbiri
ulu öndər Heydər Əliyevin təhsillə, vətənimizin
müstəqilliyi ilə, gənclərə vətənpərvərlik
hissinin aşılanması ilə bağlı söylədiyi müdrik
kəlamların səsləndirilməsi ilə başladı. Dövlət
himni ifa olundu. Tədbirin aparıcıları olan
şagirdlər Azərbaycan Cümhuriyyətinin yaranması,
müstəqilliyimizin əldə olunduğu tarixi şərait,
ADR-in fəaliyyəti, onun qəbul etdiyi dövlət
bayrağı, himni haqqında geniş məlumat verdilər.
Liseyin
direktoru A.Əhmədli çıxış edərək mərasim
iştirakçılarını salamladı və Respublika günü
münasibəti ilə təbrik etdi. Təbrik nitqində
liseyin son illərdəki uğurlarından söz açan
direktor bu il 8 şagirdin respublika fənn
olimpiadalarında mükafata layiq yerlər
tutduğunu, yetirmələrinin ölkə telekanalları ilə
yayımlanan müxtəlif intellekt yarışlarının
qalibləri olduğunu, xarici universitetlərdə
təhsil aldıqlarını bildirdi. Liseyin
məzunlarının uğurlarından da söz açan A.Əhmədli
tədbirdə iştirak edən məzunları qonaqlara təqdim
etdi.
Sonra məntiq
olimpiadasının təşkilatçısı, liseyin riyaziyyat
müəllimi Rafil İmanov yarışın əhəmiyyətindən,
aparılma qaydalarından danışdı, məktəblilərə
uğurlar arzuladı.
Həyətdə sıra
ilə düzülmüş şagirdlər olimpiada tapşırıqlarını
həll etmək üçün sinif otaqlarına yollandıqdan
sonra liseyin və şəhər 11 nömrəli musiqi
məktəbinin şagirdləri birgə hazırladıqları
konsert proqramını təqdim etdilər. İstedadlı
uşaqlar Vətənə, məktəbə, müstəqilliyimizə həsr
olunmuş şeirlər söylədilər, mahnılar, rəqslər
ifa etdilər, səhnəciklər göstərdilər. Milli
Qəhrəman Mübariz İbrahimovun şücaətindən bəhs
edən səhnəcik tədbir iştirakçıları tərəfindən
alqışlarla qarşılandı.
Bədii hissə
başa çatdıqdan sonra Xətai Rayon İcra
Hakimiyyətinin şöbə müdiri Pənah İmanov, Bakı
Şəhəri üzrə Təhsil İdarəsinin məsul işçisi
Uğurlu Abbasov, BDU-nun professoru Həşim
Şimiyev, 191 nömrəli məktəbin direktoru Rəhimə
Əliyeva, 147 nömrəli texniki-humanitar liseyin
direktoru Həlimə Mehdiyeva, 191 nömrəli məktəbin
müəllimi Fərhad Tağıyev, 48 nömrəli məktəbin
müəllimi Nurəddin Nurəddinov, liseyin sabiq
müəllimi, hazırda AMEA-nın elmi əməkdaşı Sahib
Əhmədov, məzunlar çıxış edərək tədbiri yüksək
qiymətləndirdilər. Şərqdə ilk demokratik
respublika olmuş Azərbaycan Demokratik
Cümhuriyyətinin fəaliyyətindən, liseyin
uğurlarından söz açdılar, burada yaradılmış
yüksək təhsil mühitinin liseyin direktoru
A.Əhmədlinin, yaradıcı müəllimlərin zəhmətinin
nəticəsi olduğunu vurğuladılar.
Tədbirin
sonunda məntiq olimpiadasının nəticələri
açıqlandı. Bu barədə məlumat verən Rafil İmanov
təqdim olunan məntiq çalışmalarını daha düzgün
və çox həll edərək yüksək bal toplamış
şagirdlərin olimpiadanın qalibi elan olunduğunu,
ənənəyə uyğun olaraq qaliblərdən 3-nün "Zəkalar"
liseyini, 7-nin isə paytaxtın digər təhsil
ocaqlarını təmsil etdiyini söylədi və I, II
yerləri tutmuş şagirdlərin adlarını açıqladı.
Qaliblərə pul mükafatları və hədiyyələr, o
cümlədən riyaziyyat ensiklopediyaları və digər
kitablar təqdim olundu.
Yusif ƏLİYEV |
|
