|
 "Rusiya
dünyası" Fondunun tədbirləri çərçivəsində Bakı
Dövlət Universitetinin "Rus Mərkəzi"ndə
Moskvanın A.S.Puşkin adına Dövlət Rus Dili
İnstitutunun və BDU-nun filologiya fakültəsinin
nümayəndələrinin iştirakı ilə seminar
keçirilmişdir.
BDU və Bakı
Slavyan Universitetinin müəllim və
tələbələrinin, Azərbaycan Texniki
Universitetinin rus dili kafedrası
nümayəndələrinin də qatıldıqları seminarda
Azərbaycanda rus dilinin yeri və rolu, elm
sahəsində ikitərəfli əlaqələrin
möhkəmləndirilməsi barədə söz açılmışdır.
BDU-nun
mətbuat xidmətindən AzərTAc-a bildirmişlər ki,
"Rus Mərkəzi"nin rəhbəri, dosent Fikrət Rzayev
Mərkəzin fəaliyyəti barədə seminar
iştirakçılarına ətraflı məlumat vermişdir. Daha
sonra professor Tatyana Savçenko "Müasir rus
ədəbiyyatında yeni adlar və hadisələr", dosent
Alla Konstantinova "Müasir rus dilində gerçək
proseslər", professor Elxan Əzimov "Rus dilinin
xarici dil kimi öyrədilməsində yeni üsullar və
texnologiyalar" mövzularında məruzələrlə çıxış
etmişlər.
Tədbirdə rus
dilində baş verən dəyişikliklər barədə
diskussiya aparılmış, böyük rus şairlərinin
şeirləri səsləndirilmiş, suallar
cavablandırılmışdır.
Moskvalı
qonaqlar dilçilik, klassik və müasir rus
ədəbiyyatı, həmçinin humanitar və təbiət elmləri
fakültələrinin rus dili kafedralarında ustad
dərsləri keçmişlər. |
