|
Bu gündən Rusiyada Vahid Dövlət İmtahanları
başlayır. Təhsil və elm sahəsinə nəzarət üzrə
Federal Xidmətin başçısı Lyubov Qlebovanın
sözlərinə görə, mayın 27-də Rusiya
məktəblərində informatika, biologiya və
ədəbiyyat fənləri üzrə imtahanlar keçiriləcək.
Məcburi fənlər hesab olunan rus dili və
riyaziyyat üzrə VDİ imtahanları isə mayın 30-da
və iyunun 6-da keçiriləcək. Mayın 27-dən iyunun
14-ə kimi 6 imtahan günü təyin olunub. VDİ qəbul
məntəqələrində 3 milyona yaxın iş yoxlanılacaq.
Bu, ötən illə müqayisədə 10 faiz aşağıdır. Bu
isə orta məktəb məzunlarının sayının azalması
ilə bağlıdır. Ötən il bu rəqəm 837 min təşkil
edibsə, bu il məktəbi bitirənlərin sayı 727,5
min nəfərdir. Ümumilikdə Vahid Dövlət
İmtahanından cari ildə 827 mindən bir qədər az
rusiyalı keçəcək. Bu il orta məktəb məzunları
arasında seçim fənni kimi fizika fənni daha
populyardır. VDİ-də iştirak edən məktəblilərin
27,2 faizi bu fəndən imtahan verməyə qərar verib.
İmtahana qatılanların 23,2 faizi tarixi, 21,6
faizi biologiyanı seçib. Məktəblilərin könüllü
olaraq seçdikləri, ən çox tələb olunan tədris
fənni ictimaiyyatdır (55,6 faiz).
Vahid Dövlət İmtahanının keçirilməsi üzrə ən
maraqlı məqam ondan ibarətdir ki, bu il ilk dəfə
olaraq ictimai müşahidəçilər imtahanların
gedişinə nəzarət etmək imkanı qazanacaq. Bütün
qəbul imtahan məntəqələrində ictimai
müşahidəçilərin iştirakı təmin olunub. Təhsil
və elm sahəsinə nəzarət üzrə Federal Xidmət VDİ
üzrə tapşırıqların İnternetdə yayılmasına görə
məktəblilərin mülki və cinayət məsuliyyəti
daşımasına dair xəbərdarlıq edib. İmtahan
gedişində mobil telefonlardan istifadə olunması
da qadağan olunub. |
|
